Hainmöhlen

Wapen/Flagg	Koort
Basisdaten
Bundsland: Neddersassen Landkreis: Cuxhoben Gemeen: Geestland
Flach:	9,42 km²
Inwahners:
Postleettall:	27624
Vörwahl:	04708
Geograafsche Laag:	53° 35′ N, 8° 53′ O

Hainmöhlen (hoochdüütsch Hainmühlen) is en Dörp in de Gemeen Geestland in’n Landkreis Cuxhoben, Neddersassen. To Hainmöhlen höört ok de Oort Wisswohl un de Hoff Langel mit to.

Geografie

De Naveröörd sünd Lintig in’n Noorden, Meckelst in’n Noordoosten, Wisswohl in’n Oosten, Grotenhain, Lüttenhain un Langel in’n Süüdoosten, Köhlen in’n Süden, Ringst in’n Süüdwesten, Kührst in’n Westen un Alfst in’n Noordwesten.

Historie

De Watermöhl von Hainmöhlen kummt 1400 toeerst in de Oorkunnen vör. 1419 hett de Stadt Bremen ehr köfft. De Möhl in ehre hüdige Form is 1829 boot worrn un hett noch bet in de Midd von dat 20. Johrhunnert Koorn mahlt, toletzt aver mit en Elektromotoor. 1980 hett de Samtgemeen Beers de Möhl köfft un ehr as Museumsmöhl inricht.

Verwaltungsgeschicht

Siet 1. April 1971 weer Hainmöhlen Liddmaat von de eerste Samtgemeen Beers. An’n 1. März 1974 is mit de Gemeenreform in Neddersassen de Gemeen Hainmöhlen Deel von de Gemeen Ringst worrn un hett denn to de ne’e Samtgemeen Beers tohöört. Gemeen Ringst un Samtgemeen Beers sünd to’n 1. Januar 2015 oplööst worrn. Dat ganze Rebeed höört nu to de Gemeen Geestland. Binnen Geestland höört Hainmöhlen to de polietsche Oortschop Ringst.

Inwahnertall

Johr	Inwahners
1824-00-001824	9 Füürsteden
1848-00-001848	120 Lüüd, 18 Hüüs
1910-12-011. Dezember 1910	120
1925-00-001925	130
1933-00-001933	116
1939-00-001939	108

Religion

Hainmöhlen is evangeelsch-luthersch un evangeelsch-reformeert präägt un höört to dat Kaspel von de Simultankark St. Fabian in Ringst.

Wapen

Dat Wapen von Hainmöhlen wiest op en deelten Schild links op sülvern Grund in rood dat Rad von en Watermöhl un rechts op roden Grund en sülvern Fatt.

Kultur

In Wisswohl gifft dat en Jugendherberge.

Sport

Bi Hainmöhlen gifft dat den Golfplatz Goot Hainmöhlen mit 18 Löcker.

Weertschop un Infrastruktur

As freewillige Füürwehr is de Füürwehr Ringst för Hainmöhlen mit tostännig.

Verkehr

Hainmöhlen liggt an de Landsstraat 128, de in’n Noordwesten na Beers löppt un in’n Süden na Ringst un Köhlen. Na Noorden geiht von de L 128 de L 116 af, de na Lintig geiht.

De nächste Bahnhoff is so bi negen Kilometer wied weg in’n Süden de Bahnhoff Geestenseth an de Bahnlien Bremerhoben–Buxthu. Von 1896 bet 1968 hett dat ok Personenverkehr op de Bahnlien Bremerhoben–Beers geven. De Bahnhoff Beers leeg söven Kilometer in’n Noordwesten von’n Oort.