William Coffin (Politiker)

Vun Wikipedia

William Elijah „Lloyd“ Coffin (* 1925 oder 1926; † 5. Mai 1983 in Belize-Stadt) weer en Politiker ut Brietsch-Honduras/Belize (PUP).

Coffin weer al fröh Maat von de 1950 nee grünnte People’s United Party (PUP). He is för de PUP bi de Wahl to’n Stadtraad von Belize-Stadt an’n 19. März 1952 in’n Raad wählt worrn.[1] 1953 is Coffin tosätzlich to’n Vörsitter (Chairman) von de PUP wählt worrn.[1] Bi de Wahl to’n Stadtraad an’n 19. März 1956 hett Coffin 715 Stimmen kregen un is denn to’n Viezpräsident von’n Stadtraad wählt worrn.[1]

As dat op’n PUP-Parteidag an’n 29. September 1956 to en Flögelkampf twüschen Price-Flögel un Richardson-Flögel keem, hett sik Coffin as Chairman op Richardson sien Sied stellt.[2] De Richardson-Flögel müss ut de Versammlungshall flüchten. Wielt Richardson un de Maten von’n Richardson-Flögel to’n groten Deel in de nee grünnte Honduran Independence Party rin sünd, hett Coffin en Tied later dat Land verlaten un hett ünner annern in New York City leevt.[2] He keem eerst üm 1962 rüm na Brietsch-Honduras trügg un hett denn dör Hülp von C. L. B. Rogers sien Weg trügg in de PUP funnen.[2]

Bi de Wahl to’n Stadtraad von Belize-Stadt an’n 14. Dezember 1965 is Coffin as PUP-Kannedaat mit 5105 Stimmen wählt worrn.[3] Bi de Wahl an’n 30. April 1969 is he mit 4964 Stimmen wedderwählt worrn. Coffin weer Viez-Börgermeester un is an’n 5. Januar 1971 Börgermeester von Belize-Stadt worrn.[1] Bi de Wahl an’n 8. Dezember 1971 is he mit 4425 Stimmen wählt worrn.[3] Bi de Wahl an’n 11. Dezember 1974 hett he 3762 Stimmen kregen un kunn dormit nich wedder in’n Stadtraad intehn.[3] Dormit is he ok as Börgermeester aflööst worrn von Paul Rodriguez von de UDP.

1976 hett Coffin dat Amt as Schatzmeester von de PUP övernahmen.[1]

He weer von’n 23. Mai 1980 bet to sien Dood na korte swore Krankheit an’n 5. Mai 1983 Präsident von’n Senaat von Belize.

Footnoten[ännern | Bornkood ännern]

  1. a b c d e Lawrence Vernon: A History of Political Parties in Belize 1950–1981.
  2. a b c Coffin denounced Price and quit PUP in 1956, Amandala an’n 25. März 2014
  3. a b c Myrtle Palacio: Belize City Council Election Results 1962 to 2003