Remijio Montejo

Remijio Ignacio „Nacho“ Montejo (* 1. Oktober 1950; † 3. Mai 2007 in Belize-Stadt) weer en Politiker ut Belize (PUP).

Leven

Montejo is 1950 boren. He hett in Belize den Radiosenner The Beat bedreven.

Montejo weer in eerste Eh verheiraadt mit Veronica Elizabeth Montejo (September 1954–17. April 2019) un in twete Eh mit Xian Wang Huang Montejo. Montejo harr mit siene eerste Fro twee Döchter un mit siene twete een Söhn.

He is an’n 3. Mai 2007 in dat Karl Heusner Memorial Hospital in Belize-Stadt doodbleven. He hett an Bregenkreeft leden. Siene Truurfier weer an’n 5. Mai in de St. Ignatius Church un he is op’n Lord Ridge Cemetery begraven.

Politik

Montejo is 1975 in de Politik gahn un weer Maat von de People’s United Party (PUP). He is 1980 in’n Stadtraad von Belize-Stadt wählt un 1981 Börgermeester worrn. Bi de Stadtraadswahlen 1983 un 1986 is he ok antreden, is aver nich wedder wählt worrn.

Bi de Parlamentswahl in Belize 1984 weer he Kannedaat för de PUP in’n Wahlkreis Collet un hett de Wahl mit 45,2 % von de Stimmen gegen Frank Lizama von de UDP verloren. In de Wahl 1989 weer he in’n sülven Wahlkreis Kannedaat un hett de Wahl dütmaal mit 58,2 % von de Stimmen gegen Lizama wunnen.

Bi de Wahl 1993 is he gegen Faith Babb von de UDP antreden un hett de Wahl mit 49,7 % knapp verloren. In de Wahl 1998 kunn he sik mit 60,28 % aver wedder kloor gegen Babb dörsetten. Toletzt hett he bi de Wahl 2003 mit 46,99 % gegen Patrick Faber von de UDP verloren.

Dormit weer Montejo von 1989 bet 1993 un en tweet Maal von 1998 bet 2003 Afornten von dat Repräsentantenhuus von Belize. Von 1989 bet 1993 weer he ünner Premierminister George Cadle Price Minister för Soziale Saken, Froonslüüd un Junge Lüüd in dat Kabinett Price II.

He weer von 1989 bet 1993 ok Viez-Spreker von dat Repräsentantenhuus.