Martin Van Buren

Vun Wikipedia
(wiederwiest vun Martin van Buren)

Martin Van Buren (* 5. Dezember 1782 in Kinderhook (New York); † 24. Juli 1862 ok dor) weer de 8. Präsident vun de USA van 4. März 1837 bit 4. März 1841.

Martin van Buren

Van Buren weer de eerste Präsident, de nah de Ünnerteken van de Unafhängigkeetserkläärung boren wurrn is. He stamm ut en hollandschen Familie in de bövere Deel vun de Staat New York. He wurr Afkaat un keem in Kontakt mit Aaron Burr, ohn aber ünner de sein Infloot to geraden. As Afkaat hett he so völ verdeent, dat he sück nah 1800 üm Politik kümmern kunn. De politisch Laag nah de Spalten vun de Föderalistisch Partei weer nich ganz klor un so sloot he sück de Fraktschoon vun DeWitt Clinton an. 1812 wurr he Senator van de US-Bundsstaat New York un Lidmaat van Court for the Correction of Errors, wat domols de höchste Gerichtshoff in disse Staat weer.

1821 wurr he Lidmaat vun de Senat, wo he gau to en prominent Spreker vun de Demokraten wurr. In sein Positschoonen to enkelde Fragen weer he sück sülvst nich immer eenig, so dat sück dat af un an wedderspreken de. Dat hett man hüm vun de Gegnerschap ok geern vörsmeeten. In de Wahlen vun 1824 hett he William Harris Crawford ünnerstött, hett sück aber later henn Andrew Jackson anslooten, in den sien Regeeren he 1829 as Butenminister intreden is, nahdem he Vörtiet eenige Maanten as Gouverneur vun New York deent harr.

In Jacksons tweete Amtstiet, nahdem he sück mit John Caldwell Calhoun 1832 övertört harr, wurr van Buren Viezpräsident vun de USA, wiels he de politisch Linie van Jackson (so as in de Fraag nah en Natschonaalbank) ünnerstött harr. In de Fraag vun de Sklaveree kunn he sück nich recht entscheeden, sien Ansichten wesseln fakender.

Sien eegen Präsidentschapskandidatur, nahdem Jackson nich nochmol kandideeren kunn, weer eenersiets logisch, aber begeistert weern se van hüm nich. Martin van Buren weer för 152 Johr de letzte Viezpräsident, de direkt in’t Witt Huus wählt wurrn is (nah hüm hett dat eerst weer George Herbert Walker Bush in 1989 schafft). De Demokraten weern in Nahhinenn to de Tiet woll as korrupt antosehn un maken dat, wat man as Dübbelbodigkeet ansehn kunn. Wiels van Buren de Präsident weer, hett he disse Probleme verkörpert. Dorto keem 1837 noch een Weertschapskries. Enn’ van’t Leed weer, dat William Henry Harrison 1840 tegen hüm winnen kunn. van Buren’s Viezpräsident weer vun 1837 bit 1841 Richard Mentor Johnson.

Nahdem sück de Noord- un Süüdstaaten immer mehr in Wull kregen, beweg sück van Buren immer mehr to de nöördliche Positschoon. 1848 wurr he vu den Free Soil Party as Präsidentschopskandidat upstellt, de de Sklaveree in de nee erwurben Rebeeten verhinnern wull un an’n Ennen van sien Leven hett he Lincoln ünnerstött.

In de Film Amistad vun Steven Spielberg ut dat Johr 1997 wurr Martin van Buren vun Sir Nigel Hawthorne as unentslooten, dumm un licht to beinflooten Präsident dorstellt.

Weblenken[ännern | Bornkood ännern]

Martin van Buren. Mehr Biller, Videos oder Audiodateien to’t Thema gifft dat bi Wikimedia Commons.