Salo Flohr
Salo Flohr (up russisch Саломон Михайлович Флор/Salomon Michailowitsch Flor, * 21. November 1908 in Horodenka/Öösterriek-Ungarn; † 18. Juli 1983 in Moskau) weer en tschechoslowaaksch-sowjeetsch Schachmeester. In de 1930er-Johren gull he as en vun de best Speler vun de Welt.
Leven[ännern | Bornkood ännern]
Salomon Flohr wurr as een vun acht Kinner vun arm jöödsch Öllern boren.[1] Wiels den Eersten Weltkrieges hemm Salo Flohr un sien öller Bröer as eenzig en Jodenpogrom in hör galizischen Heimatstadt överleevt. As Vullwaisen sünd de beid Jungs um dat Johr 1916 nah Prag in Böhmen trucken. Nah de Grünnen vun de Tschechoslowakei in dat Johr 1918 wurr Flohr tschechoslowaaksch Staatsbörger un is in en Pleegfamilie in Benešov (Beneschau) upwussen. Tonächst hett he Grööntüüch verköfft un af etwa 1923 Zeitungen utdragen, aber all in de Jöögd hett Flohr mit Spood in Prager Cafés Schach speelt, wo he um Wettinsatz speel un dorin en beter Utkommen funn as in börgerlich Beropen.
Flohr geev sien internatschonales Debüt bi dat Turnier in Rogaška Slatina 1929, wo he achter Akiba Rubinstein Tweet wurr un somit vör Sándor Takács, Vasja Pirc, Géza Maróczy un annern bleev. Disse goot Platzeeren weer de Grundsteen för sien nu folgend Loopbahn as Beropsspeler. In de folgend 10 Johren weer he schachlich düchtig aktiv un leet meest kien wichtig Turnier ut. He hett dat Traditschonsturnier vun Hastings in de Johren 1931 bit 1934 veer Mal nahnanner wunnen. Mit Michail Botwinnik wunn he 1935 in Moskau (vör de Ex-Weltmeesters José Raúl Capablanca un Emanuel Lasker). Wiederhen wunn he de Turniere in Poděbrady 1936 un Kemeri 1937 (gemeensam mit Samuel Reshevsky) vör Alexander Alexandrowitsch Aljechin. Flohr hull twee Wettkämpe gegen latere Weltmeester remis: 1932 speel he in Amsterdam gegen Max Euwe 8:8 (+3 =10 −3), 1933 gegen Michail Botwinnik in Leningrad un Moskau 6:6 (+2 =8 −2).
Flohr speel för de Tschechoslowakei bi fiev Schacholympiaden. 1930 in Hamborg weer noch kien fast Brettfolge vörschreven, bi de veer folgend Schacholympiaden speel he an dat eerste Brett. In Prag 1931 wunn he mit de Mannschap de Bronzemedaille, in Folkestone 1933 Sülver. Flohr reck 1935 in Warschau un 1937 in Stockholm dat best Ergevnis an dat eerste Brett, 1930 dat tweetbest Eenzelergevnis vun all Deelnehmers. Dat Gesamtergevnis vun all sien Olympiapartien is imponeerend: +46 =28 −8 (73,17 %).[2]
Nah sien Sieg in den Revanchewettkamp um de Weltmeesterschap 1937 hett Aljechin Salo Flohr as sien künftigen Herutforderer betekent, en Status, de ok dör en Afstimmen in Stockholm to’n Anlaat vun de Schacholympiade 1937 fastsett wurr. Plaant weer en Tweekamp över 30 Partien in de Tschechoslowakei.[1] Wurrn is dorvan nichts. De Grund weer de swoor politisch Situatschoon vun den jungen tschechoslwaakschen Staat, de sück en Okkupatschoon dör dat faschistische Düütschland utsett seech. Flohr hett de Tschechoslowakei gau verlaaten un hett kört in Sweden leevt, vun wo he gemeensam mit sien Ehefru mit Hülp vun sien Früend Michail Botwinnik in de Sowjetunion emigreeren dee. 1942 kreeg he de sowjeetsch Staatsbörgerschap.
Nah den Krieg gull Flohr, de nu in finanziell goot Verhältnissen leev,[1] tonächst weer as en Anwärter up den Weltmeestertitel. De FIDE hett hüm 1950 den Grootmeestertitel tospraaken.[3] He qualifizeer sück över dat Interzonenturnier Saltsjöbaden 1948 för dat Kandidatenturnier in Budapest 1950. Doch he harr sien best Tiet all achter sück un keem dor blots up den 8. Platz (7 Punkte ut 18 Partien). Flohr hett sück dornah up sien Aktivitäten as Schriever un Schachjournalist för verscheeden russische un utläänsch Zeitungen, dorünner ok düütsch Zeitungen (he kunn perfekt Düütsch snacken) konzentreert. He hett as Kommentator bit to sien Dood 1983 all wichtig Schachereegnisse in de Sowjetunion begleit.
Sien hööchst historsch Elo-Tall weer 2754, de he in’n April 1936 recken dee. He belegg up de Weltranglist Platz 2 vun März bit November 1935 un in‘n Mai 1936.[4]
Privates[ännern | Bornkood ännern]
Sien Fru Tatjana Flohr (1933–1993) weer en Nichte vun den berühmten russischen Dichter Sergei Jessenin.
Literatur[ännern | Bornkood ännern]
- Gregory S. Donges: Salo Flohr's best Games of Chess. Thinker's Press, Davenport, Iowa 1985. ISBN 0-938650-34-3. (englisch)
- V. D. Baturinskij (Hg.): Grossmejster Flor. Fiskultura i sport, Moskau 1985 (russisch)
- Helmut Wieteck: Salo Flohr und das Schachleben in der Tschechoslowakei. Neu-Jung-Verlag, Homburg 2005. ISBN 3-933648-26-2.
Weblinks[ännern | Bornkood ännern]
Enkeld Nahwiesen[ännern | Bornkood ännern]
- ↑ a b c Vlastimil Hort: Memories: Vlastimil Hort on Salo Flohr. ChessBase, 22. Februar 2017, afropen an’n 23. Februar 2017 (englisch)
- ↑ Salo Flohr sien Ergevnisse bi Schacholympiaden up olimpbase.org (engelsch)
- ↑ Willy Iclicki: FIDE Golden book 1924–2002. Euroadria, Slovenia, 2002, S. 74.
- ↑ Salo Flohrs historische Elo-Zahl up chessmetrics.com (engelsch)