Halsbeek

Vun Wikipedia
Zur Navigation springen Zur Suche springen
Halsbeek
Laag Landkreis Veern
Stroomsystem Werser
Läng 9,3 km
Born in’n Süden von Holbm (op 45 m över NHN)
Münn bi Halsmöhlen in de Aller (op 10 m över NHN)
linke Blangenströöm Steenbeek
schippbor nee

De Halsbeek is en 9,3 Kilometer langen Beek, de von rechts in de Aller münnt.

De Born liggt in’n Süden von Holbm. Von dor flütt de Beek na Süüdwesten. De Bahnlien Veern–Rodenborg geiht över den Beek weg un kort later ok de Bahnlien Ülzen–Langwedel. De Halsbeek lett Wall op dat rechte Över liggen un flütt dör Scharnhors. Na Scharnhors hebbt fröher en Reeg Watermöhlen an’n Halsbeek legen: op düsse Watermöhlen gaht de Öörd Doomöhlen, Ulemöhlen, Neemöhlen un Halsmöhlen trügg. Twüschen Doomöhlen un Ulemöhlen geiht de Autobahn 27 mit en Brügg över den Beek weg un in Ulemöhlen de Kreisstraat 28. In Ulemöhlen münnt von links de Steenbeek in’n Halsbeek, de sien Born twüschen Scharnhors un Kerklinneln hett. In Neemöhlen geiht de K 28 noch en tweet Maal mit en Brügg över’n Beek. Bi Daulsen gaht ok de Bundsstraat 215, de Bahnlienen Veern–Rodenborg un Wunsdörp–Bremen un de K 27 mit Brüggen över’n Beek.

In Halsmöhlen liggt de Sassenhain an’t linke Över von’n Halsbeek. Tosätzlich liggt in Halsmöhlen ok dat Klärwark Veern, dat sien Water in’n Halsbeek afgifft. In de Neegd von Höltenwarder un güntsied Lüttjen Huttbargen münnt de Beek denn in de Aller. Dat Water flütt denn över Aller un Werser na de Noordsee.

Dat Water hett in’n böveren Loop de Watergöödklass II–III: kritisch belast un later de Watergöödklass II: mäßig belast.[1]

In’n Halsbeek sünd twee Oorden Waterkevers (Haliplus wehnckei un Hydroporus discretus) nawiest, de op de Rode List för dat neddersassische Deepland as „in Gefohr“ ansehn warrt.[2]

Footnoten[ännern | Bornkood ännern]

  1. Gewässergütekarte des NLWKN
  2. Wasserkörperdatenblatt Halsebach (Stand November 2012) op www.nlwkn.niedersachsen.de (pdf, 106 kB), afropen an’n 25. August 2015


Koordinaten:52° 56′ N, 9° 13′ O