Michael Jackson (Singer)

Disse Artikel is man blots en Stubben. Du kannst Wikipedia helpen un em verbetern.

Jackson in dat Johr 1984

Michael Joseph Jackson (* 29. August 1958 in Gary, Indiana; † 25. Juni 2009 in Westwood (Los Angeles), Kalifornien) weer en US-amerikaansch Popsinger, Komponist, Danzer un Entertainer. Taxeert warrt, datt he um un bi 750 Millionen Toondrägers verköfft hett Dor is he en vun de Musikers mit, de in de Geschicht vun de Popmusik an'n meisten Geld verdeent hett. Sien Binaam is King of Pop. 1982 hett he dat Album Thriller rutbröcht, wat bi up den hüdigen Dag up de ganze Welt an’n meisten verköfft wurrn is. Goot lopen sünd ok siene Alben Off the Wall (1979), Bad (1987), Dangerous (1991), HIStory (1995) un Invincible (2001).

Leven

Michael Jackson is tagen un boren in de Stadt Gary in den US-Bundsstaat Indiana, wat en Industriewiek un en Vörstadt vun Chicago is. Bi em tohuse weern se mit negen Göörn, wo Michael de sevente vun ween is. Siene Mudder weer bi Jehova siene Tügen. Sien Vadder hett em piesackt an Lief un Seel, dor hett he sik den Rest vun sien Leven nich wedder vun verhaalt. Al as en Kind hett he bi de Band The Jackson Five mitmaakt, de in de 1970er Johren goot ankamen weer. Dor stünn he mit unner Verdrag bi Motown. As Teenager hett he al 1971 en Solokarriere anfungen. De 1980er Johren weern siene Topptied. Thriller is meist 108 Millionen mol verköfft wurrn. Ok dat Album Bad weer allerwegens in de Welt en groten Erfolg.

Later, as dat mit siene Popularität bargdal güng, is jummers mehr dor up keken wurrn, wie he sik upföhrt hett, u. a. mit sien Operatschonen vunwegen de Schöönheit. Dor hett he den Ökelnaam Wacko Jacko vun weg kregen. Vun 1993 af an is Jackson jummers fökener in de Narichten updükert in Tosamenhang mit unanstännig Benehmen gegen lüttje Jungs över. He is avers för nich schullig holen wurrn un ok nich verordeelt wurrn.

Siet 2006 weer he togange mit en Comeback-Album. Dor hett he för tosamenarbeit' u. a. mit Akon, Chris Brown un 50 Cent. Vun dat Album sünd al verscheden Nummern vun klaar ween, man de CD hett he nich mehr sehn.

Dood

An’n 5. Märt 2009 hett Jackson kunnig maakt, dat he in’n Juli vun düt Johr in London en Reeg vun Kunzerten geven wull. De schollen den Naam This is it hebben. De Kunzerten schollen in de O₂-Arena in London ween un an’n 8. Juli scholl dat losgahn.

Michael Jackson is denn avers an’n Dunnersdag, 25. Juni 2009 in dat Sükenhuus in Los Angeles inlevert wurrn. Dor hett he al in Koma legen, nadem he vördem in siene Wahnung en Hartstillstand kregen harr. Twee Stunnen, nadem he in dat Ronald Reagan UCLA Medical Centre kamen weer, is de Dood faststellt wurrn. Wo dat akraat an legen hett, dor is lang över spikeleert wurrn. An’n 24. August 2009 hett Lakshmanan Sathyavagiswaran, de Dokter, de de Autopsie an Jackson siene Lieke vörnahmen hett, offiziell fast stellt, dat de Hartstillstand dör en Överdosis Propofol tostanne kamen is. Jackson sien Privatdokter Conrad Murray steiht nu unner den Verdacht vun Doodslag, vunwegen dat he Jackson düsse Överdosis geven hebben schall.

De Fier to sien Gräffnis hett an’n 7. Juli in Los Angeles stattfunnen un is in de ganze Welt in’t Feernsehn utstrahlt wurrn.

Weblenken

Michael Jackson. Mehr Biller, Videos oder Audiodateien to’t Thema gifft dat bi Wikimedia Commons.