Viehland

Vun Wikipedia
Wesseln na: Navigatschoon, Söök
Wapen/Flagg Koort

Wapen vun Viehland

Viehland
Laag vun Viehland in Düütschland
Basisdaten
Bundsland: Neddersassen
Landkreis: Oosterholt
Gemeen: Worpsweed
Flach: 2,38 km²
Inwahners:
Postleettall: 27726
Vörwahl: 04791
Geograafsche Laag:
Koordinaten:53° 12′ N, 8° 50′ O
53° 12′ N, 8° 50′ O

Viehland (hoochdüütsch Viehland) is en Dörp in de Gemeen Worpsweed in’n Landkreis Oosterholt, Neddersassen. Binnen de Gemeen höört de Oort to de Oortschop Waakhusen.

Geografie[ännern | Bornkood ännern]

De Oort liggt in dat Moor langs de Hamm. Dat Water ut dat Rebeed flütt över den Waakhüser Kanaal na de Hamm hen af, de en beten mehr as een Kilometer in’n Noordwesten langsflütt.

De Naveröörd sünd Neenfeld un Olenbrügg in’n Noorden, Waakhusen in’n Noordoosten, Worpheim in’n Oosten, Wührn, Millbüern un Veerhusen in’n Süden, Nedderenn un Moorhusen in’n Süüdwesten, Hu’e un Scharmbeekstotel in’n Westen un Lintel, Heidkamp un Oosterholt in’n Noordwesten.

Historie[ännern | Bornkood ännern]

Viehland kummt 1218 toeerst in de Oorkunnen vör. De Naam kummt von’n Utdruck Vieh för moorig Brookland. De Hüüs legen op Worten, en Diek hett dat fröher nich geven. Noch bet in dat 20. Johrhunnert sünd de Wischen von Viehland un Waakhusen noch jeden Winter överswemmt worrn. Över lange Tieden kunnen de Minschen blots mit Bööd na de Hüüs henkamen. Eerst 1956 is en 850 Hektar groten Polder mit en Schöppwark an’n Waakhüser Kanaal anleggt worrn. Sietdem is dat Rebeed vör dat Water schuult.

De Straat von Oosterholt-Scharmbeek na Worpsweed (Kreisstraten K 9 un K 11) is von 1936 bet 1940 boot worrn. Se liggt op en Damm, de 2,5 Meter över dat Moorland ümto rutkickt.

Verwaltungsgeschicht[ännern | Bornkood ännern]

De Oort hett vör 1885 to de Vaagdie Worpsweed in dat Amt Oosterholt tohöört. Na 1885 weer dat in’n Kreis Oosterholt, de 1932 mit’n Kreis Blomendal to’n ne’en un grötteren Kreis Oosterholt tohoopgahn is.

In de eerste Tied hett de Oort to de Buurschop Waakhusen mit bitellt. Later in dat 19. Johrhunnert is de Oort denn aver en egen Gemeen worrn. De Gemeen Viehland is 1929 Deel von de Gemeen Waakhusen worrn. De Gemeen Waakhusen is denn an’n 1. März 1974 mit de Gemeenreform in Neddersassen Deel von de Gemeen Worpsweed worrn.

Inwahnertall[ännern | Bornkood ännern]

Johr Inwahners
1848-00-00 1848[1] 87 Lüüd. 13 Hüüs
1871-12-011. Dezember 1871[2] 78 Lüüd. 14 Hüüs
1910-12-011. Dezember 1910[3] 60

Religion[ännern | Bornkood ännern]

Viehland is evangeelsch-luthersch präägt un höört to dat Kaspel von de Marien-Kark in Oosterholt.

För de Kathoolschen is de Goden-Hirt-Kark in Leendaal tostännig, de siet 1. September 2012 to de Karkengemeen von de Hillige-Familie-Kark in Oosterholt-Scharmbeek höört. De Goden-Hirt-Kark is 1961 boot worrn.

Weertschop un Infrastruktur[ännern | Bornkood ännern]

De freewillige Füürwehr Waakhusen is för Viehland mit tostännig.

Verkehr[ännern | Bornkood ännern]

Dör Viehland löppt de Kreisstraat 11, de in’n Noordoosten na Worpsweed an de Landsstraat 153 ran geiht un in’n Westen an de K 9. De L 153 löppt in’n Süden op Leendaal un Bremen to. De K 9 löppt in’n Noorden na Oosterholt-Scharmbeek un an de Bundsstraat 74 un in’n Süden an de K 8, de den Oort an Hu’e un Bremen-Noord anbinnt.

De Opfohrt 16 Bremen-Noord op de Autobahn 27/270 liggt so ölven Kilometer in’n Süüdwesten von Viehland an de B 74. De Opfohrt 17 Dreeeck Bremen-Industriehavens op de Autobahn 27/281 liggt lieker wied in’n Süüdwesten.

De nächste Bahnhoff is so bi fiev Kilometer wied weg in’n Noordwesten de Bahnhoff Oosterholt-Scharmbeek an de Bahnlien Bremen–Bremerhoben.

Scholen[ännern | Bornkood ännern]

De egene School in Viehland is 1874 oplööst worrn. De Kinner güngen denn in Waakhusen op de Volksschool. Nadem de School in Waakhusen 1967 dichtmaakt hett, sünd de Kinner na de Findörpschool in Oosterholt-Scharmbeek gahn.

Footnoten[ännern | Bornkood ännern]

  1. Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 138
  2. Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 158
  3. Inwahnertallen op gemeindeverzeichnis.de