Stann Creek Valley

Dat Stann Creek Valley oder ok Pomona Valley is dat Daal von’n North Stann Creek in’n Distrikt Stann Creek von Belize. Dat is en Region binnen Belize, de vör allen von’n Anbo von Zitrusfrücht präägt is.

Geografie

Dat Daal reckt von de Küst von de Karibische See binnenlands bet in de Maya-Bargen (de Bargen in’n Süden warrt Cockscomb Mountains nöömt un de in’n Noorden Macaroni Hills). Dat Daal is dormit üm un bi 35 Kilometer lang. In de Breed is dat narms veel breder as fiev Kilometer. Dat is en wichtige Verkehrsass för Belize, denn dör dat Daal löppt mit’n Hummingbird Highway de eenzige kumplett asphalteerte Straat, de den Süden von Belize mit’n Noorden verbinnen deit.

To dat Daal höört de Öörd in dat Achterland von de Küstenstadt Dangriga. Dat sünd von Oost na West de Dörper Sarawee, Long Bank, Melinda, Hope Creek, Pomona, Alta Vista, Cow Creek, Steadfast Community, Valley Community, Middlesex un Hummingbird Community.

Weertschop

Wark von Citrus Products of Belize in Pomona

De wichtigste Telg för de Weertschop in dat ganze Daal is de Plantaaschenweertschop mit’n Anbo von Bananen un Zitrusfrücht (vör allen Appelsienen un Pampelmusen).

De Woren warrt vör allen över’n Haven von Big Creek aftransporteert.

Historie

Bet an dat Enn von dat 19. Johrhunnert weer dat Daal Wildnis. In de Johren 1880 hett dat British Honduras Syndicate mit’n Anbo von Bananen anfungen. För’n Verkehr is de eerste Afsnidd von dat Daal 1892 opslaten worrn, as dat British Honduras Syndicate en Mulibahn von Dangriga bet na Melinda anleggt hett.

Von 1907 bet 1914 is de Bahn as Stann Creek Railway bet na Middlesex utboot worrn.

1913 hebbt de Mediziner Smith Osborne Browne, de Manager Alfred Edward Vine (British Honduras Syndicate) un de Bananenplanter William Alexander Bowman 900 Pampelmusen-Planten ut Florida importeert un Plantaaschen in Sarawee un Pomona anleggt. De Frücht sünd toeerst frisch exporteert worrn, 1935 hett tosätzlich de Produkschoon von Pampelmusen-Saft anfungen.

1938 is de Bahnlien afboot worrn un de Bahntrass is to de Stann Creek Valley Road ümboot worrn, de vondaag Deel von’n Hummingbird Highway is. Grund weer op de een Sied, dat de Bahn Verlusten maakt hett. Dat weer aver ok so, dat Bananen sik good hollt, ok wenn se längere Tied ünnerwegens sünd. Appelsienen un Pampelmusen op de anner Sied köönt dat nich good af. Dorüm weer för de Zitrusindustrie de flexible Transport mit Lastwagens beter as de Transport mit de Bahn, de blots een Maal in’e Week föhrt is.

Besünners in de Johren 1940 un 1950 is de Anbo von Appelsienen utboot worrn.

Üm de Frücht to verarbeiden sünd 1942 in Pomona (von de Citrus Company) un 1962 in Alta Vista (von Salada Foods) Warken anleggt worrn. De Warken sünd na en Reeg Besitterwessels vondaag all beid Deel von dat Ünnernehmen Citrus Products of Belize.