Marcel Cardona

Marcel Porfirio Cardona Cervantes (* 1974 in Orange Walk) is en Avkaat un Politiker ut Belize (UDP).

Leven

Cardona is 1974 in Orange Walk boren. He hett Juristeree studeert. Toeerst an de University of the West Indies in Cave Hill (Barbados), de he 1997 mit en Bachelor of Law afslaten hett, un denn an de Norman Manley Law School in Mona (Jamaika), wo he in’n September 1999 dat Legal Education Certificate kregen hett. Cardona is an’n 25. November 1999 in Belize as Avkaat tolaten worrn un an’n 25. April 2000 tosätzlich as Notar. He hett toeerst as Jurist bi dat Ünnernehmen Carlisle Holdings Limited arbeidt un von 2003 bet 2004 as Avkaat un Notar in de Kanzlie Lois Young Barrow & Co. in Belize-Stadt. 2004 hett he sien egen Kanzlie Marcel Cardona Cervantes & Co. in Orange Walk apenmaakt.

Politik

Cardona is 2003 in de UDP intreden. He is an’n 25. März 2003 as Vertreder von de Oppositschoon in’n Senaat von Belize beropen worrn. In’n Oktober 2006 hett he dat Amt as Senater afgeven, üm sik as Kannedaat för de Parlamentswahl in Belize 2008 opstellen to laten. He weer bi düsse Wahl för de UDP Kannedaat in’n Wahlkreis Orange Walk Oost un hett de Wahl mit 53,63 % von de Stimmen gegen Marco Tulio Mendez von de PUP wunnen.

Dormit weer he von Februar 2008 bet März 2012 Afornten von dat Repräsentantenhuus von Belize. He weer in düsse Tied ünner Premierminister Dean Barrow von Februar 2008 bet to’n 10. März 2009 Minister för Junge Lüüd, Sport un Kultur. An’n 10. März 2009 is Elvin Penner sien Nafolger as Minister för Sport un Junge Lüüd worrn un Manuel Heredia as Minister för Kultur.

Nadem Cardona 2009 eerst sien Ministerposten verloren hett un denn 2010 ok nich mehr as Kannedaat von de UDP för de Wahl 2012 opstellt worrn is, hett he sik gegen sien Partei wennt. De Kritik an sien egen Partei hett dorto föhrt, dat he 2011 ut de UDP utslaten worrn is. He is bet an dat Enn von de Legislaturperiood Afornten bleven, weer in düsse Tied aver parteiloos.