Tenness weer 2010 dör Bescheeten vun Berkelium (249Bk) mit dat Atomen vun’t Element Calcium (48Ca) tüügt. Dorto weer en Proov vun 22 mg 250 Daag bestrahlt un dorna 90 Daag in’t Oak Ridge National Laboratory rein maakt. Disse Proov is denn an’t Institut vun Dubna, Russland, in’n U400-Zyklotron för 150 Daag mit Clacium-Atomen beschoten worrn, wat to de eersten söss Atomen vun dat ne’e Element Tenness föhrt hett. Fief dorvun weern dat Isotop 293Ts, dat sösste 294Ts. Disse Synthees weer de Hööchdpunkt vun de russ’sch-US-amerikaanschen Tosamenarbeit twüschen dat JINR un dat Lawrence Livermore National Laboratory, de 1989 los güng.[3] 2014 is Tenness an’t GSI (Sellschop för Sworionenforschen) nawiest worrn.[4][5]
Dat Element is toeerst ünner den vörlöpigen Naam Ununseptium bekannt worrn, de sik ut dat latiensche unus („een“) un septem („söven“) tohopensett un vun de Atomtall 117 afleidt is. Bito is ok de Naam Eka-Astat bruukt worrn, vunwegen dat dat Element in’t Periodensystem ünner dat Astat to stahn kummt. De Opdecken is an'n 30. Dezember 2015 vun de IUPAC offiziell acht worrn. Se hett de Arbeitsgrupp in Dubna dat Recht tospraken, den Naam för dat Element to bestimmen.[6]. De IUPAC hett an’n 8. Juni 2016 bekannt geven, dat de engelsche Naam Tennessine (Ts) vörslahn weer, de siet den 8. November 2016 nu de offizielle Naam is.[7].
↑J. Khuyagbaatar, A. Yakushev u. a.: 48Ca+249Bk Fusion Reaction Leading to Element Z = 117: Long-Lived α-Decaying 270Db and Discovery of 266Lr, in: Physical Review Letters, 112, 2014, S. 172501 (doi:10.1103/PhysRevLett.112.172501).
