An American Werewolf in London

Filmdaten
Plattdüütsch Titel:	—
Originaltitel:	An American Werewolf in London
Düütsch Titel:	American Werewolf
Produkschoonsland:	USA, Vereenigt Königriek vun Grootbritannien un Noordirland
Johr vun’t Rutkamen:	1981
Läng:	93 Minuten
Originalspraak:	Engelsch
Öllersfreegaav in Düütschland:	FSK 16
Filmkru
Speelbaas:	John Landis
Dreihbook:	John Landis
Produkschoon:	George Folsey Jr.
Musik:	Elmer Bernstein
Kamera:	Robert Paynter
Snitt:	Malcolm Campbell
Kledaasch:	Deborah Nadoolman
Dorstellers
	David Naughton: David Kessler; Griffin Dunne: Jack Goodman; Jenny Agutter: Alex Price; Anne-Marie Davies: Susan Gallagher; John Woodvine: Dr. J. S. Hirsch; Brian Glover: Schachspeler; Don McKillop: Inspector Villiers; Paul Kember: Sergeant McManus; Michael Carter: Gerald Bringsley; Geoffrey Burridge: Harry Berman; Brenda Cavendish: Judith Browns;

An American Werewolf in London (op Platt so veel as „En amerikaansch Warwulf in London“; dt.: American Werewolf) is de Titel vun en Horror-Speelfilm ut dat Johr 1981. John Landis weer Speelbaas und Dreihbookschriever. In de Hööftrullen weren David Naughton un Jenny Agutter to sehn. De Film wiest gresige Szenen, man bi all dem is he ok jümmer mit en beten swarten Humor praat.

Inholt

De beiden amerikaanschen Studenten David un Jack maakt en Reis dör Europa. In’t engelsche Hoochmoor kamt se in dat eensam legene Dörp East Procter. De Inwahners höödt apenbor en Geheemnis. As de Nacht togang kummt, kehrt se in’n Dörpskroog „To’t slachte Lamm“ in un deckt dor an de Wand en Pentagramm op. As se dorna fraagt, reageert de Inheemschen verargert un jaagt jem wedder in de Nacht rut, man nich ahn den Henwies, op de Straat to blieben, sik vun dat Moor feern to hollen un sik vör den Maand to höden

Is klor, dat de beiden bi’n Klönsnacken vun’n Weg afkamt un sik bi Vullmaand in’t Moor verlopen doot. Dor warrt se vun en Warwulf angrepen. Jack warrt uteneenreten un starvt, man David överleeft de Attacke licht verletzt, wiel de Inwahners dat mit dat Geweten kriegt un mit Schöötwapen achterran kamen sünd un denn Warwulf verjaagt. David warrt bewusstlos un waakt in en Krankenhuus in London wedder op. He hett gresige Alpdrööm, in de sien doden Fründ Jack em warnt, dat he nu ok en Warwulf is un he sik ümbringen müss, bevör he Schaden anrichten deit.

Nümms glöövt em de Geschicht. David fründt sik mit de Krankensüster Alex an un beid verleeft sik. As wedder Vullmaand is, wannelt sik David in en Warwulf un bringt in de Londoner Binnenstadt söss Lüüd üm. Dör dat, wat David seggt, warrt de behannelnde Dokter Hirsch argdenkern un stellt egen Naforschen in dat Dörp East Procter an. Ut en Inheemschen kriggt he rut, dat David in Gefahr is. Un ok David sülvst markt langsom, dat he de Minschen ümbrocht hett, vun de he in en Daagblatt lesen deit. Kopplos löpt he in de Londoner Innenstadt. Sien Fründin Alex versöcht tohopen mit Dr. Hirsch, em wedder to finnen.

Jack, de in de Twüschentiet to en Undoden worrn is, duukt wedder op un föhrt David in en Pornokino an’n Piccadilly Circus. dor wiest he em sien Oppers vun de letzten Nacht, de nu ok undood worrn sünd un em ok seggt, dat he sik ümbringen mutt. Twüschendör is Nacht worrn un de Vullmaand steiht wedder an’n Himmel. David wannelt sik noch mol wedder in en Warwulf un bringt toeerst in dat Kino un denn op’n Piccadilly Circus noch mehr Lüüd üm. Vun de Polizei, de dorto kummt, warrt he an’n End in en Sackstraat ümstellt. Alex versocht to em to kamen un hofft, mit ehr Leev David redden to künnen, man he grippt ehr liekers an un warrt dorophen vun Scharpschütten vun de Polizei doodschaten.

Utteken

De Film 1982 is mit drei Filmpriesen uttekent worrn un weer för wietere twee nomineert:

de Oscar in de Kategorie Best Make-up för Rick Baker.
de Saturn Award in de Kategorie Best Horrorfilm.
de Saturn Award in de Kategorie Best Make-up för Rick Baker.
de Saturn Award (nomineert) in de Kategorie Beste Dorstellerin för Jenny Agutter.
de Saturn Award (nomineert) in de Kategorie Best Dreihbook för John Landis.

Kritiken

Lexikon vun’n internatschonalen Film: Die geschickte Mischung aus schwarzem Humor und Horroreffekten, die beständig die Grenzen zwischen Traum und Wirklichkeit verwischt, versteht es, das klassische Werwolf-Motiv in die Gegenwart zu übertragen. Vergnügliche Anspielungen auf versteckte Gewalttätigkeiten im modernen Alltag, die englische Lebensweise und die Medien werden im zweiten Teil von der zunehmend lautstarken Inszenierung überdeckt.

DVD Headquarters: Effektiver Mix aus Gänsehaut und schwarzem Humor. Unbedingt bei Vollmond gucken.

OFDd: Der „Shaun of the Dead“ der 80er. Wahnsinnig gut, immens kultig und absolut bissfest!

Anners wat

In’n Februar 2007 hett Universal Pictures Germany en ne’e DVD-Editschoon rutbrocht vun den Film mit en Reeg vun tosätzlich Material.
De Film hett en tweeten Deel, de 1996 ünner den Titel „An American Werewolf in Paris“ rutkamen is. Man mit den Film harr John Landis nix to doon.
In en Szeen warrt wiest, woans sik David in den Warwulf verwannelt. De Tricktechnik is later ok bi dat Musikvideo to dat Leed Thriller vun Michael Jackson brukkt worrn.

Weblenk

An American Werewolf in London in de Internet Movie Database (engelsch)