Otto – Der Außerfriesische

Vun Wikipedia
Zur Navigation springen Zur Suche springen
Filmdaten
Plattdüütsch Titel:
Originaltitel: Otto – Der Außerfriesische
Düütsch Titel: Otto – Der Außerfriesische
Produkschoonsland: Düütschland
Johr vun’t Rutkamen: 1989
Läng: 92 Minuten
Originalspraak: Düütsch
Öllersfreegaav in Düütschland: FSK 6
Filmkru
Speelbaas: Marijan David Vajda
Otto Waalkes
Dreihbook: Bernd Eilert
Robert Gernhardt
Peter Knorr
Otto Waalkes
Produkschoon: Horst Wendlandt
Musik: Thomas Kukuck
Christoph Leis-Bendorff
Kamera: Egon Werdin
Snitt: Jutta Hering
Szenenbild: Albrecht Konrad
Christoph Schneider
Kledaasch: Anne Hoffmann
Dorstellers

Otto — Der Außerfriesische (op platt so veel as „Otto — De Butenfreesche“) is de Titel vun en düütsche Filmkummedie ut dat Johr 1989 vun un mit Otto Waalkes. Dat is na Otto – Der Film un Otto – Der neue Film de drüdde Kinofilm wesen, den de oostfreesche Komiker maakt hett. As bi all sien Filmen, verarbeit he ok in dissen sien tyypschen Humor, de sünners op Woortspelen un Situatschoonskomik baseert. In Düütschland is de Film an’n 13. Juni 1989 in de Kinos kamen.

Inholt[ännern | Bornkood ännern]

De Industriemulti „High Speed Unlimited“ plaant, in Oostfreesland en Testbahn för sien Tempo-1000-Hoochsnelligkeitstöög to boen. Blots noch eens gifft dat, wat jem imn’n Weg steiht, neemlich de olle geel-ro’e Lüüchttoorn nipp un nau an’n Diek to’t Wattenmeer. In den ollen Toorn leevt Otto Groß, en fründlichen Minschen, de sien Ünnerholt as Frömmenföhrer verdeent un de Touristen lütte namaakte Lüüchttoorns ut Klopapeerrullen andreiht. He deit un maakt aver ok sonst allerhand för siene Mitminschen.

Verkeken hett sik Otto in de Kinnergoornersche Frauke, wat de Nichte vun den Baron vun Platt is, de dor vör Oort wahnt. Frauke hett för Otto aver nix över, vun wegen dat se vörher mit sien Broder Benno tosamen weer un ehr in den Lüüchttoorn noch allens an em denken lett. Mit Bedacht op Frauke versöcht Otto allns wegtomaken, wat mit Benno to doon hett, as Frauek em op sien Inladung hen besöken deit. Jüst to de Tiet kamt ok twee Mackers vun „High Speed Unlimited“, de Otto den Lüüchtoorn afköpen willt, vun wegen dat de in’n Weg steiht. Frauke kann dat in’n letzten Moment noch afwennen, as se vertellt, dat de Toorn gor nich Otto tohöört, man sien Broder Benno, de em ok as eenzigen verköpen kann.

As sik Otto bi de Firma insleken deit, warrt he wies, worüm dat egentlich geiht bi den Plaan vun „High Speed Unlimited“, neemlich dat jemehr Landschop op’t Speel steiht. He vertellt de Börgers, wat op jem daal kummt. Dorbi finnt he rut, dat Benno, de intwüschen na Amerika utwannert is, to en sünnern Tietpunkt wedder torüch wesen un as Teken vun sien Besittanspröök en Boom planten mutt. Wenn Benno dat nich deit, verlütt he den Anspröök op dat Land un den Toorn, un „High Speed Unlimited“ kann denn ahn Hinnern de Landschop mit jemehr Togstreck verschanneln.

In’n Deenst vun sien Heimatland — un natürlich ok, üm Frauke to imponeeren — maakt sik Otto foorts op de Söcken in de USA, üm sien Broder to finnen. As de Firmenbaas Van Devil vun Benno höört, sett he den latienamerikaanschen Opdragsmöörder El Cucaracho op em an, üm em an de Siet to maken. In Miami ankamen, mutt he eerstmol mit de frömme Spraak un de Kultur vun de US-Amerikaners torecht kamen. He beleevt dor allerhand, finnt opletzt na eenigen Arger aver sien Broder Benno, de as Privatdetektiv arbeit. Dat bruukt en beten goot Tosnacken, man denn seggt he to, dat he torüch na Oostfressland kamen will.

Ottos Wahnung in’n Film: de Pilsmer Lüüchttoorn

Otto mutt em dorför en Gefallen doon: He verkleedt sik as sien Tweeschen-Broder un mutt vör em en Fall lösen, bi den dat üm Ehbreken gahn schall. In Wohrheit is dat aver en Fall, de vun El Cucaracho stellt worrn is. Mit Help vun en feernstüert Auto kann Otto de Bomb, de em an de Siet maken schall, den Verbreker ünnerjubeln un em dormit utschalten. Dorna kehrt Otto in sien Heimat torüch, in de noch allns bi’n Ollen is: De Hüüs un de Toorn staht noch, Van Devil mit siene Mackers un de Baron vun Platt sünd verhaft worrn un mööt Straafdeenst afleisten. Blots an de go’e Daat vun Otto denkt keeneen mehr, vun wegen dat Benno as de grote Redder fiert warrt. An’t Enn vun’n Film kummt aver ok he noch to sien Recht, as he kriggt, wat he all de Tiet an’n leefsten hebben wull: siene Frauke!

Kritik[ännern | Bornkood ännern]

Dat Lexikon vun’n internatschonalen Film schreev över de Kummedie, dat se ut olle Kalauers, afstahn Döntjes un schraten Klamauk besteiht. De Film warrt beschreven as nix anners as’n gigantische Warf för den Hööftdorsteller.

Anners wat[ännern | Bornkood ännern]

  • De Film speelt op verschedene annere Film- un Feernsehprodukschonen an. So is de Titel an den US-amerikaanschen Film E.T. the Extra-Terrestrial (dt.: E. T. – Der Außerirdische) anlehnt. Ok op de spoodrieken Feernsehregen Knight Rider un Miami Vice warrt anspeelt.
  • As ok in de vörigen Filmen vun Otto Waalkes deent de Geschicht vör allen dorto, enkelte bekannte Sketchen un Döntjes ut Otto sien Bühnenprogramm mitenanner to verbinnen. Ok in’n Afspann sünd eenige Mitsneden ut verscheedene Otto-Shows to hören.
  • De Teststreck, de in’n Film vun „High Speed Unlimited“ plaant warrt, speelt op de Transrapid-Versööksanlaag Emsland an, de 1987 fardig worrn is.
  • In den Film waart vele Stimmen vun den bekannten Synchroonsnacker Peter Kirchberger snackt.
  • Otto wahnt in den Film in en Lüüchttoorn. Dorför deen de Pilsmer Lüüchttoorn as Kulisse, de as de lüttste vun siene Oort in Düütschland gellt. Op de Kinoplakaten as ok op de DVD-Hüll is ansteed vun den richtigen Lüüchtoorn de Lüüchttoorn Westerheversand afbillt.

Weblenken[ännern | Bornkood ännern]