Sully Prudhomme

Vun Wikipedia
Sully Prudhomme

Sully Prudhomme [syˈli pʀyˈdɔm] (eegentlich René François Armand Prudhomme; * 16. März 1839 in Paris; † 7. September 1907 in Châtenay-Malabry) weer en franzöösch Schriever. He weer de eerste Nobelpriesdräger för Literatur. Sien bekanntst Gedicht is Le Vase brisé (1865).

Leven[ännern | Bornkood ännern]

Prudhomme is in Paris in en börgerlich kathoolsch Familie upwussen un hett an dat Lycée Bonaparte de Riepprüfung tonächst in' naturwetenschaplichen Twieg (baccalauréat scientifique) un denn in' oltspraaklich-literarisch Twieg (baccalauréat de lettres) maakt. Nah en körten Tätigkeit bi de upstreven Firma Schneider (de „franzöösch Krupp“) in Le Creusot geev he de Afsicht Ingenieur to wurrn up un hett en Jurastudium maakt. Dornah hett he, weer blots för en körten Tiet, as Afkaat in Paris arbeit.

Wiel he all siet völ Johren Gedichte verfaaten dee, hett he sück mit Midden 20 ganz de Literatur un Philosophie widmet, wobi he de Welt vun de Technik un de Wetenschap mit de vun Geist un de Schönheit to verbinnen versöch. To pass keem hüm dorbi, dat he good wat an Vermögen arvt harr.

Tonächst schreev Sully Prudhomme, as he sück nu as Schriever nömmen dee, kunstvull ziseleerte Gedichte in de ehrder köhlen Manier vun de Parnassiens, de he as begäng in Tietschriften drucken dee un vun Tiet to Tiet sammelt in Bookform herutbroch (Titel kiek ünnern).

Sien Deelnahm an den düütsch-franzööschen Krieg 1870/71, de he mit stark gesundheitlichen Problemen afsluuten dee, hett he in Impressions de la guerre (1872) un La France (1874) verarbeit.

Dornah wessel he sien Stil up en «poésie personnelle», dat heet Gedichte, de formale Eleganz mit mui Biller, mui Gedanken un mui Geföhlen gefällig vereenen deen un de vun de Lesern ut de Tiet ebenso nahfraagt wurrn as de gefälligen philosophischen Essays över völ verscheeden Themen, de he to schrieven verstunn un in groot Antall produzeeren dee.

1881 funn he sien Anerkennung as Literat dör de Upnahm in de Académie française. Anerkennung ok as moralische Autorität funn he 1895 dör de Ernennung to'n Chevalier de la Légion d’honneur (Ridder vun de Ehrenlegion). As 1901 de eerste Nobelpries för Literatur vergeven wurr, gung de an Sully Prudhomme.

Hüüd is he ok in Frankriek aber meest nicht mehr bekannt.

Sully Prudhomme funn sien letzte Ruhestäe up den Cimetière du Père-Lachaise in Paris.[1]

Warken[ännern | Bornkood ännern]

  • Stances et poèmes (Gedichte, 1865)
  • Les épreuves (Gedichte, 1866)
  • Les solitudes (1869)
  • Les destins (Gedichte, 1872)
  • La justice (Gedichte, 1878)
  • Croquis italiens
  • Les vaines tendresses (1875)
  • Le prisme (Gedichte, 1886)
  • Le bonheur (Gedichte, 1888)
  • Testament poétique
  • Journal intime
  • Réflexions sur l'art des vers (Aufsatz, 1892)
  • Épaves (Gedichte, posthum 1908)

Weblenken[ännern | Bornkood ännern]

Sully Prudhomme. Mehr Biller, Videos oder Audiodateien to’t Thema gifft dat bi Wikimedia Commons.

Enkeld Nahwiesen[ännern | Bornkood ännern]

  1. knerger.de: Dat Graff vun Sully Prudhomme