People’s National Party (Belize)

Vun Wikipedia
Zur Navigation springen Zur Suche springen

De People’s National Party (PNP) weer en polietsche Partei ut Belize, de von 2007 bet 2015 bestahn hett.

Se harr ehr Hööftquarteer in de Stadt Punta Gorda in’n Süden von Belize (Distrikt Toledo) un weer ok vör allen in’n Süden von dat Land aktiv. Parteibaas weer Wil Maheia.

Positschonen[ännern | Bornkood ännern]

De wichtigste Standpunkt von de Partei weer dat Gegenangahn gegen de Korrupschoon de ut Sicht von de PNP in de beiden groten un etableerten Partein, de People’s United Party (PUP) un de United Democratic Party (UDP), herrscht.

De Partei harr ok en kumpromisslosen Standpunkt in’n Grenzkunflikt twüschen Belize un Guatemala un weer dor partu gegen, Guatemala Togeständnisse to maken oder den Kunflikt von’n Internatschonalen Gerichtshoff slichten to laten.

Historie[ännern | Bornkood ännern]

De Partei is an’n 19. Februar 2007 op en Versammlung in San Antonio grünnt worrn. In’n Oktober 2007 is de PNP för de Parlamentswahl 2008 en Parteinbündnis mit dat We the People Reform Movement un Christians Pursuing Reform ingahn, dat National Belizean Alliance (NBA) heten hett. Anföhrer von de NBA weer Wil Maheia. De NBA hett bi de Wahlen denn in veer von de 31 Wahlkreise Kannedaten opstellt (ünner annern Salustiano Lizama, de al för de PUP Afornten in dat Repräsentantenhuus weer) un 0,43 % von de Stimmen kregen. Dormit hett de NBA keen Mandaat haalt. De NBA hett sik na de Wahlen wedder oplööst.

Bi de Parlamentswahl 2012 hett de PNP denn in söven von de 31 Wahlkreise Kannedaten opstellt (ünner annern Fred Hunter, de al för de PUP Afornten in dat Repräsentantenhuus weer) un 0,64 % von de Stimmen kregen. Dormit hett se wedder keen Mandaat wunnen.

Kort vör de Parlamentswahl 2015 an’n 30. September 2015 hett sik de Partei sülvs oplööst un en groten Deel von de Maten hett sik tohoop mit Lüüd von de Vision Inspired by the People (VIP) un annere Oppositschoonsgruppen, de to keen von de beiden groten Partein (PUP un UDP) hollen hebbt, de Belize Progressive Party (BPP) anslaten. Binnen de BPP is Wil Maheia denn Viez-Parteibaas worrn.