Cyllene (Maand)

Cyllene (ok Jupiter XLVIII) is en vun de lütten buteren Maanden vun’n Planet Jupiter. De is an’n 8. Februar 2003 opdeckt worrn vun en Koppel US-amerikaansche Astronomen vun de University of Hawaii ünner dat Regeer vun Scott S. Sheppard. Nöömt is de Maand na de mytholoogsch Nymph Kyllene. De vörlöpige Beteken vun den Maand weer toeerst S/2003 J 13, an’n 30. März 2005 hett he sien hüütigen offiziellen Naam kregen.

Ümloopbahn

Cyllene kreist op en Ümloopbahn mit en middleren Afstand vun 24.349.000 km üm den Planeten. Dorför bruukt he üm un bi 737 Daag, 19 Stünnen un 12 Minuuten. De Bahn hett en teemlich grote Exzentrizität vun 0,319 un is üm 149,3 ° gegen den Äquater vun’n Jupiter kippt. De Bewegen vun den Maand is dormit retrograd, dat heet, dat sik de Maand gegen den de Richt vun de Rotatschoon vun den Jupiter bewegen deit. De physikaalsch Egenschoppen vun de Bahn is liek as en poor annere Maandbahnen ok. Disse Maanden warrt dorüm tohopenfaat to de Pasiphae-Grupp, nöömt na den gröttsten Maand ut de Grupp.

Egenschoppen

De Maand hett en middleren Dörmeter vun jüst mol 2 km un tellt dormit to de ganz lütten Maanden. De Böverflach vun Cyllene wiest en Albedo vun blots 0,04 op – dat heet, dat blots 4 % vun dat infallend Licht wedder torüchstrahlt warrt. Dorüm is de Maand ok bannig düster. De Dicht warrt op ruchweg 2,6 g/cm³ schätzt. Dorut warrt vermodt, dat Cyllene vör allen ut Silikat-Steen opboot is. Ok dor is de Maand liek de annern ut de Pasiphae-Grupp.

Bornen

Maanden vun den Planeten Jupiter

Ahn Naam: S/2003 J 2 | S/2003 J 4 | S/2003 J 9 | S/2003 J 10 | S/2003 J 12 | S/2003 J 16 | S/2003 J 18 | S/2003 J 19 | S/2003 J 23 | S/2010 J 1 | S/2010 J 2 | S/2011 J 1 | S/2011 J 2 | S/2016 J 1 | S/2017 J 1 | S/2017 J 2 | S/2017 J 3 | S/2017 J 5 | S/2017 J 6 | S/2017 J 7 | S/2017 J 8 | S/2017 J 9

Kiek ok na bi: List von de Jupiter-Maanden