Eerste Weltkrieg
De Eerste Weltkrieg weer en Krieg, de vun 1914 bet 1918 in Europa, den Nohen Osten, Afrika un Ostasien föhrt worrn is un in den över negen Millionen Minschen doodbleven sünd. Dat weer de eerst Krieg, in den massiv Maschinen, as Panzer, Fleger un Luftscheep to'n Insatz kamen sünd un in den Giftgas insett weer. De Fronten bewegen sik ober kuum; in'n Stellungskrieg reven sik de Truppen gegensietig op. Sünnerlich op de Slachtfeller vör Verdun un in Flannern bleven op beide Sieten Millionen vun Soldaten dood, ahn dat sik an de militärische Laag wat ännern dei. Ok dorüm is de Eerst Weltrieg een Krieg, de an Grugen allens achter sik laten hett, wat dormals bekannt weer.
[ännern] Afloop
De Krieg ward inleet vun den Anslag op Franz Ferdinand, wat de Thronfolger vun Österriek weer, an'n 28. Juni 1914 in Sarajewo dör den Serben Gavrilo Princip. Dat weer Grund noog för Österriek, dat al nich goot mit Serbien kunn, en Ultimatum to stellen, mit dat ünner annern de Souveränität vun Serbien minnern weern scholl. As de Serben dat Ultimatum nich vull inhollen wullen, verkloor Österriek an'n 28. Juli Serbien de Krieg. Russland verkloor dorop Österriek de Krieg un Düütschland muss vun wegen de Blankovollmacht, de dat Land gegenöver Österriek afgeven harr, ok in den Krieg instiegen. Düütschland fung nu an in Belgien intomarscheern, üm Frankriek antogriepen. De Düütschen weern bang, dat Frankriek op de Siet von Russland an den Krieg deelnehm, so dat dat to'n Tweefrontenkrieg kömen kunn. No den Angreep op Belgien verkloor ober ok Grootbritannien Düütschland den Krieg, vun wegen dat de Neutralität vun Belgien angrepen worrn weer.
Dat Enn vun'n eersten Weltorlog weer an'n 11. November 1918.
