Swedenspieker

Vun Wikipedia
Zur Navigation springen Zur Suche springen
Westsied von’n Swedenspieker
De Swedenspieker op en oold Bild lange vör de Tied as Museum

De Swedenspieker is en Museum an’n Olen Hansehaven un an’n Fischmarkt in de Stadt Stood. In de Swedentied weer dat Huus en Havenspieker un Provianthuus för de sweedsche Garnison in Stood.

Historie[ännern | Bornkood ännern]

Mit den Westfäälschen Freden an’t Enn vun’n Dörtigjohrigen Krieg kemen de Hertogdömer Bremen un Veern an Sweden. Stood weer vun nu an de Verwaltenssitt vun dit Rebeet. 1692 hebbt se anfungen, enen Spieker an’n olen Haven to boen. Vun 1697 bet 1702 maken se ene Paus, bet de Spieker 1705 trech worrn is. De Spieker is deelwies mit Steen boot worrn, de bi dat Afrieten von de Borg Vöör in Bremervöör nableven sünd.[1]

1909 hett de Stadt dat Bowark köfft un as Lager för de Schipperslüüd in’n Haven verhüert. Doch as dat na’n Tweten Weltkrieg bilütten mit de Schipperee ut weer, dor hett dat Plaans geven, den Swedenspieker aftorieten un mit’n Schutt dat ole Havenbecken to verfüllen.[1] Op dat Land schull en Parkplatz för de Binnenstadt anleggt warrn.[1] Dor hett dat Protesten gegen geven,[1] so dat de Stadt von de Plaans Afstand nahmen un 1974 beslaten hett, dat de Swedenspieker wedder in Stand sett warrn schull un dat en Museum dor rin schull. 3,6 Millionen Mark hebbt se utgeven un an’n 30. November 1977 hett dat Museum apenmaakt mit en eerste Utstellung över de Wikingers.[1] In dat eerste Johr harr dat Museum 27.000 Besökers.[1] 1979 weer denn allens trech un kumplett utboot in’n Swedenspieker.

Bowark[ännern | Bornkood ännern]

Dat Backsteen-Bowark in’n Stil von dat Barock is 41,23 Meter lang, 16,17 Meter breed un üm un bi 20 Meter hooch. De een Meter dicken Wannen sünd ut Backsteen muert, dat Fundament is op Pähl grünnt. Dat hett twee Stockwarken in vulle Breed un dree mehr ünner’t Dack. De ünnerste Stock hett 400 Quadratmeter. Dat Kröpelwalmdack is mit Tegels deckt.

Utstellungen[ännern | Bornkood ännern]

Ganz ünnen sünd Utstellungen to sehn, de en poor Maal in’t Johr wesseln doot. In’n eersten Stock warrt de Stoder Stadthistorie anfungen bi de Wikingers bet in de Tiet vun de Industrialiserung wiest. In’n tweten Stock warrt 10.000 Johren Historie vun de Stoder Gegend wiest. In’n drüdden Stock denn liggt de Sammlung vun 9300 Zinnfiguren, de de Stoder Fritz Danner tohoopsammelt hett.

To sehn is ünner annern de MoorliekMann vun Oben-Olendörp“.

Literatur[ännern | Bornkood ännern]

  • Jürgen Bohmbach un Viktor Rihsé: Der Schwedenspeicher in Stade – vom Provianthaus zum Museum. Verlag Hansa-Druckerei Stelzer. Stood 1978

Footnoten[ännern | Bornkood ännern]

  1. a b c d e f Thorsten Penz: 40 Jahre Schwedenspeicher, Wochenblatt an’n 29. November 2017, Sied 2

Weblenken[ännern | Bornkood ännern]

Commons-logo.svg Swedenspieker. Mehr Biller, Videos oder Audiodateien to’t Thema gifft dat bi Wikimedia Commons.


Koordinaten:53° 36′ N, 9° 29′ O