Schoosters (Spinnen)

Vun Wikipedia
Schoosters; Snieders; Langbeent Spinnen
Schooster
Systematik
Domään: Eukaryota

ahn Rang: Veelzellers (Metazoa)
Afdeel: Geweevdeerter (Eumetazoa)
Ünnerafdeel: Tweesiedendeerter (Bilateria)

ahn Rang: Ehrdermünner (Protostomia)
Böverstamm: Huututtreckers (Ecdysozoa)
Stamm: Liddfööt (Arthopoda)
Ünnerstamm: Keevklauendregers (Chelicerata)
Klass: Spinnen (Arachnida)
Ornen: Schoosters (Opiliones)
Wetenschoplich Naam
Opiliones
Sundevall, 1833

De Schoosters (Opiliones), ok Snieders, langbeent Spinnen un Weverspinnen nömmt, um Basbeek umto ok woll Basbeekers, sünd en Ornen mank de Spinnen (Arachnida). Up de ganze Welt gifft dat bi 6.600 Aarden. Ehr Lief is twuschen 2 un 22 Millimeters lang. Dat gift Aarden, de laat as Mieten, man ok de bekannten langbeenten Aarden höört dorto. De gröttsten Schoosters sünd Trogulus torosus (Familie: Trogulidae) mit en Längde vun 22 mm over’t Lief, un Mitobates stygnoides mit man bloß 6 Millimeters Längde over’t Lief, man mit 160 mm lange Been. In Middeleuropa gifft dat en Reeg vun Aarden, de sünd tominnst regional in Gefohr, uttostarven. Sunnerlich mit de Grote Beverspinne weert de Schoosters, vunwegen de langen dünnen Been, faken dör’nanner brocht. Man vun all Weevspinnen verscheelt se sik sunnerlich dorin, datt Vör- un Achterlief tosamenwussen sünd. Dat Achterlief is dor in allerhand Le‘e bi updeelt. Schoosters hefft keen Spinndrüsen un ok keen Giftdrüsen an sik, man bi jem is en Stinkdrüüs utbillt, wo se normolerwiese giftige Substanzen mit afgeven könnt. Gegen de Weevspinnen over hefft se en Penis un dor en echt Geslechtsorgan mit.

Bi all Schoosters gifft dat Stinkdrüsen. Ehre Göter sünd meist vörn an’n Ruggen, man nich bi all Aarden. Dat Sekret warrt afgeven, wenn dat Lief stärker drückt warrt, oder wenn Spinnen oder Insekten den Schooster angriept. Dat Sekret is fletig oder lööst sik gau in Luft up. Meist stinkt dat un, je nadem, wie dat kunzentreert is, kann dat benusseln oder dootmaken. Wenn Phalangiidae in en Fatt inslaten weert, benusselt se sik dör ehr egen Sekret.

Wie de Schoosters leven doot[ännern | Bornkood ännern]

Schooster mit Nymphen vun Watermieten, de dor as Parasiten an sitten doot

Schoosters leevt meist up’n Grund an’e Eer. Se boot keen Fangnetten, man freet sunnerlich luerlüttje Liddfööt un ok dode Insekten. Up’n Grund graast se in Loofwolden, Goorns, Wischen, Hegen un naturhaftige Parks mit ehre Mundwarktüge Plantendeele af, de afsturven sünd un wo luerlüttje Deerter up sitten doot, de bloß unner dat Mikroskop to sehn sünd un de dor for sorgt, datt de Plantendeele ut’neen fallt.

Wie se sik vermehrt[ännern | Bornkood ännern]

Bi de Schoosters warrt dat Sperma direktemang wietergeven. Dor staht sik Heken un Seken mit dat Vörlief bi gegenover un dat Heken föhrt sien Geslechtsdeel dör dat Seken siene Keevklauen dör in den Genitalruum vun dat Seken. De Eier leggt dat Seken in lüttje Löcker un Spleten an’n Grund. Dat gifft Aarden mank de Gonyleptidae in Süüdamerika, dor is al upfallen, datt se ehre Jungen pleegt. Dat Heken boot dor en Nest un passt de Eier un de Jungen up.

Systematik vun de Schoosters[ännern | Bornkood ännern]

Wo de Schoosters binnen de Spinnen akraat staht, is bitherto noch nich kloor. De aktuelle Stand is angeven bi Kury (2003).[1]

Belege[ännern | Bornkood ännern]

  1. Adriano B. Kury: Checklist of Valid Genera of Opiliones of the World. 2003.

Literatur[ännern | Bornkood ännern]

Kiek ok bi[ännern | Bornkood ännern]

  • Beverspinnen (Pholcidae). Se weert faken mit de Schoosters dör’nanner smeten.

Weblenken[ännern | Bornkood ännern]

Schoosters . Mehr Biller, Videos oder Audiodateien to’t Thema gifft dat bi Wikimedia Commons.