Wilhelm von Hodenberg
Wilhelm Iwan August Benedict Freiherr von Hodenberg (* 7. Mai 1786 in Hameln; † 27. Juli 1861 in Celle) weer en hannöverschen Verwaltungsbeamten.
Von Hodenberg is 1786 as Söhn von Johanne Friederike Christiane, borene von Brummer (* 24. September 1762), un den Hauptmann Adolph Friedrich von Hodenberg (* 11. Februar 1755) in Hameln boren.[1] He güng von 1797 bet 1804 op de Pagenschool in Hannover na School, ut de 1798 dat Georgianum worrn is.[1] Von Michaelis 1804 bet Michaelis 1807 hett he Juristeree an de Universität Göttingen studeert.[1] He weer dor bi dat Corps Bremensia Göttingen.[2]
Na dat Studium is he 1808 Auditer bi dat Amt Deefholt worrn un dor bet to’n 4. August 1810 bleven, as he as Ünnerpräfektur-Sekretär na Celle gahn is.[1] An’n 17. Januar 1814 is he Drost supernumerär bi dat Amt Borgdörp worrn un keem an’n 3. April 1814 as Drost in dat Amt Ahlden.[1] Von dor is he an’n 5. April 1819 as Drost in dat Amt Sie’enborg versett worrn, an’n 1. Juni 1821 in dat Amt Leendaal un an’n 10. Dezember 1838 as Drost in dat Amt Horborg.[1] Dat is he bet 1843 bleven.[1] In dat Johr is he denn an’n 12. März Direkter von de Landschop von dat Förstendom Lümborg un Abt von dat Klooster St. Michaelis in Lümborg (1850 ophoven) worrn.[1] 1850 hett he dat Amt as Direkter von de Königliche Landweertschopssellschop in Celle kregen.[1]
An’n 9. Juli 1835 is he Landraad von de Ridderschop von dat Förstendom Lümborg worrn.[1]
Von 1818 bet 1832 weer he Liddmaat von de Twete Kamer (as Vertreder von de Stadt Borgdörp) un von 1831 bet 1848 von de Eerste Kamer von dat Königriek Hannover.[1] He weer dor von 1832 bet 1840 Generalsyndikus un von 1840 bet 1847 Präsident.[1]
Blangenbi weer he ok as Historiker aktiv un hett ole Oorkunnen sammelt un rutgeven.[1]
1835 hett Hodenberg dat Ridderkrüüz von’n Guelphenorden kregen, 1844 dat Kummandörkrüüz twete Klass von’n Guelphenorden un 1846 dat Kummandörkrüüz eerste Klass.[1] He hett an’n 18. April 1859 von König Georg V. ok dat Recht tostahn kregen, den Titel Freeherr to dregen,[1] un weer Arvherr op Hudemöhlen, Grethen un Stemmermöhlen.[1]
Von Hodenberg hett an’n 7. August 1814 in Celle Louise Caroline Johanne Elisabeth von Zesterfleth (18. Oktober 1794–14. Dezember 1827; Dochter von Christian Arnold von Zesterfleth) freet.[1] De beiden harrn de Kinner Adolphine (6. August 1815–8. August 1815), Juliane (6. August 1815–7. August 1815), Johanne Friederike Bertha (18. Februar 1817–7. April 1847), Ernestine Wilhelmine Auguste (* 21. Februar 1818; hett Friedrich von der Decken freet), Auguste Louise Helene Cäcilie Charlotte (2. März 1819), Friedrich Christian Karl Ludwig Hermann (20. November 1820–20. August 1842), Henriette Louise Ernestine Charlotte Friederike Adolphine (* 3. September 1824), Karl Johann Bodo (* 8. September 1826) un Louise (* 14. Dezember 1827).[1] He is 1861 doodbleven un an’n 30. Juli in de Familiengruft in Eickeloh begraven worrn.[1]
Warken[ännern | Bornkood ännern]
- Bremer Geschichtsquellen.
- Band 1: Das Stader Copiar. 1856.
- Band 2: Das Vörder Register. 1856. Digitalisat bi dat GDZ
- Band 3: Zevener Urkundenbuch. 1857.
- Verdener Geschichtsquellen. 1856.
- Calenberger Urkundenbuch.
- Band 3: Archiv des Stifts Loccum. 1858., Digitalisat bi dat GDZ
- Band 5: Archiv des Klosters Mariensee. 1858. Digitalisat beim GDZ Faksimile bi dat DRW
- Band 6: Archiv des Klosters Marienwerder. Faksimile bi dat DRW
- Band 7: Archiv des Klosters Wennigsen. Faksimile bi dat DRW
- Band 8: Archiv des Klosters Wülfinghausen. Faksimile bi dat DRW
- Band 9: Archiv des Klosters Wunstorf. Faksimile bi dat DRW