Afstellgleis

Vun Wikipedia
Afstellgleisen bi’n Hamborger Haven

En Afstellgleis is in’n Bahnbedrief en Gleis – faken en Stumpgleis – to’n Opnehmen vun Schienenfohrtüüg, de nich bruukt warrt.

Sinn[ännern | Bornkood ännern]

De Afstelltiet kann vun en poor Stünnen bit hen to’n duersomen Afstellen vun olle, utsorteerte Fohrtüüg recken. Mitünner warrt dorünner ok Gleisen to’n Togbilln verstahn un faken warrt dor ok Personentöög to’n Reinmaken oder Opwarmen afstellt. Se gellt as Nevengleisen, vunwegen dat se nich för Fohrten över den Bahnhoff rut bruukt warrt.

Bahnstieggleisen, an de Töög to’n Ut- un Instiegen torecht stellt warrt, gellt nich as Afstellgleisen. Jüst so ok Laadgleisen, woneem Göder Op- oder aflaadt warrt, oder Utwiek- un Överholgleisen, woneem en Tog op en annern töövt.

Wenn en Stumpgleis bich blots to’n Afstellen, man ok to’n Ümdreihn vun Töög to’n Torüchfohren op en annert Gleis vun en tweegleisige Streck bruukt, warrt ok vun en Kehrgleis snackt.

Överdragen Sinn[ännern | Bornkood ännern]

De Metapher „op en Afstellgleis stellen“ warrt mitünner as Ümschrieven dorför nahmen, dat Minschen duersom ut en Wirkkreis oder ut en Beroop rutdrängelt oder utsloten warrt. De Utdruck „Op’n Afstellgleis stahn“ bedüüt so veel as sik in en Laag oder Positschoon to befinnen, in de een nix beschicken kann.

Literatur[ännern | Bornkood ännern]

  • Röll, Freiherr von: Enzyklopädie des Eisenbahnwesens. Berlin, Wien 1912, S. 76