The Getaway (1972)

Vun Wikipedia
Filmdaten
Plattdüütsch Titel:
Originaltitel: The Getaway
Düütsch Titel: Getaway
Produkschoonsland: USA
Johr vun’t Rutkamen: 1972
Läng: 118 Minuten
Originalspraak: Engelsch
Öllersfreegaav in Düütschland: FSK 18/16
Filmkru
Speelbaas: Sam Peckinpah
Dreihbook: Walter Hill
Produkschoon: David Foster
Musik: Quincy Jones
Kamera: Lucien Ballard
Snitt: Robert L. Wolfe
Szenenbild: George R. Nelson
Kledaasch: Ray Summers
Dorstellers

The Getaway (op plattdüütsch so veel as „De Flucht“; dt. Titel: Getaway) si en US-amerikaanschen Thriller ut dat Johr 1972 vun den Speelbaas Sam Peckinpah. Bi den Roadmovie hannelt sik dat üm’t Verfilmen vun den Roman mit glieken Naam vun Jim Thompson, de vun en Bankroof un de ansluten Flucht vun de Deders hannelt.

Inholt[ännern | Bornkood ännern]

In Texas sitt de Verbreker Carter „Doc“ McCoy wegen sworen Roof mit Wapengewalt in en Tuchthuus, warrt dör dat Todoon vun den öörtlichen Politiker Benyon aver vör de Tiet lopenlaten. Man, dorför müss sien Ehfro mit Benyon slapen. As McCoy wedder free is halt de korrupte Benyon em foorts ran, för em en Bankroof to maken, vunwegen dat he Geld an sik nahmen harr, wat he nu vertuschen mutt. Na den Roof will Benyon den Verbreker aver an de Siet maken. He stellt em twee professchonelle Verbrekers, Frank Jackson un Rudy Butler, an de Siet. Man, al bi’t Vörbereiden vun den Överfall gifft dat Striet twüschen McCoy un Butler.

De Överfall geiht denn ok bannig in de Büx. Se künnt woll dat Geld klauen, man Jackson schütt dorbi en Wachmann doot un warrt denn bi de Flucht sülvst vun sien Kameraad Butler an de Siet maakt. McCoy un sien Fro fohrt na den afmaakte Steed, woneem Butler versöcht, ok McCoy ümtobringen. He will neemlich de Büüt vun de Roof sülvst behollen. As McCoy em aver nich över’n Weg troet, kummt dat nich so wiet: McCoy is gauer. Dat Geld schüll denn in Benyon sien Huus verdeelt warrn. Dor aver schütt Carol Benyon doot, as de Politiker McCoy vertellt hett, woans dat to sien Entlaten ut dat Tuchthuus kamen is.

Dat Ehpoor riet ut in Richt na Mexiko, warrt dorbi aver vun de Polizei un vun Benyon sien Mackers un Rudy Butler verfolgt. Butler weer bi de Scheeteree mitz McCoy blots licht besehrt worrn, vunwegen dat he noch de kugelsekere West anharr, de he för den Överfall dragen hett. Butler överfallt en Veehdokter un sien Fro, üm sien Wunn versorgen to laten un nimmt em sien Auto un sien Fro af. De Veehdokter, vun den sik Butler achter McCoy her kutscheeren laten hett, bringt sik later sülvst üm.

För de McCoys geiht de Flucht wieter, wobi dat jümmer wedder to Twüschenfäll kummt. Ok de Eh vun de Carol un Doc is ünner Druck, vunwegen dat Doc sien Fro nich verwinnen kann, dat se mit den Politiker in’t Bett weer. De beiden warrt wiest as twee Minschen, de sik nix mehr to seggen hebbt, un de kuum noch Geföhl förenanner hebbt. Se staht kort dorför uteneen to gahn, kamt denn aver to den Sluss, dat se tosamen wietermaken willt. McCoy kann opletzt doröver wegsehn, wat wesen is.

De Verfolgung ennt an den anfangs afmaakten Oort för’t Drapen, in en Hotel in El Paso an de Grenz na Mexiko. Dor kummt dat to en gresige Scheeteree. McCoy un sien Fro künnt jemehr Verfolgers utschalten, mööt dorna aver gau weg. Dorto holt se en Pickup an. De Fohrer schient to marken, dat wat in’n Busch is, verhollt sik kooperativ jem gegenöver un helpt jem, över de Grenz na Mexiko to kamen.

Kritik[ännern | Bornkood ännern]

Dat Lexikon vun’n internatschonalen Film schrifft vun en deelwies fein inszeneerten Thriller, de sien Thema – neemlich dat Problem vun de naiven Relatschoon vun de US-amerikaanschen Sellschop to de Gewalt – mit sien gresigen Fassaad överdecken deit[1]. Cinema faat den Film as en knallharden, atenlosen Thriller tosamen, de to de Extraklass höört[2].

Utteken[ännern | Bornkood ännern]

De Film weer för twee Filmpriesen nomineert: Quincy Jones weer för sien Filmmusik för den Golden Globe vörslahn, künn sik aver nich dörsetten. Dorför hett de Film den Golden Reel Award för den Besten Toonsnitt wunnen.

Anners wat[ännern | Bornkood ännern]

De Film is fröher eerst af 18 Johren freegeven wesen. Intwüschen is he aver op 16 Johren rünnersett worrn.

Bi de Dreiarbeiten hebbt sik Ali McGraw un Steve McQueen drapen un sik inenanner verkeken. De beiden hebbt 1973 heiraat, man de Eh weer al 1978 wedder scheedt, eh dat mit de Dreiharbeiten to Convoy losgüng.

1994 is vun den Film en Remake vun Roger Donaldson rutkamen, dat den glieken Titel harr. Dat Dreihbook weer wedder vun Walter Hill schreven. De McCoys sünd dorbi mit Alec Baldwin un Kim Basinger wedder vun en echt Ehpoor speelt worrn. Künstlerisch un kommerziell hett sik de Film as Rinfall rutstellt, de an den Klassiker vun 1972 nich rankeem.

Literatur[ännern | Bornkood ännern]

Borns[ännern | Bornkood ännern]

  1. Filmlexikon: Getaway
  2. Cinema.de: Filmkritik

Weblenken[ännern | Bornkood ännern]