Mairie Buxthu

De Mairie Buxthu weer in de Franzosentied (1810 bet 1813) een von de veer Mairien, in de de Kanton Buxthu indeelt weer. De Seet weer in Buxthu. Se harr 2217 Inwahners.

Historie

De Ümgegend von Buxthu hett vör de Franzosentied to de Stadt Buxthu un dat Amt Oold- un Neeklooster in dat Hartogdom Bremen höört. Blots de Lümbörger Schanz hett to de Huusvaagdie Mesborg von dat Amt Mesborg höört, wat in dat Förstendom Lümborg legen hett. Hartogdom Bremen un Förstendom Lümborg weren all beid Deel von dat Kurförstendom Hannover. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.

Binnen Westfalen weer de Mairie Buxthu een von de twee Mairien in’n Kanton Buxthu von’n Distrikt Horborg, Departement von de Nedderelv. Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Mairie Buxthu weer nu een von de veer Mairien in’n Kanton Buxthu, Distrikt Lümborg, Departement von de Elvmünnen. De Mairie is von de Grött meist glieks bleven, blots de Lümbörger Schanz is dor tokamen, de vörher to de Mairie Eindörp in’n Kanton Mesborg höört harr.

1813/1814 hebbt de Russen de Franzosen slahn un dat Rebeed befreet. Dat Kurförstendom Hannover is denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Kurförstendom dat Königriek Hannover worrn.

Öörd

Dor hebbt düsse Öörd tohöört:

• Königriek Westfalen:

  Buxthu, Brillenborg, Vagelsang, Neeland, Ooldklooster

• Kaiserriek Frankriek:

  Buxthu (1848 Inwahners), Brillenborg (6), Vagelsang (7), Neeland (131), Ooldklooster (216), Lümbörger Schanz (9)

Vondaag sünd düsse Öörd Deel von de Stadt Buxthu.