Mehmstood

Wapen/Flagg	Koort
Basisdaten
Bundsland: Neddersassen Landkreis: Cuxhoben Samtgemeen: Land Hadeln Gemeen: Helmworth
Inwahners:
Postleettall:	21775
Vörwahl:	04755
Geograafsche Laag:	53° 43′ N, 8° 53′ O

Mehmstood (hoochdüütsch Medemstade) is en Oort in de Gemeen Helmworth (Samtgemeen Land Hadeln) in’n Landkreis Cuxhoben, Neddersassen.

Geografie

De Oort liggt in dat Siedland von Hadeln. Dat Water ut dat Rebeed flütt över de Mehmstoder Wettern na de Au/Mehm hen af. In’n Süüdwesten liggt dat Naturschuulrebeed Ahlen-Falkenbarger Moor, Haalmer/Dahlmer See.

De Naveröörd sünd Veerhusendörp un de Helmworther Middeldeel in’n Noorden, Helmworth in’n Noordoosten, Stroodiek in’n Oosten, dat Noorderenn von Steenau in’n Süüdoosten, Steenau in’n Süden, de Steenauer Westersied in’n Süüdwesten, Suurlee in’n Westen un dat Helmworther Westerenn in’n Noordwesten.

Historie

In de Tied von’n Groten Noorschen Krieg (mit de Belagerung von Stood 1712) is in’n Harvst 1713 de Pest in Hadeln utbraken. In Mehmstood un Stroodiek sünd 250 Minschen doodbleven.

Verwaltungsgeschicht

De Oort hett vör 1852 to dat Kaspelsgericht Wester-Helmworth in dat Land Hadeln tohöört un denn von 1852 bet 1885 to dat Amt Oterndörp. Na 1885 weer dat in’n Kreis Hadeln. 1932 is dat Deel von’n Kreis Land Hadeln worrn un 1977 von’n Landkreis Cuxhoben.

De Oort hett bet to’n 1. Oktober 1937 to de Gemeen Wester-Helmworth tohöört, de sik denn mit Ooster-Helmworth to een Gemeen tohoopslaten hett.

Inwahnertall

Johr	Inwahners
1848-00-001848	514 Lüüd, 102 Hüüs
1871-12-011. Dezember 1871	590 Lüüd, 102 Hüüs
1885-12-011. Dezember 1885	548 Lüüd, 116 Hüüs

Religion

Mehmstood is evangeelsch-luthersch präägt un höört to dat Kaspel von de Wilhadi-Kark in Helmworth.

För de Kathoolschen is de Hillig-Krüüz-Kark in Oterndörp tostännig.

Kultur

Verenen

De Schüttenvereen Mehmstood is 1860 grünnt worrn. Nadem de Vereen 1938 mit’n Schüttenvereen Helmworth tohoopslaten worrn is, hett sik de Vereen 1950 wedder sülvstännig maakt.

Weertschop un Infrastruktur

För Mehmstood is de freewillige Füürwehr Helmworth mit tostännig.

Verkehr

Dör Mehmstood löppt de Landsstraat 117, de in’n Noorden över Helmworth na Neenkarken an de L 118 un wieder na Oterndörp geiht un in’n Süüdwesten över de Steenauer Westersied na Beers.

De nächste Autobahn is de Autobahn 27 (Afsnidd Cuxhoben–Bremerhoben). De Opfohrt 4 Niewohl liggt so 20 Kilometer in’n Süüdwesten von Mehmstood an de K 14.

De nächste Bahnhoff is so bi twölv Kilometer wied weg in’n Noorden de Bahnhoff Oterndörp an de Nedderelvbahn von Cuxhoben na Hamborg.

Scholen

De Kinner ut Mehmstood gaht na de Grundschool Helmworth. Ok fröher sünd se al jümmer in Helmworth na Volksschool gahn.