Friedrich von der Decken (1802–1881)

Friedrich von der Decken (* 30. Januar 1802 in Bruunswiek; † 7. Januar 1881 in Holenwisch bi Wischhoben) weer en düütschen Aadligen un Politiker.

Von der Decken is 1802 as Söhn von Henriette Johanna, borene Wegener (10. September 1780-19. Januar 1841), un Ludwig von der Decken (4. März 1771–24. März 1812) in Bruunswiek boren.

He hett later an de Universität Göttingen Juristeree studeert un weer dor bi dat Corps Bremensia.

He hett an’n 12. September 1837 Auguste Amalia von der Beck (30. November 1810-31. August 1850) freet. De beiden hebbt tohoop den Söhn Otto Burchard Emil (22. November 1839-14. Oktober 1916) hatt. 1840 hett he dat Good Rutensteen bi Freeborg köfft, dat de Familie von siene Fro tohöört hett, un dor hebbt de beiden denn wahnt.

In twete Eh hett he an’n 15. Mai 1855 Ernestine Wilhelmine Auguste von Hodenberg (* 21. Februar 1818; Dochter von Wilhelm von Hodenberg) freet.

Na de Revolutschoon von 1848 is dat en Tied lang wat liberaler togahn in dat Königriek Hannover. Dat hett sik ünner König Georg V. (1851–1866) denn aver wedder ännert. In dissen Tosamenhang hett Friedrich von der Decken sik för de Rechten von’n Adel insett. Von 1851 bet 1852 weer he Finanzminister un von 1855 bet 1862 Justizminister in dat Königriek Hannover. Nadem dat Königriek Hannover 1867 Deel von Prüßen worrn is, is von der Decken 1868 in dat prüüßsche Herrenhuus beropen worrn, hett den Sitt aver nich innahmen.

Von der Decken weer Landraad för den 1. Zirkel von de Ridderschop von dat Hertogdom Bremen un von 1862 bet to sien Dood 1881 ok Präsident von de Ridderschop un Direkter von dat Klooster Niewohl.

Finanzministers von dat Königriek Hannover