Mann vun Oben-Olendörp

De Mann vun Oben-Olendörp is ene Moorliek, de in’n Mai 1895 bi’t Törfgraven in dat Kedener Moor bi Oben-Olendörp opfunnen worrn is.

Bi’t Törfsteken hebbt se em toeerst merrn dörsneden. De, de em funnen harr, hett toeerst blots de ünnere Hälft sehn un wedder inkuhlt, denn he höll dat för en Deert, dat in’t Moor doodbleven weer. Eerst bi’t wiedergraven hett he Kopp un Bost funnen un he dach nu, dat he en Liek funnen harr. Nu harrn se den Schoolmester H. Meyer ut de School ruthaalt, de gau rut harr, dat se ene ole Moorliek vör Ogen harrn. He güng nu dorbi un hett allens insammelt. He seeg ok, dat bi de Liek Resten vun Heid weren, de ans in ene Deepde vun twee Meter nich to finnen is. Dormit weer kloor, dat de Liek woll mit Afsicht inkuhlt worrn is un dat keen Unfall weer.

He weer en öllern Mann, harr en beten ene Glatz un en Dreedaagboort. Sien Hoor weer vun’t Moor roodblond farvt. He dreeg enen eenfachen Mantel, ’ne korte Büx un harr föffteihn Zentimeter brede Stoffwickeln üm’e Knee bunnen. He harr Schoh ut Ledder. De Schoh weren 28 Zentimeter lang, dat is üm un bi Schohgrött 44. Todem weer he in ene Wulldeek vun 1,73 m maal 2,53 m inwickelt. Bi sik harr he ok twee Anhängers ut Sülver. Vun’n Stil her passt de in’t 3. Johrhunnert.

De Moorliek liggt hüüt in dat Swedenspieker-Museum in Stood.