Andrew Johnson

Andrew Johnson (* 29. Dezember 1808 in Raleigh, North Carolina; † 31. Juli 1875 in Carter Station, Tennessee) weer een US-amerikaansch Politiker un de 17. Präsident van de USA (1865-1869).

Johnson weer eegentlich Snieder van Beroop un is 1826 nah Tennessee trucken. In de 1830er Johren is he denn Börgermeester van de Stadt Greeneville wurrn. Siet 1835 weer he in dat Repräsentantenhuus van Tennessee wählt wurrn un 1853 to’n Gouverneur. Dat Amt harr he bit 1857. Dornah weer he vör de Demokraten in de US-Senat.

Johnson keem ut ganz eenfach Verhältnissen un weer kien Fründ van de rieken Pflanterfamilien ut de Süüden van dat Land. He weer dorüm ok de eenzige Senator ut de Süüden, de tegen de Afspaltung van de Süüdstaaten weer. In de Börgerkrieg weer he Militärgouverneur van sien Staat. 1864 hett he as Lincoln sien Viezpräsident kandideert. He weer Süüdstaatler, Demokrat un Unionist - beter kunn dat gar nich wesen. As Lincoln storven is, is he as Viezpräsident nahrückt. Dat weer dat darde Mal, dat so wat passeert is.

Sien Präsidentschop weer nich eenfach. He harr de Upgaav, de Süüdstaaten nah den Börgerkrieg weer uptoboen. Dat weer nich eenfach, vor allem, wiels sük de Politikers woll immer noch nicht good vedragen deen. Vööl van de Republikaners seggen, dat he to nahgiebig weer. Aber se wullen ok de Rechten van Präsidenten, de Lincoln, stark utwiet harr, weer torüchschruben. Dat gung denn so wiet, dat se hüm afsetten wullen. Dat weer dat eerste sogenannte Impeachment-Verfahren tegen een US-Präsident överhoopt. Se seegen denn ok, dat he Alkoholiker weer. Dat Repräsentantenhuus hett hüm denn ok afsett, aber de Senat nich, wenn ok blots mit een Stimm Mehrheit.

In sien Amtstiet hett he 1867 aber ok Alaska för 7,5 Million Dollar van de Russen afköfft. Weer wählt is he aber nich wurrn, wat hüm nich hinnern de, noch twee Mal, wenn ok ahn Spood, för de Kongress to kandideeren. Kört för sien Dood hett he dat 1875 aber doch noch schafft un is to’n US-Senator wählt wurrn.

Weblenken

Andrew Johnson. Mehr Biller, Videos oder Audiodateien to’t Thema gifft dat bi Wikimedia Commons.

Biographie up www.whitehouse.gov (up Engelsch)

Präsidenten vun de USA