Nee Mooringen

Wapen/Flagg	Koort
Basisdaten
Bundsland: Neddersassen Landkreis: Oosterholt Gemeen: Leendaal
Inwahners:
Postleettall:	28865
Vörwahl:	04792
Geograafsche Laag:	53° 12′ N, 8° 57′ O

Nee Mooringen (hoochdüütsch Neu Mooringen) is en Dörp in de Gemeen Leendaal in’n Landkreis Oosterholt, Neddersassen.

Geografie

De Oort liggt in dat Düvelsmoor in’n Süüdoosten von’n Weyerbarg. Dat Water ut dat Rebeed flütt in’n Noorden na de Semkenfohrt hen af un in’n Süden över’n Tüschendorp-Worphuser Graven na de Wörp.

De Naveröörd sünd Mooringen in’n Noorden, Ottersteen in’n Noordoosten, Nee-Ottersteen un Seehusen in’n Oosten, Moorenn un Worphusen in’n Süden un Lüninghusen un Westerweed in’n Westen.

Historie

Nee Mooringen is 1808 as letzte Moorkolonie in dat Düvelsmoor grünnt worrn.

In’n Eersten Weltkrieg sünd veer Soldaten ut Nee Mooringen fullen oder vermisst un in’n Tweten Weltkrieg fiev.

Verwaltungsgeschicht

De Oort hett vör 1885 to de Vaagdie St. Jürgen von dat Amt Leendaal tohöört. Na 1885 weer dat in’n Kreis Oosterholt, de 1932 mit’n Kreis Blomendal to’n ne’en grötteren Kreis Oosterholt tohoopgahn is.

De Oort weer fröher en egenstännige Gemeen, de an’n 1. April 1929 aver Deel von de Gemeen Mooringen worrn is. Düsse Gemeen harr denn aver blots bet to’n 1. April 1937 Bestand, as Mooringen Deel von de Gemeen Worphusen worrn is. De Gemeen Worphusen is an’n 1. März 1974 mit de Gemeenreform in Neddersassen Deel von de Gemeen Leendaal worrn.

Inwahnertall

Johr	Inwahners
1824-00-001824	9 Füürsteden
1848-00-001848	108 Lüüd, 17 Hüüs
1871-12-011. Dezember 1871	120 Lüüd, 20 Hüüs
1885-12-011. Dezember 1885	132 Lüüd, 21 Hüüs
1905-12-011. Dezember 1905	134 Lüüd, 20 Hüüs
1910-12-011. Dezember 1910	147

Religion

Nee Mooringen is evangeelsch-luthersch präägt un höört to dat Kaspel von de Zion-Kark in Worpsweed.

För de Kathoolschen is de Goden-Hirt-Kark in Leendaal tostännig, de siet 1. September 2012 to de Karkengemeen von de Hillige-Familie-Kark in Oosterholt-Scharmbeek höört. De Goden-Hirt-Kark is 1961 boot worrn.

Kultur

Gedenktafeln för de Fullenen ut de twee Weltkrieg’ hängt in Worpsweed in de Kark.

Weertschop un Infrastruktur

Verkehr

De Dörpstraat von Nee Mooringen föhrt in’n Noordoosten na de Kreisstraat 10 twüschen Worpsweed un Grasbarg un in’n Süüdwesten na de Landsstraat 153. De L 153 löppt in’n Noorden na Worpsweed, wieder na Huttenbusch un von dor na Oosterholt-Scharmbeek un in’n Süden na Leendaal.

De nächste Autobahn is de Autobahn 27 (Afsnidd Bremen–Wasra). De Opfohrt 19 Horn-Leh liggt so 18 Kilometer in’n Süden von Nee Mooringen an de Leendaler Heerstraat.

De nächste Bahnhoff is so bi 15 Kilometer wied weg in’n Noordwesten de Bahnhoff Oosterholt-Scharmbeek an de Bahnlien Bremen–Bremerhoben. Von 1911 bet 1978 hett dat ok Personenverkehr op de Bahnlien Stood–Oosterholt-Scharmbeek geven. De Bahnhööv Worpsweed un Weyerdelen-Umbeek weren üm un bi söss Kilometer in’n Noorden.

Scholen

De Kinner ut’n Oort gaht na de Grundschool Worphusen.