Doasdörpermoor

Vun Wikipedia
Zur Navigation springen Zur Suche springen

Doasdörpermoor (hoochdüütsch Daerstorfermoor) weer en lütten Oort in de Gemeen Vosshusen in’n Landkreis Horborg, Neddersassen. Binnen de Gemeen höört dat Rebeed to de polietsche Oortschop Vosshusen.

Geografie[ännern | Bornkood ännern]

De Oort leeg in dat Randmoor von de Masch an de Elv, nich wied af von de Geestkant. Na Noorden to liggt Oolland. Dat Rebeed in’n Noorden is vondaag as Naturschuulrebeed Moor bi Buxthu schuult. Dat Water ut dat Rebeed warrt över Gravens na de Landwettern un de Moorwettern afföhrt.

De Naveröörd weren Nincoperdiek in’n Noorden, Neefeld in’n Noordoosten, Fischbeek in’n Oosten, Vosshusen in’n Süden, Wulmsdörpermoor in’n Süüdwesten un Öbergünnermoor un Rübk in’n Noordwesten.

Historie[ännern | Bornkood ännern]

Dat Moor un de Heid in’n Noorden von Wulmsdörp hebbt fröher as Buurmeen de Dörper Wulmsdörp, Ilsdörp un Doasdörp tohoop tohöört. De Hüüs in düt Rebeed hebbt den Oortsnaam Moor dragen. Eerst in dat 19. Johrhunnert is dat Land twüschen de Gemenen opdeelt worrn. Dat Rebeed, wat an Doasdörp gahn is, weer de Utgangspunkt von Doasdörpermoor.

In de twete Hälft von dat 19. Johrhunnert is de Oort denn bilütten to en lüttje Siedlung ranwussen.

As 1880/1881 de Nedderelvbahn boot worrn is, is de Trass dör dat Moor leggt worrn. Twüschen Buxthu un Fischbeek hett dat toeerst keen Bahnhoff geven. Eerst as later de Inwahnertallen von de Öörd wussen weren, is 1905 in Doasdörpermoor en Bahnhoff anleggt worrn, de Bahnhoff Doasdörp heten hett.

Vondaag warrt Doasdörpermoor nich mehr as egen Oort wohrnahmen. Dat is nu Deel von Vosshusen.

Verwaltungsgeschicht[ännern | Bornkood ännern]

De Oort hett vör 1859 to de Huusvaagdie Mesborg von dat Amt Mesborg tohöört. Von 1859 bet 1885 weer dat in dat Amt Töst un von 1885 bet 1932 in’n Kreis Horborg. 1932 is dat Deel von’n ne’en un grötteren Kreis Horborg worrn.

Doasdörpermoor hett fröher jümmer to de Gemeen Doasdörp mit tohöört. An’n 1. Januar 1970 is Doasdörp Deel von de Gemeen Vosshusen worrn. De Naam von’n Bahnhoff hett sik dorbi op Bahnhoff Vosshusen ännert.

Inwahnertall[ännern | Bornkood ännern]

Johr Inwahners
1885-12-011. Dezember 1885[1] 17 Lüüd. 3 Hüüs
1905-12-011. Dezember 1905[2] 30 Lüüd. 6 Hüüs

Religion[ännern | Bornkood ännern]

Doasdörpermoor weer evangeelsch-luthersch präägt un hett to dat Kaspel von de Nicolai-Kark in Ilsdörp höört. Siet 1958 höört dat Rebeed to de Karkengemeen von de Luther-Kark in Vosshusen.

Footnoten[ännern | Bornkood ännern]

  1. Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 143
  2. Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 75


Koordinaten:53° 28′ N, 9° 47′ O