Beverspinnen

Vun Wikipedia
Zur Navigation springen Zur Suche springen
Beverspinnen
Beverspinn(e)
Systematik
Domään: Eukaryota

ahn Rang: Veelzellers (Metazoa)
Afdeel: Geweevdeerter (Eumetazoa)
Ünnerafdeel: Tweesiedendeerter (Bilateria)

ahn Rang: Ehrdermünner (Protostomia)
Böverstamm: Huututtreckers (Ecdysozoa)
Stamm: Liddfööt (Arthopoda)
Ünnerstamm: Keevklauendregers (Chelicerata)
Klass: Spinnen (Arachnida)
Ornen: Weevspinnen (Araneae)
Ünnerornen: Echte Weevspinnen (Araneomorphae)
Familie: Beverspinnen (Pholcidae)
Wetenschoplich Naam
Pholcidae
C. L. Koch, 1851
Portrait vun en Beverspinne

Beverspinnen (Pholcidae) sünd en Familie mank de Echten Weevspinnen. Dor höört 80 Geslechter mit 1.506 Aarden to (Stand: Juni 2016). Vunwegen, datt se de Schoosters (Opiliones) liek sehn doot, sunnerlich, wat de langen Been angeiht, weert se faken mit jem dör’nanner brocht.

Wo se vorkaamt un wat for Geslechter dat in Europa gifft[ännern | Bornkood ännern]

Beverspinnen kaamt meist in de ganze Welt vor, de meisten Aarden leevt avers in de Wolden in de Tropen un Subtropen.[1] Bovenhen gifft dat en Reeg vun Beverspinnen, de leevt in Höhlen un up Felsen. In Düütschland, Öösterriek un de Swiez sünd bitherto veer Geslechter mit fiev Aarden funnen wurrn, man dat is swaar to seggen, wo akraat se vorkamen doot. In de annern Biome dor umto gifft dat veel mehr Aarden. De Aarden mank de Beverspinnen, de in Länner mit düütsche Spraak tohuse sünd, sünd inwannert ut de ööstlichen Gemarken vun de Middellannsche See. In de Gegenden an de Küsten vun Europa fehlt se meist ganz. In Belgien leevt an ehre Steed Aarden ut de (Sub-) Tropen un in West- un Süüdeuropa weert se aflööst vun Aarden ut de westlichen Gemarken vun de Middellannsche See. Mank de Beverspinnen könnt de Aarden un Geslechter ut’neen holen un bestimmt weern an de Aart, wie de Ogen staht. Düsse Geslechter kaamt in Europa vor:

Kennteken[ännern | Bornkood ännern]

Dat hannelt sik um bannig lüttje bit hen to middelgrote Spinnen (bit hen to ca. 10 mm) mit sunnerlich lange un fiene Been (bit hen to 50 mm). Vun’e Farv sünd se meist grau oder geel un fallt nich wieter up. Towielen gifft dat ok mol dunkere Teeknungen, man meist wiest se in’e Farven keen Unnerscheed.

Beverspinnen weevt Ruumnetten, de wat unregelmatig un diffuus sünd. Se dehnt sik na Längde, Breede un Hööchde dreedimensional ut un könnt bannig groot ween. Dor könnt sik de Spinnen leifig in bewegen. Mit Hölp vun düsse Netten könnt se ok Deerter unnerkriegen, de veel grötter sünd, as se sülms. De Siede vun de Beverspinnen is to’n groten Deel dröge un free vun Liem. Se kann unbannig wiet ut’neen trocken weern un is upkrüselt, as Wull. So kann de Büte sik meist nich free maken. Wenn se utbüxen will, verheddert se sik bloß noch mehr in dat Gaarn. An dat Ntt warrt jummerlos wieterboot. Dat kann ok passeern, datt en Nett in dat Nett vun en annere Spinne overgeiht, as bi de Grote Beverspinne, de in Middeleuropa meist bloß in Hüser un Bowarke antodrepen is. Beverspinnen sünd tomeist in’e Nacht togange. Dat Geslecht Pholcus hett de Eegenaard, bi Gefohr in’t Nett to bevern. Dor hett de Spinne ehren Naam vun weg. Man nich all Aarden maakt dat so un faken sünd dat ok bloß man de jungen Deerter, de bevert. Düt „Bevern“ is en gau Hen- un Herswingen, wo de Konturen vun de Spinne mit undüütlich maakt weert. Angiepers weert dor dör’nanner mit brocht.

Systematik[ännern | Bornkood ännern]

De World Spider Catalog hett in’n Momang 80 Geslechter mit 1.506 Aarden vun beverspinnen up siene Liste (Stand: Juni 2016):

Galerie[ännern | Bornkood ännern]

Literatur[ännern | Bornkood ännern]

  • Stefan Heimer, Wolfgang Nentwig: Spinnen Mitteleuropas. Paul Parey, Berlin 1991, ISBN 3-489-53534-0.
  • Rainer F. Foelix: Biologie der Spinnen. Thieme, Stuttgart 1979, ISBN 3-13-575801-X.
  • Dick Jones: Der Kosmos-Spinnenführer. Franckh'sche Verlagsbuchhandlung, Stuttgart 1980, ISBN 3-440-06141-8.

Belege[ännern | Bornkood ännern]

  1. Tropisch-Afrikanische Zitterspinnen, Projekt vun dat Museum Koenig (ZFMK); afropen an‘n 6. Juni 2016

Weblenken[ännern | Bornkood ännern]

Commons-logo.svg Beverspinnen. Mehr Biller, Videos oder Audiodateien to’t Thema gifft dat bi Wikimedia Commons.