Aitne (Maand)

Vun Wikipedia

Aitne (ok Jupiter XXXI) is en vun de lütten buteren Maanden vun’n Planet Jupiter. Opdeckt weer de Maand an’n 9. Dezember 2001, neemlich vun en Koppel US-amerikaansche Astronomen vun de University of Hawaii ünner dat Regeer vun Scott S. Sheppard. Nöömt is de Maand na de Göddin Aitne, de in de greekschen Mythologie dat Sinbild för de Bargens is. De vörlöpige Beteken vun den Maand weer toeerst S/2001 J 11.

Ümloopbahn[ännern | Bornkood ännern]

Aitne löpt op en Ümloopbahn in en middleren Afstand vun 23.299.000 km vun’n Planeten. För een Ümloop bruukt se üm un bi 730 Daag, 4 Stünnen un 19 Minuuten. De Bahn hett en grote Exzentrizität vun 0,264 un is üm 165,091 ° gegen den Äquater vun’n Jupiter neegt. De Bewegen vun den Maand is dormit retrograd, dat heet, dat sik Aitne gegen den de Richt vun de Rotatschoon vun den Jupiter bewegen deit. De physikaalsch Egenschoppen vun de Bahn is liek as en poor annere Maandbahnen ok. Disse Maanden warrt dorüm tohopenfaat to de Carme-Grupp, nöömt na den gröttsten Maand ut de Grupp.

Egenschoppen[ännern | Bornkood ännern]

Aitne hett en middleren Dörmeter vun üm un bi 3 km un tellt dormit to de ganz lütten Maanden. De Böverflach vun den Maand wiest en Albedo vun blots 0,04 op – dat heet, dat blots 4 % vun dat infallend Licht wedder torüchstrahlt warrt. Dorüm is de Maand ok bannig düster. De Dicht warrt op ruchweg 2,6 g/cm³ schätzt. Dorut warrt vermodt, dat Aitne vör allen ut Silikat-Steen opboot is. Ok dor is de Maand liek de annern ut de Carme-Grupp un de meisten annern Gruppen.