Dragonheart
| Filmdaten | |
|---|---|
| Plattdüütsch Titel: | — |
| Originaltitel: | Dragonheart |
| Düütsch Titel: | Dragonheart |
| Produkschoonsland: | USA, Grootbritannien, Slowakei |
| Johr vun’t Rutkamen: | 1996 |
| Läng: | 103 Minuten |
| Originalspraak: | Engelsch |
| Öllersfreegaav in Düütschland: | FSK 12 |
| Filmkru | |
| Speelbaas: | Rob Cohen |
| Dreihbook: | Charles Edward Pogue, Patrick Read Johnson |
| Produkschoon: | Raffaella De Laurentiis |
| Musik: | Randy Edelman |
| Kamera: | David Eggby |
| Snitt: | Peter Amundson |
| Dorstellers | |
| |
Dragonheart (op plattdüütsch so veel as Drakenhart) is de Titel vun en Fantasyfilm ut dat Johr 1996 vun den Speelbaas Rob Cohen un mit Dennis Quaid un David Thewlis in de Hööftrullen.
Inholt[ännern | Bornkood ännern]
Vörgeschicht[ännern | Bornkood ännern]
De Riddersmann Bowen bringt den Prinzen Einon bi, woans he mit en Sweert ümgahn mutt un lehrt em butendem de Dögen vun’t Ridderdom, de sik en en ollen Swoor utdrückt. Korte Tiet later föhrt de gresige König, en Tyrann, en Straafexpeditschoon gegen en Dörp un warrt vun de Ünnerdrückten in en Fall lockt. De opstännschen Buerslüüd haut em dood, un sien Söhn ritt de Kroon an sik, noch vördem de König dood is. En Deern vunvt Buernvolk stött mit Einon tohopen. Dorbi stört he un warrt gresig besehrt, vun wgen dat he mit sien Hart op en anspitzten Pool fallt.
Vördem de Jung starvt, warrt he vun sien Mudder, de Königshe Aislinn, de den Drakenkult anhangt, in en Drakenhöhl bröcht. Dor rett en Draken den Jungen dat Leven, as he em de Hälft vun sien Hart spennt. Dat aver maakt de Draken eerst, nadem Bowen em versekert hett, dat sien Schöler dööghaftig is.
Hööftgeschicht[ännern | Bornkood ännern]
Man Einon sleiht na sien Vadder un warrt en noch grötteren Tyrannen, as sien Vadder een wesen is. Bito wiest he en Gröttenwahn, den sien Volk to drägen hett, as vun de Lüüd mehr verlangt warrt, as en Minsch to doon instannen is. Bowen sütt dat un hett den Draken in Verdacht, dat de Einon behext hett un leggt en Swoor af, dat he den Draken an de Siet maken will.
Johren later reist de Mönk Gilbert vun Glockenspur in dat Königriek un dröpt op Bowen, de in de Twüschentiet sien Geld as Drakendoodmaker verdeent. Gilbert, de op de Söök is na Geschichten för en Heldenepos, slutt sik em an. He glöövt, dat he in Bowen sien Hööftfigur funnen hett, as he sütt, woans Bowen en Draken doodhaut.
Man, bi de nächsten Jagd op en Draken gifft dat en Problem: De Draken is sülvst för Bowen, de in de Twüschentiet veel Draken ümbröcht hett, en sworen Gegner. He kann em nich daalringen un keeneen kann den Kamp winnen. Dat kummt rut, dat disse Draken de letzte is, de noch leevt. Wiel se kämpt vertellt de beiden miteneen. Se eenigt sik dorop, dat se sik nich gegensietig üm de Eck bringen wülltun arbeit nu tosamen. De beiden sluut en Bund: Bowen dröff in Schaukämp gegen Drako winnen un dorför dat Geld instrieken, dat dat Volk för den doden Draken utloovt. Gilbert versöcht dorbi wieter sien Epos över Bowen un Drako to dichten, ahn dat he vun den Bund Wind kregen hett un ok nich dat Enn vun den Kamp sehn künn.
Na eenige Tiet dröpt Bowen op Kara, de Deern ut de Vörgeschicht, de intwüschen en feine Fro worrn is. Se versöcht Bowen dorto to bringen, gegen sien ehmoligen Schöler Einon en Opstand antofangen, wat de Ridder aver aflehnt. Na en wieteren Schaukamp, de opflüggt, flüügt Drako mit Bowen, Kara un Gilbert na Avalon. In’n Regen höört Bowen de Stimm vun König Artus, as se den ollen Swoor wedderholt, un sien ollen Idealen kamt em wedder in’n Sinn. Nu gifft Drako sik to kennen, dat he Einon inst dat Hart spennt hett, Sien Afsicht weer, dat olle Verspreken vun de Draken, dat se sik üm de Minschen kümmern wüllt, wedder neetomaken un wedder en Bund twüschen de Draken un de Minschen hertostellen. Dormit wull he na dien Dood in dat Steernbild vun’n Draken intehn, vun wegen dat den sien Steerns de Selen vun doodbleven Draken sünd. Dat aver geiht nu nich mehr, as Einon so böösordig is. As de Swoor an dat Graff vun Artus wedderholt worrn is, is Bowen nu praat, gegen Einon in den Krieg to tehn. He fangt nu an, Buerslüüd to Partisanen uttobilln, wobi Drako in de Achterhand psychisch un militäärsche Ünnerstütten dorstellt. He jaagt den König mitsams sien Strietmacht ut de Borg.
Invn folgen Striet künnt de Rebellen Einon döödlich besheren. Man he leevt wieter, wiel Drako swoor besehrt vun’n Himmel fallt un fangen sett warrt. Einon begrippt, dat sien Leven mit dat vun den Draken tosamenhangt un lett nu Lüüd op em in Fangenschop oppassen un an’t Leven hollen. He versprickt sik dorvun, nich starven to künnen. An’t Enn kann Bowen Einon ünnerkriegen. Doodmaken kann he em aver nich so lange Drako noch leevt. De Königsche versöcht Drako doodtomaken, warrt aver vörher vun Einon opspört un ümbröcht. Dorna versöcht Drako Bowen dorto to bringen, dat he em Doodmaken schall, so dat ok Einon un dat Böse mit em starven kann. De Ridder will dat aver bit to’n letzten Ogenblick, sien ne’en Fründ ümtobringen. Eerst in’n letzten Moment stött he to.
Dör sien Opper warrt Drakos Seel vör de Ogen vun Bowen, Kara un Gilbert in den Steernhimmel opnahmen un de Wunsch vun den Draken warrt dormit wohr.
Tweete Deel[ännern | Bornkood ännern]
Mit den Film Dragonheart: A New Beginning is 2000 en tweeten Deel rutbröcht worrn, bi den Doug Lefler Speelbaas weer. De Inholt vun dissen Film speelt eenige Johren na dat Enn vun dissen eersten Deel:
En Johr vör sien Dood finnt de olle Ridder Bowen in de Höhl vun Drako en Drakenei, dat he na en Klooster bringt. Twintig Johren later deckt de Stalljung Geoff (Christopher Masterson) den jungen Draken in de Ünnerirdischen Katakomben vun’t Klooster op. In dat faste Ansinnen, grote Aventüers to beleven will Geoff den jungen Draken (snackt vun Robby Benson, in de düütsche Faten vun Oli P.) betüdeln, mit em lostotehn. Dorbi hett de Draken överhaupt keen Ahnen, wat dat bedüüt, en Draken to wesen.
Kritik[ännern | Bornkood ännern]
Lexikon vun’n internatschonalen Film: „Ein stimmungsvoller Ritterfilm und zugleich die glückliche Wiederbelebung des Fantasy-Genres mit moderner Computeranimation und einer guten Portion Selbstironie.“[1]
Utteken[ännern | Bornkood ännern]
De Film weer för acht bedüden Filmpriesen nomineert, dorünner ok eenmol för den Oscar in de Kategorie Best Trickeffekten. Uttekent worrn is Dragonheart mit twee Priesen:
- 1997: mit den Saturn-Pries in de Kategorie Best Fantasy-Film
- 1997: mit den Hollywood Digital Award för Scott Squires
Anners wat[ännern | Bornkood ännern]
De Stimm vun Drako is in’t Original vun Sean Connery snackt worrn. Man nicht blots dat, ok Connery sien Gesichtstöög un Mimik sünd op den reekneranimeerten Draken överdragen worrn. In de düütschen Faten hett Mario Adorf de Stimm vun Drako synchroniseert.
Borns[ännern | Bornkood ännern]
Weblenken[ännern | Bornkood ännern]
- Dragonheart in de Internet Movie Database (engelsch)
- Kritiken to Dragonheart bi Rotten Tomatoes