Star Trek: Voyager

Vun Wikipedia
Wesseln na: Navigatschoon, Söök
Daten vun de Reeg
Plattdüütsche Titel:
Düütsche Titel: Star Trek: Raumschiff Voyager
Originaltitel: Star Trek: Voyager
Produkschoonsland: USA
Produkschoonsjohr(en): 1995–2001
Produzent(en):

Rick Berman
Peter Lauritson
Merri D. Howard
Brannon Braga u.v.a.

Episodenläng: ~43 Minuuten
Episodentall: 172 in 7 Staffeln
Originalspraak:

Engelsch

Musik:

Dennis McCarthy
Jay Chattaway
David Bell
Paul Baillargeon

Idee:

Rick Berman
Michael Piller
Jeri Taylor u.a.
op Grundlaag vun Star Trek
vun Gene Roddenberry

Genre:

Science-Fiction

Eerst Sennen: 16. Januar 1995[1]
op UPN
Eerst Sennen (D): 21. Juni 1996
op Sat.1
Dorsteller

Hööftdorstellers:

Nevendorstellers: Afsnitt in’n Artikel

Star Trek:Voyager (dt. Titel: Star Trek: Raumschiff Voyager) is’n US-amerikaansche Science-Fiction-Feernsehreeg, de in de Johren 1995 bit 2001 in söven Staffeln produzeert worrn is. Dorbi hannelt sik dat üm de veerte Reeg ut dat Star-Trek-Universum, wenn een de Tekentrickreeg ut de 1970er Johren nich mitreken deit. De Reeg vertellt de Geschicht vun dat Ruumschipp USS Voyager, dat in de eersten Episood an’t annere Enn vun de Galaxie reten warrt un wiel de Reeg versöcht, wedder na Huus to kamen. Op ehrn Weg mutt de Mannschop vun de Voyager sik mit vele frömme Völker utenanner setten un mit de Problemen, de binnen de Kru sülvst opduken doot.

Inholt vun de Reeg[ännern | Bornkood ännern]

De Reeg fangt dormit an, dat Cpt. Janeway mit ehr nee Ruumschipp USS Voyager in de so nöömten Badlands schickt warrt, woneem en Schipp vun den Maquis – en Rebellengrupp, de gegen de Cardassianers kämpen deiht, ofschoonst de Föderatschoon en Fredensverdrag mit jem hett – vermisst warrt. Man, dat Schipp is lang nich mehr dor. As de Voyager indrapen deit dröpt se op en snaacksch Phänomen, wat dat hele Schipp op de annere Siet vun de Melkstraat, den so nöömten Delta-Quadranten, trecken deit – ruchweg 70.000 Lichtjohren wiet weg. Dor finnt sik ok dat Maquis-Schipp. An’t Enn vun de Pilotepisood lett Janeway den eenzigen Weg tonichtenmaken, woans se wedder torüch na Huus kamen künnt. In de Noot doot sik de beiden Krus tosamen, üm gemeensom den langen Weg na Huus antogahn.

Dat Kunzept vun de Reeg sütt also den Weg na Huus vör, op den de Voyager wiete Strecken dör afsluut unbekannten Ruum torüchleggen mutt. Jümmer wedder warrt de Mannschop in Gefohren togen, de dör de unbekannten Phänomenen in’n Weltruum aver ok dör de frömmen Völker tostannen kamt, de se op jemehrn Weg dropen doot. Man , ahn de annern Völker künnt se ok nich kloorkamen, vunwegen dat se sik vun Tiet to Tiet versorgen mööt. En Fraag, de dorbi jümmer wedder thematiseert warrt, is: woans kann de Mannschop so wiet Weg vun de Heimat de ethischen un moraalschen Grundsätz inhollen, de an sik vör jem as Kru vun de Föderatschoon Plicht is. Dat Schipp is aver alleen un op sik sülvst stellt, ahn dat en Kommandokeed oder annere Institutschonen vun de Steernflott jem to Siet stahn kann. So mutt sik Cpt. Janeway jümmer wedder överleggen, wat se nich lever en gauen Weg na Huus vörtehn deit un dorför ehr moraalschen Grundprinzipien un de Steernflottendirektiven för en Oogenblick vergeten deit.

Ofschoonst veele Saken, de jem na Huus helpen künnen vun jem wegen de böversten Direktive nich nütt warrn künnt, oder sik na en naue Ünnersöken as to gefährlich oder sogor unmööglich wiesen doot, kummt de Voyager opletzt doch na söven Johr in de Frömm wedder torüch na de Eer, an Steed vun de söventig Johren, de de Reis ahn Helpmiddels duert harr. Dorbi warrt dat Leven vun de Mannschop jümmer wedder bedrauht, as to’n Bispeel dör de Spezies 8472 oder dör de Borg. Mitünner kummt dat aver ok vör, dat Janeway Liddmaten vun annere Spezies in ehr Kru opnehmen deit, so as den tallaxiaanschen Hännler Neelix un de Ocampa-Fro Kes, de al glieks to Anfang an Boord kamt. Oder later ok de Borg-Drohn Seven of Nine, de se mit Spood vun’t Kollektiv scheden künnt, so dat se an Boord na un na wedder ehr minschliche Persönlichkeit wedderfinnen deit.

Mit de Fraag vun de Entwickeln vun künstliche Intelligenz un de minschliche Identität sett sik de Reeg ok in en wietere Figur in de Kru vun de Voyager utenanner. To’n Ünnerstütten vun dat medizinische Peronal bi gröttere Katastrophen gifft dat op de Voyager dat so nöömte Medizinisch-holograafsche Nootfallprogramm (MHN), dat kortfristig opropen warrn kann. Bi den Transfer in’n Delta-Quadranten warrt de medizinsche Statschoon aver swoor drapen un dat personal blifft doot. So mutt de „Holodokter“ inspringen un winnt in’n Verloop vun de Reeg jümmer mehr an Bedüden un ok an Egenstännigkeit. Ut en slicht Programm warrt so mit de Tiet en Individuum mit egen Denken.

Personen in de Reeg[ännern | Bornkood ännern]

Kathryn Janeway[ännern | Bornkood ännern]

Janeway is en junge Offizeersche, de in de Steernflott en Loopbahn mit Swoorpunkt op de Naturwetenschoppen inslahn hett. Op de USS Voyager hett se as Kapteinsche ehr tweet Kommando övernahmen, as se to Anfang vun de Reeg glieks in’n Delta-Quadranten togen warrt. Opletzt is se’t schuld, dat de Mannschop dor steken blifft: se steiht för de Weerten in, dör de sik de Steernflott defineert, un mutt Order geven, de eenzige Mööglichkeit tonichten to maken, mit de se wedder na Huus künnt. So sütt se sik för de swoore Opgaav, to’n een de Leddprinzipien vun de Steernflott to wohren, to’n annern aver ok ehr Lüüd tosamentoholen un seker wedder na Huus to bringen.

Se gifft se sik all Möh, an Boord togliek de gode Mudder, de ümsichtige Kapteinsche aver ok de strenge Wohrersche vun de Richtlienen vun de Steernflott to wesen. Dat is för ehr nich jümmer eenfack, vör allen wenn se en gode Mööglichkeit, wedder torüch na de Eer to kamen aflehnen mutt, vunwegen dat se gegen de Direktiven vun de Steernflott verstött. Bi all ehr Streng verlangt se liekers nix, wat se nich sülvst ok doon de. So tögert se bi grode Gefohren ok nich, sik mööglicherwies sülvst to oppern, wenn se dormit dat Schipp redden kann.

Robert Beltran speel Cmdr. Chakotay

Chakotay[ännern | Bornkood ännern]

Chakotay stammt vun de Eer un hett indiaansche Vörfohren. Dör sien kulturellen Achtergrund bringt he en spirituell Element in de Feernsehreeg, wenn he to’n Bispeel sien deerschen Begleider um Raat anfragen deit. He tekent sik dör en binnere Utglekenheit ut, ok wenn he sien Telen mitünner mit veel Nadruck to verfolgen weet.

To Anfang vun de Reeg is he de Kummandant vun dat Maquis-Schipp, dat de Voyager in de Badlands söken schall. As vele annere Maquis, hett ok Chakotay en Utbilln an de Steernflotten-Akademie achter sik bröcht, vördem he beslaten hett, sik de Saak vun’n Maquis antosluten. Liekers, finnt he sik foorts mit de Situatschoon torecht, as se in’n Delta-Quadrant fastsitten doot.

Tuvok[ännern | Bornkood ännern]

De vulkaansche Sekerheitsbaas vun de Voyager is en vun de drangsten Frünnen vun’n Kaptein un en loyalen Vertreder vun de Prinzipien vun de Föderatschoon. Jüst disse Loyalität to de Grundsätz, man ok sien vulkaansch Wesen, sien Geföhlen nich Böverhand winnen to laten, bringt em af un an in binnere Kunflikten un in Kunflikten mit annere Liddmaten vun de Mannschop. Dorbi steiht de Wehl vun de Mannschop för em jümmer in’n Vördergrund.

Tuvok is to Anfang vun de Reeg op dat Maquis-Schipp ünner dat Kommando vun Chakotay. He is mit en geheemen Opdrag an Boord kamen, üm Informatschonen över den Maquis to sammeln. As Vulkanier hannelt Tuvok jümmer op de Grundlaag vun Logik. Vun Spaaß un Freetietvergnögen hullt he sik dorgegen torüch. Em is kloor, dat de Wohrschienlichkeit sien Familie wedder to sehn, bannig lütt is, söcht he sien Heel lever in de Meditatschoon un in Spelen, de de Kunzentratschoon anreegt.

Schauspeler(sche) Rullennaam Staffeln Synchroonstimm
Kate Mulgrew Cpt. Kathryn Janeway 1–7 Gertie Honeck
Robert Beltran Cmdr. Chakotay 1–7 Frank-Otto Schenk
Tim Russ Lt. Cmdr. Tuvok 1–7 Christian Toberentz
Roxann Biggs-Dawson Lt. B’Ellana Torres 1–7 Arianne Borbach
Robert Duncan McNeill Lt. Tom Paris 1–4 Tom Vogt
5-7 Erich Räuker
Garrett Wang Ens. Harry Kim 1–7 Michael Iwannek
Robert Picardo Holodokter (MHN) 1–7 Stefan Staudinger
Ethan Phillips Neelix 1–7 Michael Tietz
Jennifer Lien Kes 1–3 Diana Borgwardt
Jeri Ryan Seven of Nine 4–7 Anke Reitzenstein
Nevenfiguren
Alice Krige
Susanna Thompson
Borg-Königsche   Katja Nottke
Nancy Hower Ens. Samantha Wildman   Katharina Gräfe
Scarlett Pomers
Brooke Stephens
Naomi Wildman   Jill Böttcher
Tarik Ergin Lt. Ayala   Uwe Jellinek
Martha Hackett Ens. Seska   Mo Asumang
Alexander Enberg Ens. Vorik   Thomas-Nero Wollf
Manu Intiraymi Icheb   Sebastian Schulz
Simon Billig Lt. Hogan   Ulrich Johanson
Josh Clark Lt. Carey   Michael Christian
Raphael Sbarge Michael Jonas   Michael Bauer
Brian Markinson Lt. Durst   Ulrich Johanson
John de Lancie Q   Hans-Werner Bussinger
Brad Dourif Ens. Suder   Berno von Cramm
Dwight Schultz Lt. Cmdr Barclay   Florian Krüger-Shantin

B’Elanna Torres[ännern | Bornkood ännern]

As Halfklingoonsche is B’Elanna en luunsche Person, de keen Striet ut’n Weg geiht un dör ehr Temperament eenige molen in Problemen kummt. Ut den glieken Grund hett se ehr Utbilln an de Akademie vun de Steernflott afbroken. Se hett en ne’e Levensgrundlaag in’n Maquis funnen, woneem se ünner dat Kommando vun Chakotay mitflüggt. As de Mannschoppen in’n Delta-Quadrant tosamenföhrt warrt, is B’Elanna een vun de eersten Maquis-Lüüd, de op Vörslag vun Chakotay en hogen Posten afkriegt.

As Baas vun’n Maschienenruum hett B’Elanna faken en wichtige Rull uttoöven. Ofschoonst se sik as eenzige klingoonsche an Boord ’n beten eensom un verlaten föhlt, un mitünner ok wedder ehr Temperament mit ehr dörgeiht, is se in de Kru hooch acht. Later in de Reeg warrt se de Fro vun Tom Paris.

Tom Paris[ännern | Bornkood ännern]

Paris kummt op Wunsch vun Janeway an Boord vun de Voyager, vun wegen dat he fröher sülvst wat mit den Maquis to doon harr un nu bi de Söök in de Badland helpen schall. Dorför holt Janeway em egens ut dat Gefängnis rut. An sik harr Paris al mit de Steernflott afslaten, geiht aver op dat Anbott in, üm sien Freeheit wedder to kriegen. As in’n Delta-Quadrant de Stüermann dood blifft, warrt he as Pilot an de Con insett.

Tyypsch för Paris is sien Oort, Saken antogahn. Wenn he vun wat övertüügt is, sett he allns doran, dat dörtosetten. Mitünner geiht he dorbi ok an Orders vörbi un hannelt op egen Verantwoorten. Bekannt is Paris ok för sien Ümgang mit Froonslüüd, de he geern betüdern deit. Dat hett aver en Enn, as he later in de Reeg B’Elanna heiraten deit.

Harry Kim[ännern | Bornkood ännern]

Kim is en jungen Offizeer, de jüst mit de Akademie fardig worrn is, as he op de Brüch vun de Voyager de OPS övernehmen deit. Glieks to Anfang vun de Feernsehreeg dröpt he Tom Paris, den to de Tiet de meisten annern Mannschops-Liddmaten noch ut’n Weg gahn doot vun wegen sien Vörgeschicht. Kim aver finnt in Paris en Minschen, den he troen deit, un slutt so glieks Fründschop.

Mit de Johren op de Voyager warrt ut den jungen Kerl, de noch teemlich gröön is achter de Ohren, en Offizeer, de weet, wat he to doon hett. So hett he in de drüdden Staffel to’n eersten mol dat Kommando, as de annern Offizeeren op en Butenmisschoon sünd. Blangen sien Kommandofunkschoon is Fähnrich Kim ok en go’en Techniker, de fakener mol inspringen mutt, wenn in’n Maschienenruum Noot utbreken deit.

Robert Picardo speel den Holodokter

De Holodokter[ännern | Bornkood ännern]

De richtige Beteken vun den Holodokter is dat „Medizinsch-Holograafsche Nootfallprogramm“, en holograafsch Reeknerprogramm, dat anfangs blots op de Krankenstatschoon existeeren kann un an sik dorför vörsehn is, bi grote Katastrophen oder Nootfäll de medizinsche Kru to ünnerstütten. De blifft warrt glieks to Anfang doot un dat Holoprogramm mutt de hele Tiet de Mannschop versorgen. As nich-minschliche Leevform hett he in de Feernsehreeg en vergliekbore Funkschooon as Data bi Star Trek: The Next Generation oder de Formwannler Odo bi Star Trek: Deep Space Nine.

Dat MHN warrt to Anfang as en Saak behannelt, entwickelt aver mit de Tiet jümmer mehr Persönlichkeit un Individualität, wat nich toletzt ok dör Kes föddert warrt. Na un na warrt de Holodokter jümmer mehr in de Mannschop integreert un kriggt ok jümmer mehr Rechten un Freeruum. Dat geiht op’n Slag vöran, as bi den Kuntakt mit en annere Spezies en mobilen Holotransmitter in de Hand vun de Voyager fallt. Vun doran kann de Dokter sik free an Boord bewegen un ok Butenmisschonen mitmaken.

Neelix[ännern | Bornkood ännern]

De tallaxiaansche Hännler Neelix kummt gliek to Anfang vun de Reeg an Boord vun de Voyager. He föhlt sik hentogen to de Ocampa-Deern Kes, de he mit Help vun de Voyager-Kru vun de Kazon befre’en kann. Düchtig andoon vun de technischen Mööglichkeiten vun de Voyager blifft he mit Kes an Boord. Dör sien Egenoort as Hännler is he in de Galaxie al ’n beten rümkamen un kann de Voyager op ehrn Weg dör den Delta-Quadranten dorüm mit Raat un Weten to Siet stahn.

He övernimmt to’n Bispeel de Köök op’t Schipp un sorgt mit exootsche Mahltieten dordör, dat nümms hungern mutt. Ok kennt he veele Spezies ut’n Quadrant, de vun de Voyagers-Lüüd nümms kennt. As he faststellt dat de Mannschopp vun Heimweh plaagt warrt, maakt he sik sülvst to’n „Moraloffizeer“ un sorgt ok för’t seelsche Heel. Op de Reis maakt Janeway em to en Oort Bottschopper, de mit sien Minschenkennis Kuntakt mit ne’e Spezies opnehmen deit. Kort för’t Enn vun de Reeg blifft Neelix op en frömmen Planeten torüch, woneem he en tallaxiaansche Kolonie finnt. Dor finnt he en ne’e Heimat.

Kes[ännern | Bornkood ännern]

Dör dat Todoon vun Neelix kummt de Ocampa-Deern Kes an Boord vun de Voyager. Gegen den Gloven vun ehr Volk, dat ünner de Eer leevt, is se an de Böverflach gahn un hett sik vun ehr Volk dormit afwennt. As se vun de Voyager Help kregen hett, beslutt se mit Neelix, an Boord to blieven. An Boord finnt se ehr Opgaav as Helpersche vunn Holodokter. Se hett en fotograafsch Gedächtnis un lehrt bannig gau. Bito sett se sik dorför in, dat de Dokter mit Respekt un as Individuum behannelt warrt.

Mit de Tiet entwickelt Kes telepaathsche un telekineetsche Anlagen, de se mit Help vun Tuvok utboen un utforschen deit. Anfangs föhlt se sik dull to Neelix hentogen un will mit em sogor en Kind hebben. De Geföhlen warrt in’n Verloop vun de Reeg aver weniger. As de Voyager Kuntakt kriggt mit Spezies 8472 sett bi Kes en gaue Verännern in. Ehr geistigen Anlagen entwickelt sik op eenmol gauer as se lehren kann jem to krontolleren. Üm dat Schipp nich in Gefohr to bringen, geiht se vun Boord un tütt se sik mit en Shuttle in’n Weltruum torüch.

Jeri Ryan speel de Borg-Drohn Seven of Nine

Seven of Nine[ännern | Bornkood ännern]

Seven of Nine kummt as Borg-Drohn an Boord vun de Voyager, warrt vun de Kru aver denn vun’t Borg-Kollektiv afscheedt, vun wegen dat se en Minsch is, de vun de Borg assimileert worrn is. Dat stellt sik rut, dat Seven inst as lütte Deern Annika Hansen in’t Kollektiv opnahmen worrn is. Ehr Öllern weern Wetenschopplers, de de Borg utforschen wulln, denn aver een Dag dör en Fehler sülvst opdeckt worrn sünd.

De ehmolige Drohn hett dat eerst bannig swoor, sik in de Kru vun de Voyager torecht to finnen. Langsom lehrt se mit de Tiet, ehr egen Individualität wedder hertostellen un as Minsch ünner Minschen to leven. Dat ehr dorbi veele Fehlers passeert, de mit pienliche Situatschonen verbunnen sünd, liggt doran, dat se nich as Minsch opwassen is un dorüm nienich lehrt hett, för sik sülvst to denken un dat richtige Verhollen to lehren. An’t Enn warrt se vun de Mannschop as weertvoll Liddmaat vun de Kru annahmen.

Rassen un Spezies ut’n Delta-Quadranten[ännern | Bornkood ännern]

In de Reeg warrt vele ne’e Rassen un Spezies vörstellt, de dat in de Star-Trek-Regen dorför nich geven hett. Eenige dorvun kamt fakener oder över en längere Tiet in de Geschicht vör. De wichtigsten sünd:

Borg
en hybride Leevform ut Humanoiden un Maschienen. De Borg leevt in en Kollektiv mit en gemeensom Bewusstsien un vermehrt sik dordör, dat se annere Spezies dör Assimilatschoon in jemehr egen Kolletiv opnehmt.
Hirogen
en reptilenordige Spezies, de dat Jagd vun annere starke Spezies as Karnelement vun ehr Kultur un as ehrvulle Plicht ansütt.
Kazon
en Volk, dat in verschedene Sekten ünnerdeelt is, de sik ünnerenanner nich gröön sünd. Jemehr Kultur is kriegerisch un machtdenkern utricht.
Krenim
dit Volk duukt in de Episood The Year of Hell op. Jemehr Sünnerheit sünd de Chronoton-Torpedos, de sik in en duersomen Tietstroom opholt un dorüm bannig gefährlich sünd.
Malon
jemehr Hööftplanet Malon Prime schall as en Paradies wesen, man de Levensgööd kummt alleen dorvun, dat en groten Deel vun de Weertschop mit dat an de Siet Maken vun’n Müll befaat is.
Ocampa
en Spezies, de blots üm un bi negen Johr oolt warrt un to’n gröttsten Deel ünner de Eer leevt. Se hebbt de Anlaag to Telepathie un Telekinees
Spezies 8472
en aggressive Spezies de in en fletig Paralleluniversum leevt. Se is de eenzige Spezies, de de Borg nich ünnerkriegen künnen.
Talaxianer
en Volk vun Jägers un Sammlers, de jümmers op de Söök is na wat, wat en bruken kann. Se geevt sik ümgänglich un kamt tomeist goot mit annere Spezies kloor.
Vidiianer
en Volk dat mit en gresigen Virus ansteken is, dat en Krankheit maken deit vergliekbor mit Lepra. Se bruukt dorüm jümmers nee Geweev un Organen, de se sik mit Gewalt vun annere Spezies holt.

Kritik[ännern | Bornkood ännern]

Doyle Leigh hett 2008 in EPU Research Papers en Opsatz publizeert, wona sik de Feernsehreeg in’n Ünnerscheed to de Vörgängerprodukschonen ünner annern dordör utteken deit, dat de Protagonisten dat Andrauhn un Anwennen vun Gewalt as akkerat Middel anseht, üm jemehr Kunflikten to lösen[2].

Utteken[ännern | Bornkood ännern]

De Feernsehreeg weer mehr as achtig mol för Film- oder Feernsehpriesen vörslahn. Alleen söven mol is Star Trek: Voyager mit den Emmy uttekent worrn, un dor blangen noch mit achteihn Priesen mehr, dorünner:

  • 1995: mit den Emmy in de Kategorie Rutragen Trickeffekten för en Feernsehreeg för Dan Curry u.v.a.
  • 1995: mit den Emmy in de Kategorie Rutragen Titelmusik för en Feernsehreeg för Jerry Goldsmith
  • 1996: mit den Emmy in de Kategorie Rutragen Make-up för en Feernsehreeg för Michael Westmore u.v.a.
  • 1997: mit den Golden Eagle Award in de Kategorie Rutragen Dorsteller in en Feernsehreeg för Robert Beltran
  • 1998: mit den Saturn-Pries in de Kategorie Best Dorstellersche in’t Feernsehn för Kate Mulgrew
  • 1998: mit den Golden Satellite Award in de Kategorie Best Dorstellen vun en Schauspelersche in en Feernsehreeg för Kate Mulgrew
  • 1999: mit den Golden Satellite Award in de Kategorie Best Dorstellen vun en Schauspelersche in en Feernsehreeg för Jeri Ryan
  • 1999: mit den Emmy in de Kategorie Rutragen Trickeffekten för en Feernsehreeg för Dan Curry u.v.a.
  • 1998: mit den Emmy in de Kategorie Rutragen Make-up för en Feernsehreeg för Michael Westmore u.v.a.
  • 2001: mit den Saturn-Pries in de Kategorie Best Blangendorstellesche in’t Feernsehn för Jeri Ryan
  • 2001: mit den Emmy in de Kategorie Rutragen Kompositschoon för en Feernsehreeg (dramaatsch) för Jay Chattaway

Episodenöversicht[ännern | Bornkood ännern]

Literatur[ännern | Bornkood ännern]

Borns[ännern | Bornkood ännern]

  1. Star Trek: DS9 in de IMDb, afropen an’n 6. Mai 2009
  2. Doyle, Leigh: Hegemony of Violence. Conflict Resolution Practices in Star Trek: Voyager, European University Center for Peace Studies Research Papers: Issue 10/08, Stadtschlaining 2008.

Weblenken[ännern | Bornkood ännern]

Commons-logo.svg Star Trek: Voyager. Mehr Biller, Videos oder Audiodateien to’t Thema gifft dat bi Wikimedia Commons.