Unstoppable (2010)
| Filmdaten | |
|---|---|
| Plattdüütsch Titel: | — |
| Originaltitel: | Unstoppable |
| Düütsch Titel: | Unstoppable – Außer Kontrolle |
| Produkschoonsland: | USA |
| Johr vun’t Rutkamen: | 2010 |
| Läng: | 98 Minuten |
| Originalspraak: | Engelsch |
| Öllersfreegaav in Düütschland: | FSK 12 |
| Filmkru | |
| Speelbaas: | Tony Scott |
| Dreihbook: | Mark Bomback |
| Produkschoon: | Julie Yorn Alex Young Tony Scott Mimi Rogers Eric McLeod |
| Musik: | Harry Gregson-Williams |
| Kamera: | Ben Seresin |
| Snitt: | Robert Duffy Chris Lebenzon |
| Szenenbild: | Chris Seagers |
| Kledaasch: | Penny Rose |
| Dorstellers | |
| |
Unstoppable (op platt so veel as: „nich antohollen“; dt. Titel: Unstoppable – Außer Kontrolle) is de Titel vun en US-amerikaanschen Actionthriller ut dat Johr 2010 mit Denzel Washington un Chris Pine in de Hööftrullen. Dat weer de letzte Film, bi den Tony Scott Speelbaas weer.
Inholt[ännern | Bornkood ännern]
Dör de Lichtfardigkeit vun en Bahnmitarbeiter in’n Rangeerbahnhoff vun Fuller Yard in Pennsylvania föhrt en Gödertog ahn Kuntrolle los: De Lokomotivfohrer stiggt ut de Lok ut, üm gau en verkehrte Wiek ümtostellen, man he kummt nich gau noog achteran un kummt nich wedder op de Lok torüch. Ok de Wiek kriggt he nich rechttietig ümstellt, un so warrt de Tog op de eengleisige Streck na Stanton leidt. Ünner annern sünd ok gefährliche cheemsche Stoffen in de Waggons, wat ut den Gödertog en Bomb maakt, de op en Rebeet tohollt, dat dicht bewahnt is. Dorto kummt, dat de Lokföhrer losföhrt is, vördem de Släuch för de Druckluftbrems verbunnen weern, so dat de Nootfalbrems nich arbeit.
De Fohrdeenstleidersche Connie Hooper, de in’t Kuntrollzentrum vun de Iesenbahnsellschop sitt, gifft foorts Alarm un versöcht, den Tog anhollen to laten. Man, vunwegen dat de Bremsen nich funkschoneert, is de Tog gauer ünnerwegens as toeerst annahmen. Dorüm geiht de Versöök scheef, den Tog op en Nevengleis to lenken: De vun Connie beopdraagte Mitarbeiter kummt to laat an de nödige Wiek an, un de Tog is al vörbi.
As de Tog op dat bewahnte Rebeet tostüert, warrt versöcht, em mit tosätzliche Lokomotiven aftobremsen, de för den Gödertog sett warrt. Dordör schall mööglich maakt warrn, dat sik en Mann vun en Heevschruver op de Lok afseelen un den Tog ünner Kuntrolle bringen deit. Man, ok dat löpt scheef, vunwegen dat de Gödertog mit sien knapp veertig Wagen to swoor is üm em noog aftobremsen: De tosätzlichen Lokomotiven springt dorbi ut dat Gleis un explodeert, de Lokföhrer kummt dorbi üm. De Mann an’t Seel glippt af un sleiht op de tweete Lok op, wobi he besehrt warrt. Man, he överleevt den Unfall. En wieteren Versöök, den Tog mit Hülp vun en Gleissparr kuntrolleert ut dat Gleis glippen to laten, funkschoneert ok nich. De swore Tog sprengt de Sparr weg un föhrt eenfach wieter.
De Lokomotivföhrer Frank Barnes, de al 28 Johren in den Beroop arbeit, un sien jungen Kolleeg Will Colson sünd op datsülve Gleis man in de Gegenricht ünnerwegens un drauht mit den Gödertog tohopentostöten. Jüst in de letzten Sekunn künnt se op en Warksteedgleis utwieken, wobi de Gödertog noch dör jemehr letzten Waggons dörneiht un toschannen maakt. Frank markt dorbi, dat de achterste Kupplung apen is un will nu versöken, vun achtern an den Tog antokoppeln und em so to bremsen. Korterhand föhrt se torüchoors den Tog achteran.
De Laag warrt dramaatsch, as sik de Gödertog op en Brüch mit en drange Böög to bewegt, woneem blangento ok noch Tanklagers för Kraftstoff staht. De Böög is blots för 15 Mielen in de Stünn tolaten, man de Tog beweegt sik mit 70 Mielen in de Stünn. De Verfolgers mööt allns geven, dat se rechttietig ankoppelt un den Tog afbremst, anners warrt de ut das Gleis springen un dör de Explosion vun Kraftstoff un Gefohrgoot dat Leven vun en poor dusend Minschen in Gefahr bringen.
Frank un Will koppelt veer Mielen för de Brüch an, wobi Will sik an’n Foot besehrt. De beiden künnt den Gödertog afbremsen, man to’n holen kriegt se em nich. Dorto is de Gödertog to swoor. Frank stiggt ut un löpt över de Waggons üm mit Hülp vun de Handbremsen an jeedeen Waggon wieter aftobremsen. Op disse Wies warrt de Tog langsom noog, dat he jüst so dör de Böög kummt.
Dorna kann Will vun de Lokomotive rünner op en Pickup springen, de blangen dat Gleis föhrt. Vun dor ut springt he wieter op dat Föhrerhuus vun de Lokomotive un kann opletzt den Tog to’n Stahn bringen. De hele Afloop finnt vör de Ogen vun de Apentlichkeit statt, vunwegen dat dat Feernsehn mit Heevschruvers un Wagens de hele Tiet dorbi is un allns live överdrägen deit.
Kritiken[ännern | Bornkood ännern]
- Die Zeit beteken Unstoppable – Außer Kontrolle as en soliden Binah-Katastrophenfilm, de utseggen de, dat dat richtige Vörgahn nich vun Geld dikteert warrt, man vun’t Geweten. De Film weer as in’n besten Sinn konservativ beschreven, weer aver seker keen rutragen Wark.[1]
- Op prisma.de weer to lesen, dat man sik vör Lachen bögen müss, wenn den Tokieker an’t Enn vun’n Film wiesmaakt warrn schall, dat sik dat allns wohrhaftig so afspeelt hebben schall. Ok wenn sik dat Dreihbook an wohre Begeevnissen orienteren de, weer de Geschicht doch as blanken Blödsinn afdoon. Kritiseert weer ok de slechte Filmsnitt.[2]
- In Filmstarts warrt de Film mit Speed vergleken. De Speelbaas Tony Scott weer in Hoochform un harr nich blots en Gedicht an de Arbeiderklass vun Amerika maakt, man ok en Actionfilm, de mitrieten deit un ut reine Bewegungsenergie to bestahn schient.[3]
Utteken[ännern | Bornkood ännern]
De Film weer för alltohopen veerteihn Filmpriesen vörslahn, so ok för den Oscar in de Kategorie Best Tooneffekt. Wunnen hett de Film aver blots een Pries. Dat weer 2010 de Golden Satellite Award in de Kategorie Best Toon (Snitt un Mix) för Mark P. Stoeckinger, Kevin O’Connell, Beau Borders un William B. Kaplan.
Achtergrünnen[ännern | Bornkood ännern]
De Inholt vun dat Dreihbook is anlehnt an en wohre Geschicht, de ünner den Naam Vörfall CSX 8888 bekannt worrn is, as an’n 15. Mai 2001 in’n Rangeerbahnhoff Stanley Yard bi de Stadt Toledo in’n US-Bundstaat Ohio en Tog ruchweg 100 Kilometer ahn Lokfohrer in Richt Kenton föhrt is.
En vergliekboren Twüschenfall, de aver nich so goot utgahn is, hett sik an’n 17. November 1966 bi Oberliederbach in de Nöög vun Frankfort an’n Main-Höchst todragen hett. Dormols hett sik en Driefwagenvun de Königsteiner Bahn op en eengleisige Streck sülvststännig maakt, as de Lokfohrer en Poos inleggt harr. De Streck is vun’n Taunus na’n Main hen afschüssig. En Versöök, den Tog op en Afstellgleis to lenken, is scheefgahn. De Tog weer al dör mehrere Öörd suust un is denn frontal mit en Personentog kollideert. Bi den Unfall sünd acht Minschen ümkamen.
Borns[ännern | Bornkood ännern]
- ↑ Mit Rechtschaffenheit gegen Godzilla., Kritik in Die Zeit; afropen an’n 16. November 2010
- ↑ Unstoppable – Außer Kontrolle. Kritik in: prisma.de, afropen an’n 16. November 2010
- ↑ Unstoppable – Außer Kontrolle., Filmkritik in: Filmstarts, afropen an’n 13. Februar 2019
Weblenken[ännern | Bornkood ännern]
- Unstoppable in de Internet Movie Database (engelsch)
- Kritiken to den Film op Rotten Tomatoes