The Godfather Part II
| Filmdaten | |
|---|---|
| Plattdüütsch Titel: | — |
| Originaltitel: | The Godfather Part II |
| Düütsch Titel: | Der Pate – Teil II |
| Produkschoonsland: | USA |
| Johr vun’t Rutkamen: | 1974 |
| Läng: | 196 Minuten |
| Originalspraak: | Engelsch un Sizilianisch |
| Öllersfreegaav in Düütschland: | FSK 16 |
| Filmkru | |
| Speelbaas: | Francis Ford Coppola |
| Dreihbook: | Mario Puzo Francis Ford Coppola |
| Produkschoon: | Francis Ford Coppola Gray Frederickson Fred Roos |
| Musik: | Nino Rota Carmine Coppola |
| Kamera: | Gordon Willis |
| Snitt: | Barry Malkin Richard Mark Peter Zinner |
| Szenenbild: | Dean Tavoularis |
| Kledaasch: | Theadora Van Runkle |
| Dorstellers | |
| |
The Godfather Part II (op plattdüütsch so veel as „De Paat Deel II“; dt. Titel: Der Pate – Teil II) is en US-amerikaansch Filmdrama vun den Speelbaas Francis Ford Coppola ut dat Johr 1974. Dormit warrt de spoodrieke Film The Godfather wieterföhrt. De Film wiest in Torüchblennen, woans de Mafiabaas Don Vito Corleone inst na Amerika kamen is un siek de Familie entwickelt hett. Parallel dorto warrt wiest, wat sik na den eersten Film todregen deit, wobi sien Söhn Michael in’n Middelpunkt steiht. Mario Puzo, de de Romanvörlaag för den eersten Deel schreven harr, hett – tosamen mit Coppola – ok ditmol wedder dat Dreihbook bistüert. De Film gellt as en utermatig go’en tweeten Deel un – jüst so as de eerste – as een vun de besten Filmen vun all Tieten.
In’t Johr 1990 is mit The Godfather Part III noch en drüdden Deel rutkamen.
Inholt
[ännern | Bornkood ännern]De Film vertellt twee Geschichten blangen’nanner. Dat is eenmol dat Vertellen vun en Kapitel ut dat Leven vun Don Michael Corleone, wiel dat annere de Kindheit un Jöögd vun sien Vadder Don Vito dorstellt, de in Episoden jümmer wedder mol inspeelt warrt.
In de Filmnutiet is Michael Corleone de Paat un Baas vun de Familie. Beraat warrt he vun sien Broder Fredo, de nich jümmer so hell is as he, sien Steefbroder Tom Hagen as Afkaat as ok de Capos Al Neri un Rocco Lampone. De Film fangt in’t Johr 1957 an, as Don Michael bi en Fier op sien Grundstück versöcht, sien Gewarf to vergröttern un in Las Vegas un in Havanna grötter intostiegen. Dorto verhannelt he geheem ok mit Hyman Roth, en jöödschen Verbreker na dat Vörbild vun Meyer Lansky. Mit den will he sik tosamen doon un Andeelen an verschedene Hotels afköpen. Don Michael hett dorbi in’n Sinn, dat Gewarf vun de Familie op lange Sicht op legale Feller to verlagern.
As he na Bett gahn will, warrt he vun buten beschaten, kann sik aver rechttietig duken. Em warrt gau kloor, dat Roth achter den Anslag steken deit, un ok en Liddmaat vun de Familie bedeeligt wesen mutt, de wichtige Informatschonen wietergeven hett. Üm ruttofinnen, wokeen dat weer, maakt he Roth wat vör un deit wieter as sien Fründ un Macker. Togliek maakt Michael en Plaan, Roth op Kuba vun sien Capo ümbringen to laten. Dör en Tofall warrt de aver opdeckt un dootschaten, wiel Roth överleevt. So verlütt Michael ok sien Investitschonen in Kuba. Bito finnt he rut, dat sien Broder Fredo em verraat hett, wat he em ok op’n Kopp toseggen deit. Ut Rücksicht op sien Mudder deit he em nix, will em aver in sien Huus nich mehr sehn. Fredo duukt ünner.
Torüch in de USA drauht Michael en annere Gefohr: Frankie Pentangeli, de in New York de Saken vun de Familie regelt, hett blots knapp en Moordanslag överleevt, den Roth anordent hett. Pentangeli glöövt aver, dat Michael em veraat hett un will nu as Kroontüüg in en Senatsutschuss gegen em utseggen. He warrt aver dör Fredo wies, dat Roth den Vörsitter vun’n Utschuss besteken hett. Korterhand lett Michael Frank sien Broder ut Sizilien inflegen, de sik kort in’n Utschuss sehn lett. Dat reckt, dat Frank sien Utsaag torüchtehn deit. Dorför mutt he aver Meeneed in’t Gefängnis. Later gifft Tom Hagen em to verstahn, dat he sien Deenst nu doon hett, un he sien nu wegen sien Verraat an Michael nu ümbringen müss, wat Pentangeli üm sien Ehr willen ok maakt. Un üm sien Familie dorför to wohren, dat Miachel ok jem dat torüchbetahlen mutt.
Man, togliek gifft dat groten Striet in de Eh vun Michael, vunwegen dat sien Fro dat Mafialeven nich länger uthollen kann. Se hett markt, dat Michael dat nienich wohrmaken künn, opletzt en legal Leven to föhren. Ok wenn he ehr dat al so faken versproken hett. As se denn ok noch vertellt, dat se jemehr drütt Kind nich verloren, man afdreven hett, smitt Michael ehr rut. He tütt sik vullstännig vun ehr torüchun lett ehr ok de Kinner nich mehr sehn.
Wat dat Gewarf angeiht, löpt dat dorgegen veel beter. Roth is op de Flucht un de Senater, de vun Michael eerst veel Smeergeld rutpressen wull, stickt intwüschen sülvst so deep in Intrigen, dat he sülvst utpressbor worrn is un sik mit de Corleones verbünnt. Roth, de sien Levensavend in Israel plaant harr, dröff dor aver nich inreisen un warrt torüch in die USA schickt. Dor warrt he vun Rocco, en Capo vun Michael, ümbröcht. As denn ok noch Michael sien Mudder doodbleven is, wiest he an, sien Broder Fredo an de Siet to maken, den he kort vörher noch in den Gloven bi sik wedder opnahmen hett, dat he em den Verraat vergeven hett. So hett Michael opletzt all sien Feenden ümbringen laten un sien Gewarf vöranbröcht. Man sien Minschlichkeit un sien Familie hett he dorbi opgeven. So sitt he an’t Enn aleen op een Stohl un denkt an fröhere Tieten torüch, as he in’n Dezember 1941 sien Bröder vertellt hett, dat he sik freewillig to’n Kriegsinsatz mellt hett. Dat weer dormols sien Versöök wesen, ut sien Welt uttobreken, üm keen Mafiosi warrn to möten.
De annere Geschicht vertellt vun de Jöögd vun Vito Corleone, de in’t Öller vun negen Johren beleven müss, woans sien Vadder, sien Broder un opletzt ok sien Mudder vun en annern Mafiapaten ümbröcht warrt, vunwegen dat he wat an de Familie torüchtobetahlen harr. Ok Vito schall an de Siet maakt warrn, man sien Mudder oppert sik, dat he man weglopen kann. Bekannte hülpt em na Amerika uttoneihn, woneem he ünner den Naam Vito Corleone inreist un opwassen deit. In mehrere Torüchblennen warrt wiest, woans Vito toeerst as eenfachen Arbeiter arbeiten deit, in Kuntakt kummt mit de Verbrekerwelt un opletzt to’n groiten Mafiapaat vun New York opstiegen deit. In de letzten Torüchblennen warrt wiest, woans Vito torüch na Sizilien reist un den ollen Mafiapaat afsteken deit, üm den Dood vun sien Familie torüchtobetahlen.
Utteken
[ännern | Bornkood ännern]De tweete Deel vun de Trilogie weer utermatig spoodriek, wat sik in de groten Tall vun Filmpriesen wiest. So hett de Film alltohopen söventeihn Priesen wunnen un weer vör wietere sössteihn Priesen vörslahn. Ünner annern weer he uttekent mit:
- 1975: den Oscar in de Kategorie Best Film för Francis Ford Coppola, Gray Frederickson un Fred Roos
- 1975: den Oscar in de Kategorie Best Speelbaas för Francis Ford Coppola
- 1975: den Oscar in de Kategorie Best Nevendorsteller för Robert De Niro
- 1975: den Oscar in de Kategorie Best Dreihbook na Vörlaag för Francis Ford Coppola un Mario Puzo
- 1975: den Oscar in de Kategorie Best Szenenbild för Dean Tavoularis, Angelo P. Graham un George R. Nelson
- 1975: den Oscar in de Kategorie Best Filmmusik för Nino Rota un Carmine Coppola
- 1975: den NSFC Award in de Kategorie Best Speelbaas för Francis Ford Coppola
- 1975: den NSFC Award in de Kategorie Best Kamera för Gordon Willis
- 1975: den WGA Award in de Kategorie Best adapteert Dreihbook för Francis Ford Coppola un Mario Puzo
- 1976: den BAFTA Film Award in de Kategorie Best Dorsteller för Al Pacino
Achtergrünnen
[ännern | Bornkood ännern]De Film wiest twee parallel vertellte Geschichten. De een speelt in verleden Tieten un vertellt vun den jungen Vito Corleone. Disse Geschicht stünn ok al in Puzo sien Roman. De annere Geschicht över dat Leven vun Michael Corleone is för den Film vun Puzo un Coppola nee utklamüstert worrn. Vun Coppola keem ok de Titel The Godfather Part II, wat Paramount Pictures aver aflehnen de, vunwegen dat Foortsetten vun Filmen jümmer en egenen Naam kriegen deen. Coppola hett sik aver dörsett, nich toletzt ok wegen sien groten Spood mit den eersten Deel. An sik wull he toeerst gor nich sülvst Speelbaas wesen. He harr an sien Steed Martin Scorsese vörslahn.
In eenige vun de fardigen Szenen weern Dorstellers to sehn, de Büxen mit en Rietversluss tomaakt warrn. Dat is en Musiker an’t Set opfallen, de vertell, dat de to de Tiet, in de de Film speelt, noch gor nich utfunnen weern. Eenige vun de Szenen müssen dorophen nee dreiht warrn.
Lee Strasberg is in dissen Film in een vun sien wenigen Filmrullen to sehn. He is sünners bekannt, as de Vadder vun’t Method Acting. Ünner sien Schölers weern ünner annern ok Al Pacino un Robert De Niro, de beide in dissen Film mitspeelt. De Niro sien Text weer to’n gröttsten Deel op Siziliaansch, wat he sülvst gor nich kennt hett.[1]
Literatur
[ännern | Bornkood ännern]- Mario Puzo: Der Pate. Rowohlt, Reinbek 2001, ISBN 3499231107 (hoochdüütsche Översetten)
Borns
[ännern | Bornkood ännern]- ↑ Gene D. Phillips: Godfather: The Intimate Francis Ford Coppola, University Press of Kentucky, Lexington, Kentucky, 2004, S. 129 ISBN 0813123046
Weblenken
[ännern | Bornkood ännern]- The Godfather Part II in de Internet Movie Database (engelsch)
- Kritiken to’n Film op Rotten Tomatoes
- Vergliek vun de Snittfaten Kabel 1 — FSK 16 DVD op Schnittberichte.com
- Filmkritik vun Ulrich Behrens op Filmzentrale.com