The Bourne Ultimatum (Film)
| Filmdaten | |
|---|---|
| Plattdüütsch Titel: | — |
| Originaltitel: | The Bourne Ultimatum |
| Düütsch Titel: | Das Bourne Ultimatum |
| Produkschoonsland: | USA |
| Johr vun’t Rutkamen: | 2007 |
| Läng: | 111 Minuten |
| Originalspraak: | Engelsch |
| Öllersfreegaav in Düütschland: | FSK 12 |
| Filmkru | |
| Speelbaas: | Paul Greengrass |
| Dreihbook: | Tony Gilroy Scott Z. Burns George Nolfi |
| Produkschoon: | Patrick Crowley Frank Marshall Paul Sandberg |
| Musik: | John Powell Moby (Titelleed) |
| Kamera: | Oliver Wood |
| Snitt: | Christopher Rouse |
| Szenenbild: | Peter Wenham |
| Kledaasch: | Shay Cunliffe |
| Dorstellers | |
| |
The Bourne Ultimatum (op plattdüütsch so veel as „Bourne sien Ultimatum“; dt. Titel: Das Bourne Ultimatum) is de Titel vun en US-amerikaanschen Agenten-Actionfilm ut dat Johr 2007. Mit den Film weer de Bourne-Reeg wieter föhrt, de 2002 mit The Bourne Identity anfüng un 2004 mit The Bourne Supremacy wietergüng. De Hööftrull speelt wedder Matt Damon, Speelbaas is, jüst so as bi’n tweeten Deel, Paul Greengrass. 2012 is noch en wieteren Deel ünner den Titel The Bourne Legacy rutkamen.
Inholt[ännern | Bornkood ännern]
De Geschicht sett noch vör dat Enn vun The Bourne Supremacy in un föhrt ahn Ünnerbreken wieter. Jason Bourne will nu endlich Kloorheit över sien verleden Leven as Geheemagent hebben. De CIA will em aver jümmer noch an de Siet maken, vunwegen dat he as so nöömten Asset (Insatzposten) Insiderweten hett, mit dat he de Behörd schaden kann. Sien Amnesie glöövt em so recht keeneen.
Üm dat Geheemnis üm sien egen Person op de Spoor to kamen, nimmt Bourne Kuntakt op to Simon Ross, de bi dat Londoner Blatt The Gurdian as Journalist arbeit un Artikels över em schrifft. Ross warrt aver utschalt, noch eh Bourne rutfinnt, woher he sien Informatschonen hett. Wat he aver noch rutfinnt, is dat de Operatschoon „Treadstone“ nich afslaten is, as em dat vertellt worrn is, man blots dör de Operatschoon „Blackbriar“ uttuuscht weer, de opletzt jüst so löpt un en Oort Update vun „Treadstone“ dorstellt.
En Spoor föhrt em wieter na Madrid, woneem he dat CIA-Safehouse leddig vörfinnen deit. Dor dröpt he Nicky Parsons, de intwüschen dor statschoneert worrn is. Vun ehr warrt he gewohr, dat se beid mol wat mitenanner hatt hebbt. Wieter kann se Bourne ok den Naam vun en Mann vertellen, den he op en Foto as en binneren Mitarbeiter vun „Treadstone“ kennt: Neal Daniels. Se versöökt em to finnen.
För dat Blackbriar-Programm is intwüschen Deputy Director Noah Vosen tostännig, de wegen sik dwungen sütt, jeedeen ut’n Weg to rümen, de vun dat Programm weet, vunwegen dat dat Projekt illegal is. Sien Lüüd finnt rut, dat Neal Daniels de Informant vun den Journalisten weer, un dat de sik in Tanger ophollen deit. Also warrt de Agent Desh losschickt, de Bourne un Parsons un ok Daniels an de Siet maken schall. Woll kann de Desh Daniels mit en Bomb ümbringen, tütt sülvst aver gegen Bourne den körteren. Bourne geiht alleen wieter un finnt en Spoor, de em direkt na New York in dat Anti-Terrorism Bureau föhrt, dat för „Blackbriar“ tostännig is.
In New York brickt Bourne in Vosen sien Büro in un bringt dor streng geheeme Ünnerlagen in sien Besitt, in de all Informatschonen över de Killerkommandos staht. Mit de Help vun Pam Landys, de em in The Bourne Supremacy neger kamen is, finnt he torüch na sien ehmolig Utbillnszentrum. Dor gifft he ehr de Ünnerlagen, de se glieks wieterfaxen deit. Bourne dröpt in den Trakt, woneem he utbillt worrn is, den ehmols för „Treadstone“ tostännigen Psycholoog Dr. Albert Hirsch. Dör em kriggt he na un na wedder Kloorheit. He weet nu wedder, dat he as Cpt. David Webb freewillig in dat Training gahn is. As wietere Agenten kamt, mutt Bourne wedder weglopen. Op’t Dack vun’t teihnstöckige Huus schütt Vosen op Bourne, de vun dor in’n East River springen deit.
Nicky, de sik ennerworrns in de Welt versteken hett, höört dör de Narichten vun den Vörfall. Dorin warrt vertellt, dat Vosen un Hirsch in Haft nahmen worrn sünd. Ok schall David Webb alias Bourne wohrschienlich besehrt in den Stroom fallen wesen, man ok na dree Daag is keen Liek vun em funnen worrn is. För ehr steiht fast, dat Bourne den Sprung överleevt hett, un in en Torüchblennen is wohrhaftig to sehn, dat Bourne in’t Water wedder to sik kummt un wegswemmt.
Kritik[ännern | Bornkood ännern]
- Lexikon vun’ internatschonalen Film: Zweite Fortsetzung des futuristisch angehauchten Agententhrillers, der in intelligenter Inszenierung vor den Gefahren einer allmächtigen Überwachung warnt und zugleich den nur vermeintlich allwissenden Agenten nach seiner Seele suchen lässt. Rasantes Actionkino in avantgardistischer Form, das gerade aber an seinem Perfektionismus auch etwas krankt.[1]
- James Berardinelli hett op ReelViews schreven, dat de Film een vun de besten vun’t Johr 2007 weer. De Film weer beter as de Vörgänger aver nich so goot as de eerste. De Action nööm he eerstklassig, man den Film fehl ’n beten dat Hart un de emotschonale Deep. Damon weer noch mol perfekt in sien Rull: He wies keen Freid an’t Doodmaken, man he schreck ok nich dorvör torüch.[2]
- In de Tietschrift Variety vun’n 24. Juli 2007 schreev Todd McCarthy, dat de Film en swingen Thriller weer, de över meist twee Stünnen för en kunstanten Adrenalin-Spegel sorgen de. He segg den Film en rutragen Inspeelresultat vörrut. Jason Bourne weer de kenntekenste Rull vun Matt Damon, de sik sünners dull mit de speelten Figur identifizeer. De Kameraarbeit, de en subjektiven Indruck maakt, ünnerstrickt disse Identifikatschoon.[3]
Utteken[ännern | Bornkood ännern]
De letzte Deel vun de Trilogie is bannig spoodriek wesen. Glieks 44 mol weer de Film för Priesen nomineert und is mit 18 Priesen uttekent worrn. Dorünner mit:
- 2007: den Satellite Award in de Kategorie Best Toon för Kirk Francis, Karen M. Baker, Scott Millan, David Parker un Per Hallberg
- 2008: den Eddie-Award in de Kategorie Best sneden Speelfilm – Drama för Christopher Rouse
- 2008: den Oscar in de Kategorie Best Filmsnitt för Christopher Rouse
- 2008: den Oscar in de Kategorie Best Tooneffekt för Karen M. Baker un Per Hallberg
- 2008: den Oscar in de Kategorie Best Toon för Scott Millan, David Parker un Kirk Francis
- 2008: den Empire Award in de Kategorie Best Film
- 2008: den BAFTA Award in de Kategorie Best Filmsnitt för Christopher Rouse
- 2008: den BAFTA Award in de Kategorie Best Toon för Kirk Francis, Karen M. Baker, Scott Millan, David Parker un Per Hallberg
- 2008: den Taurus Award in de Kategorie Best Arbeit in de Hööch för David Leitch un Kai Martin
- 2008: den Screen Actors Guild Award in de Kategorie Rutragen Leistung vun en Stuntensemble in en Speelfilm
Achtergrünnen[ännern | Bornkood ännern]
De Film is ünner annern in New York, Berlin, London, Madrid, Tanger un Paris dreiht worrn[4]. De Ooropföhren weer an’n 25. Juli 2007 in Los Angeles, in Düütschland weer de FIlm vun’n 6. September 2007 an in de Kinos to sehn.
De Produkschoonskosten hebbt sik op ruchweg 138 Millionen US-Dollar belopen[5], inspeelt hett he alleen in de US-Kinos al 227 Millionen US-Dollar. Weltwiet weern dat üm un bi 442 Millionen US-Dollar[6].
De Universal Studios hebbt mit de Arven vun den Schriever Robert Ludlum en Verdrag afsloten un künnt nu alleen över de Figur ut de Romanen bestimmen. Dormit is künnig worrn, dat de Bourne-Reeg wietergahn schall, vergliekbor mit de James-Bond-Reeg[7].
Borns[ännern | Bornkood ännern]
- ↑ Tietschrift film-dienst un Kathoolsche Filmkommisschoon för Düütschland (Rgv.), Horst Peter Koll un Hans Messias (Red.): Lexikon des Internationalen Films – Filmjahr 2007. Schüren Verlag, Marborg 2008. ISBN 978-3-89472-624-9
- ↑ Kritik vun James Berardinelli, afropen an’n 31. Juli 2007
- ↑ Kritik vun Todd McCarthy, afropen an’n 31. Juli 2007
- ↑ Filming locations för The Bourne Ultimatum, afropen an’n 31. Juli 2007
- ↑ Box office / business för The Bourne Ultimatum, afropen an’n 9. Oktober 2007
- ↑ Inspeelresultaten bi boxofficemojo.com, afropen an’n 1. Februar 2008
- ↑ Moviemaze.de