Gravity (2013)

Vun Wikipedia
Zur Navigation springen Zur Suche springen
Filmdaten
Plattdüütsch Titel:
Originaltitel: Gravity
Düütsch Titel: Gravity
Produkschoonsland: USA
Grootbritannien
Johr vun’t Rutkamen: 2013
Läng: 90 Minuten
Originalspraak: Engelsche Spraak
Öllersfreegaav in Düütschland: FSK 12
Filmkru
Speelbaas: Alfonso Cuarón
Dreihbook: Alfonso Cuarón,
Jonás Cuarón,
George Clooney
Produkschoon: David Heyman,
Alfonso Cuarón
Musik: Steven Price
Kamera: Emmanuel Lubezki
Snitt: Mark Sanger,
Alfonso Cuarón
Szenenbild: Andy Nicholson
Kledaasch: Jany Temime
Dorstellers

Gravity (op plattdüütsch översett: „Gravitatschoon“) is de Titel vun en britisch-US-amerikaansch Science-Fiction-Thriller ut dat Johr 2013, de as 3D-Film produzeert worrn is. Speelbaas weer Alfonso Cuarón, de Hööftrull weer mit Sandra Bullock besett. De Premiere vun den Film weer bi de Filmfestspelen vun Venedig 2013. In de Düütschen Kino lööp he dat glieke Johr an’n 3. Oktober an.

Inholt[ännern | Bornkood ännern]

De Mischoonsspezialistsche Dr. Ryan Stone is mit den beslagen Astronaut Matt Kowalski un dree annere Astronauten in en Space Shuttle in’n Weltruum ünnerwegens. Tosamen mit en Kolleeg maakt de beiden Reparaturarbeiten an’t Hubble-Teleskop, wat för Stone de eerste Buteninsatz is. Över Funk sünd se mit de Kommandozentrale vun de NASA verbunnen un warrt so wies, dat en russ’schen Satellit in’n Ümloop tonichten maakt worrn is un de Schören un Brookstücken nu ahn Kontroll in de Ümloopbahn drieven doot. Dordör warrt ok annere Satelliten drapen, wat dat Trümmerfeld vergröttert un dat Space Shuttle in eernste Gefohr bringt. Jemehr Misschoon schall foorts afbroken warrn, man dat is al to laat. Jemehr Kolleeg blifft doot, as he vun en Trümmerdeel drapen warrt, man ok dat Hubble-Teleskop un dat Space Shuttle warrt dör tallrieke Inslääg tonichten maakt.

Kowalski un Stone drievt alleen in’t Weltall vun jemehr Ruumschipp weg. Stone kriggt Panik, man Kowalski kann ehr över Funk wedder to Roh bringen un sik mit Hülp vun sien Düsenrucksack na ehr hen bewegen. Tosamen kamt se torüch na dat Space Shuttle, finnt dor den Rest vun de Kru aver doot vör. Gau stellt se fast, dat se mit dat Wrack nix mehr anfangen künnt. Kowalski beslutt dorüm, de Internatschonale Ruumstatschoon ISS antostüern un mit de Nootfallkapseln dor an Boord torüch dör de Atmosphäär op de Eer to kamen. Mit Hülp vun de Düsen vun Kowalski sien Ruumantog maakt se sik op’n Weg. Man, as de ISS in Sicht kummt, seht se, dat ok de vun de Trümmers drapen worrn is. Blots een Nootfallkapsel is torüchbleven, bi de aver de Bremsfallschirm utlööst worrn is.

De Driefstoff vun Kowalski sien Düsen is intwüschen opbruukt, so dat se mit hoge Snelligkeit gegen de Butenhüll vun de ISS klabastern doot un wedder torüchprallt. Stone verfangt sik in’n apenen Fallschirm un warrt so torüchhollen, man Kowalski warrt wieder vun de Statschoon wegreten. As sik de Fallschirm loostorieten drauht, beslutt Kowalski sien Verbinnen mit Stone to lösen, dat wenigstens se sik redden kann. He klinkt sik ut un drifft af, ahn dat Stone wat dorgegen doon kann. Se mutt sik dorophen in de ISS redden, vunwegen dat ehr Suurstoff to Enn geiht. Aver ok in de ISS kann se nich blieven: Dör den groten Schaden brickt en Füür ut un se mutt sik in de letzte Nootfallkapsel torüchtehn. Afflegen kann se aver nich, vunwegen dat de Fallschirmlienen sik noch an de Ruumstatschoon verfangen hebbt. Se stiggt wedder ut, üm de Lienen loos to maken.

In den Moment kummt dat Trümmerfeld wedder op ehr to, dat na 90 Minuuten eenmol üm de Eer kreist is. Dorna is de ISS vullstännig twei. Stone hett nu blots noch de Nootfallkapsel, de se mit Hülp vun de Stüerdüsen op en chinees’sche Ruumstatschoon utrichten deit. Dat Hööftdriefwark tünnert aver nich, so dat se nich na de Statschoon henkamen kann. Jümmer wedder versöcht se en Nootsignal to funken un kriggt opletzt sogor Kuntakt to en Minschen. De stellt sik aver as gröönlännschen Fischer rut, de ehr nich wieterhülpen kann. Langsam vertwievelt Stone un is dicht dorvör optogeven. Se dreiht den Suerstoff af un will sik so dat Leven nehmen, as op eenmol Kowalski an de Kapsel kloppen deiht. He sleiht vör, dat se mit de Bremsraketen vun de Kapsel na de chinees’sche Ruumstatschoon flegen schall un snackt ehr goot to. Se warrt sik doröver kloor, dat se sik dat Opduken vun Kowalski blots inbillt hett. Liekers faat se wedder Moot un maakt sik nu doran, de Bremsraketen ingangtosetten. So kummt se wohrhaftig bi de Ruumstatschoon an, de aver jüst so vun de Trümmers drapen worrn is. Dordör sackt se af un is unkontrolleert op’n Weg torüch in de Eerdatmosphäär.

In letzte Sekunn kann Stone de chinees’sche Nootfallkapsel vun de Statschoon lösen. Wiel de Statschoon in de Atmosphäär vergleiht, kann se mit de Nootfallkapsel kontrolleert in de Atmosphäär inpedden. De Bremsfallschirm lööst ut un se lannt opletzt seker in en See op de Eer. Een letzt mol kummt se in Gefohr, as dör de Hitt en Füer utbreken deit un se gau ut de Kapsel rut mutt. Water löpt rin un lett de Kapsel afsupen. Dat Gewicht vun den Ruumantog tütt Stone rünner, man se kann em rechttietig uttehn un opletzt an’t Över vun’n See swemmen.

Kritik[ännern | Bornkood ännern]

De eersten Reakschonen op den Film na sien Premiere bi de 70. Filmfestspelen vun Venedig weern dörweg goot. Sünners de Regie, de Dorstellers un de Trickeffekten weern loovt .[1]

  • Philipp Süßmann schreev op Filmjunkies.de, dat Cuarón mit Gravity Kino för’t 21. Johrhunnert maakt harr. Wiel sik de Rest vun Hollywood in infantile Jungs-Fantasien sölen deit un jümmer wedder dat Tonichtenmaken vun amerikaansche Grootstäder as ultimativen Blockbuster-Showdown verköpen will, wiest de Mexikaner, wat man mit de Warktüüch vun de modernen digitalen Effekten maken kann, wenn man dormit ümtogahn weet.[2]
  • Op Spiegel Online beteken David Kleingers den Film as grandios Science-Fiction-Drama, dat en bannig sinnlich Beleevnis weer un en Triumph för den Speelbaas un Co-Schriever Alfonso Cuarón. Cuarón zelebreer en oorsprüngliche Lust an’t Vertellen in beweegte Biller un verböög sik bito vigeliensch vör de Klassikers vun’t Genre. Mit Gravity präsenteer he een vun de spannensten un de Geföhlen an’n dullsten föddersten Filmen vun’t hele Johr.[3]
  • In de Süddeutsche Zeitung segg Fritz Göttler, dat Cuarón tosamen mit sien Kameramann Emmanuel Lubezki veereenhalf Johren lang töövt harr, bit de Technik so wiet weer, dat he sien Vision ut dat Weltall mit veel Reeknertechnik, Naprodukschoon un in 3D op de Lienwand bringen künn. De Dreiharbeiten weern de Höll, chaotisch un nich to bereken. Wat dorbi rutkeem, weer rein Kino. He beteken Gravity as en Film ahn sellschopskritische Ambitschonen un ahn ästhetischen Hyperdrive. En Meditatschooon, En Mobile.L’art pour l’art.[4]

Utteken[ännern | Bornkood ännern]

De Film weer utermatig spoodriek, wat sik ok in de bannig grote Tall vun Filmpriesen wiest. Gravity weer alltohopen för meist 250 Filmpriesen vörslahn (Stand: Juni 2014), dorünner alleen teihn mol för den Oscar. Uttekent weer he mit ruchweg 150 Priesen, dorünner:

Achtergrund[ännern | Bornkood ännern]

De Produkschoonsksoten vun den Film legen bi ruchweg 100 Millionen US-Dollar. Alleen an’t eerste Wekenenn hett de Film in de USA al 55,8 Millionen US-Dollar wedder inspeelt un weer op den eersten Platz vun de Kino-Charts. Weltwiet hett de Film över 700 Millionen US-Dollar inbröcht.[5]

To den Hööftfilm Gravity is noch de Kortfilm Aningaaq rutkamen, de vun den Söhn vun’n Speelbaas, Jonás Cuarón, dreiht worrn is. In den Kortfilm geiht dat üm den snaakschen Empfänger vun de SOS-Funkspröök vun Dr. Ryan Stone.

Cuarón meen sülvst, dat de Film nich jümmer wetenschopplich richtig weer, vunwegen dat he för’t Vertellen eenige Freeheiten bruukt hett.[6] Ofschoonst de Film för den Realismus vun de Bowarken in’t All un’t Inhollen vun physikaalsche Grundlagen loovt weer, gifft dat en Reeg vun Överdrieven un Saken, de nich akkerat sünd.[7] So seggt to’n Bispeel Dr. Stone, dat se vör ehrn Insatz blots söss Maanden lang traineert un wegen ehr sünnere Utbilln utwählt weer. So welke Lüüd warrt as Bruuklast-Spezialist betekent un warrt normalerwies nich dorför traineert, buten dat ruumschipp to arbeiten oder en Ruumschipp to lannen.[8]

An en annere Steed verfangt sik Stone mit ehrn Schoh in’n Fallschirm vun de Sojus un hollt Kowalski an en Reep fast. De Film wiest dat, as wenn Kowalski wieter vun Stone wegtogen warrt, wat aver in Wohrheit nich so is, as sik de beiden Astronauten al statschonär to de Sojus bewegt. Üm Kowalski wedder an de Sojus to trecken weer blots en lütten Ruck nödig wesen.

Un ok dat Stüern vun en MMU warrt in’n Film mit högere Snelligkeiten un gauere Richtwessel dorstellt, as dat in Wohrheit ünner de Massendraagheit mit de Reedschop mööglich weer. En MMU to stüern is bannig swoor, un dat duert lang, bit een an en Teel ankummt.[9] In’n Film dorgegen kreist Kowalski gau un licht twüschen de Butenelementen vun’t Space Shuttle un vun de Satelliten rüm.

Borns[ännern | Bornkood ännern]

  1. http://collider.com/gravity-reviews/
  2. Filmkritik op Filmjunkies.de; afropen an’n 18. Oktober 2013
  3. Weltall-Thriller „Gravity“: Der nächste Science-Fiction-Klassiker op Spiegel Online an’n 30. September 2013; afropen an’n 29. Oktober 2013
  4. Völlig losgelöst in de Süddeutsche Zeitung vun’n 2. Okotber 2013; afropen an’n 2. Oktober 2013
  5. Box Office Mojo: „Gravity“; afropen an’n 29. Juni 2014
  6. Gravity in: Space.com], afropen an’n 17. Oktober 2013
  7. What’s behind the science of 'Gravity'? in: CNN, 28. September 2013; afropen an’n 2. Oktober 2013
  8. An Astronaut Fact-checks Gravity, Gwynne Watkins in: Vulture; afropen an’n 12. Oktober 2013
  9. Artikel "The Manned Maneuvering Unit in Space" vun de NASA, afropen an’n 2. März 2014

Weblenken[ännern | Bornkood ännern]