Speed 2: Cruise Control

Vun Wikipedia
Zur Navigation springen Zur Suche springen
Filmdaten
Plattdüütsch Titel:
Originaltitel: Speed 2: Cruise Control
Düütsch Titel: Speed 2 – Cruise Control
Produkschoonsland: USA
Johr vun’t Rutkamen: 1997
Läng: 125 Minuten
Originalspraak: Engelsch
Öllersfreegaav in Düütschland: FSK 12
Filmkru
Speelbaas: Jan de Bont
Dreihbook: Randall McCormick
Jeff Nathanson
Produkschoon: Jan de Bont
Steve Perry
Michael Peyser
Musik: Mark Mancina
Kamera: Jack N. Green
Snitt: Alan Cody
Szenenbild: Bill Skinner
Kledaasch: Louise Frogley
Dorstellers

Speed 2: Cruise Control (op platt so veel as: „Snelligkeit 2: Temporegler“; dt. Titel: Speed 2 – Cruise Control) is de Titel vun en US-amerikaanschen Actionfilm ut dat Johr 1997, de an de Geschicht vun den Vörlöper Speed vun 1994 ansluten deit. As in den eersten Film, speelt Sandra Bullock ok hier wedder de Hööftrull. Speelbaas weer bi beide Filmen Jan de Bont.

Inholt[ännern | Bornkood ännern]

De Polizist Alex Shaw jaagt in Los Angeles op een Motorrad achter en Leverwagen ran, de vull mit roovte Woren is. To de glieken Tiet hett sien Fründin Annie en Fohrprüfung, üm ehrn Föhrerschien torüchtokriegen. Se draapt sik, as Annie en Polizeiauto rammt un dör ehr Prüfung fallt. Eerst dordör warrt se gewohr, dat Alex bi en Sünnereenheit arbeit un nich eenfachen Polizist an’n Strand vun Venice Beach is. Se weer vun ehrn letzten Fründ, den Polizist Jack (ut den eersten Film), wegggahn, vunwegen dat sien Beroop so gefährlich weer. Liekers hett Alex al en Krüüzfohrt in de Karibik för jem organiseert, un so fohrt de beiden tosamen in den Urlaub.

Man, to de Gäst an Boord vun de Seabourn Legend höört ok John Geiger, de en reeknerbaseert Autopiloten-System för Krüüzfohrtscheep utklamüstert hett, denn aver rutsmeten weer, as he vun Beroops wegen krank worrn is. Em blieft blots noch wenige Johren, un so is he so vull vun Hass un den Wunsch torüchtobetahlen, wat em andoon weer: He will dat Schipp tonichten maken un vörher den Smuck ut den Tresor an Boord roven. Dör en Feernstüern övernimmt he de Kontroll över’t Schipp un smitt den Kaptein över Boord.

Över Telefon verkloort he den Eersten Offizeer Juliano, dat sien Kaptein dood is un he nu dat Seggen an Boord hett. He drauht em, dat he dat Schipp mitsams de Passageren tonichten maakt, wenn he nich foorts dat Schipp rümen lett. För’t Evakueren gifft he em 15 Minuuten un lett op de Reeknermonitoren vun verschedene Öörd an Boord Füer mellen. Juliano kann natürlich nicht weten, dat Geiger blots an de Kontrollen rümspeelt hett.

De meisten Gäst verlaat dat Schipp, man en poor kamt nich mehr rechttietig weg, so ok Annie un Alex. Geiger rüümt intwüschen in dat Chaos den Tresor vun’t Schipp ut. Dat sütt ut, as wenn dat Schipp nu op’n Kollisionskurs mit dat Eiland St. Martin is. Üm dat Schipp langsomer to maken un vun’n Kurs aftobringen, lett Alex de Waterballasttanks vull lopen. Aver dat Schipp stüert gor nich op dat Eiland to, man op den Ööltanker Eindhoven Lion, der dor vör Anker liggt. Mit Annie as Börgsche neiht Geiger op en Motorboot ut.

Alex kann den Kurs vun’t Krüüzfohrtschipp in’n letzten Ogenblick noch ännern, so dat de Tanker blots anschrammt warrt. Nu stüert dat Schipp aver in Richt op en Havenstadt op dat Eiland to. Wohrhaftig löpt dat Schipp in den Haven op un kummt eerst midden in de Stand to’n Stillstand, nadem de Havensteg un tallrieke Hüüs in’n Dutt sünd. Annie is aver jümmer noch in de Gewalt vun Geiger, de mit en Fleger wegkamen will. Alex kann ehr aver befre’en. De Fleger blifft an’n Mast vun den Tanker hangen un flüggt tosamen mit den Tanker in de Luft. Dorbi kummt Geiger üm. Opletzt maakt Alex sien Annie en Heiraatsandrag, den se annehmen deit.

Kritik[ännern | Bornkood ännern]

  • Dat Lexikon vun’n internatschonalen Film meen, dat de Film as sien Vörlöper den Swoorpunkt op en butere Bewegung setten de, un nich op de Geschicht. Dat ümfaat verschedene Fohrtüüch, de Minschen un ok de Kamera sülvst. De Film weer en Orgie vun’t Tonichtenmaken gegen Luxusgöder, de blots in en Andüden ironische verstahn warrn künn. To’n Enn hen, warrt de Gesicht to en reine Materialslacht un verlütt dordör veel an sien Ünnerhollensweert.[1]
  • In de Berliner Zeitung stünn, dat sik Jan de Bont Möh geev, den sieten Speed-Kettel dör vele technische Manövers un jamesbondige Gimmicks uttoglieken. Liekers keem de Film nich recht in Fohrt. Mit matige Spannung künn een tokieken woans Dafoe un sien Gegenspelers Katt un Muus spelen doot, un eerst an’t Enn harr he dat Schipp, woneem dat henhöör: ut de Kontroll, wobi dat toeerst an en annert Resenschipp vörbischrammt un opletzt halv in en Havenstadt rinschufft. Üm de katastroopsche Optik vull uttokosten, weer de Inloop so dull dehnt, as de Filmsnittkunst dat jüst noch tolaten de.[2]
  • Der Spiegel schreev, dat man üm en tweeten Deel wegen den Spood woll nich ümhen kamen weer, de aver ahn den geern sehn Keanu Reeves un ok ahn den kloken Schriever Graham Yost utkamen müss. So harr sik Speelbaas Jan de Bont sülvst en ne’e Geschicht utdacht, de as Super-Bombenlegger weddermol en miemern Reeknerfreak wiest un as Schauplatz en Krüüzfohrtdamper. Vunwegen dat vun de Hööch vun de Kommandobrüch bit deep in’t Binnere vun’t Schipp veel rümtoheveln gifft, geiht de Överblick gau verloren. Verlaten künn een sik alleen op dat düvelsche Tähnwiesen vun Willem Dafoe un natürlich op dat vegnöögte Meckern vun Sandra Bullock.[3]

Utteken[ännern | Bornkood ännern]

De Film hett keen vun de beropenen Filmpriesen afkregen. Dorför weer he 1998 glieks achtmol för de Golden Himbeer nomineert as de slechtste Film in verschedene Kategorien. Wunnen hett he dorvun den Pries as Slechtst Foortsetten vun en Speelfilm.

Achtergrund[ännern | Bornkood ännern]

De Butenopnahmen op’t Schipp weern an Boord vun dat Krüüzfohrtschipp Seabourn Legend (fröher: Royal Viking Queen) dreiht, dat in Bremerhoben vun Schichau Seebeck konstrueert worrn is. Bito weer op en Frachtschipp mit en verkehrten Schippskörper un naboete Brüch dreit. För de Szeen an’t Enn is en Schippsrump naboet worrn, de op Schienen ünner Water op dat Eiland föhrt weer. Dorto sünd vele Biller dör Tricktechnik an’n Reekner tüügt worrn.

In den Film hett de Grupp UB 40 en Gastoptritt. Se speelt sik dorin sülvst as en Musikgrupp to’n Ünnerhollen op dat Krüüzfohrtschipp. En Gastrull speelt ok Glenn Plummer, de in’n eersten Deel as en Jaguarfohrer to sehn weer un hier in en vergliekbore Szeen as Bootsbesitter optreden deit.

De Produkschoon schall ruchweg 160 Millionen US-Dollar köst hebben, inspeelt hett he in de Kinos weltwiet üm un bi 165 Millionen US-Dollar, dorvun 49 Millionen alleen in de USA[4]. In Düütschland weern ruchweg 1,9 Millionen Tokiekers in de Kinos tellt. De Gaasch vun Sandra Bullock hett bi dissen Film ruchweg 12,5 Millionen US-Dollar bedragen. För den eersten Deel harr se blots en halve Million kregen. De Dreiharbeiten güngen vun’n 7. Oktober 1996 bit to’n 28. Januar 1997. Premiere harr de Film an’n 13. Juni 1997 in de USA.

Borns[ännern | Bornkood ännern]

  1. Indrag in’t Lexikon vun’n internatschonalen Film, afropen an’n 8. März 2013
  2. Filmkritik Auf großer Fahrt ins Herz der Leere in de Berliner Zeitung (Lenk nich mehr aktiv)
  3. Filmkritik Speed 2: Cruise Control in Der Spiegel, afropen an’n 8. März 2013
  4. http://www.boxofficemojo.com/movies/?page=main&id=speed2.htm

Weblenken[ännern | Bornkood ännern]