The Aviator (1985)

Vun Wikipedia
Zur Navigation springen Zur Suche springen
Filmdaten
Plattdüütsch Titel:
Originaltitel: The Aviator
Düütsch Titel: Der Flieger, ok:
Absturz in der Wildnis
Produkschoonsland: USA
Johr vun’t Rutkamen: 1985
Läng: 107 Minuten
Originalspraak: Engelsch
Öllersfreegaav in Düütschland: FSK 12
Filmkru
Speelbaas: George Miller
Dreihbook: Marc Norman
Produkschoon: Thomas H. Brodek
Mace Neufeld
Musik: Dominic Frontiere
Kamera: David Connell
Snitt: Duane Hartzell
Szenenbild: Brenton Swift
Kledaasch: Patricia Smith
Dorstellers

The Aviator (op plattdüütsch so veel as „De Fleger“; dt. Titel: Der Flieger) is de Titel vun en US-maerikaanschen Aventüerfilm ut dat Johr 1985. Speelbaas weer George Trumbull Miller, de Hööftrullen weern mit Christopher Reeve un Rosanna Arquette besett. De Inholt baseert op den glieknöömten Roman vun Ernest K. Gann. Dreiht worrn is de Film in Jugoslawien.[1] In de USA hett de Film in de Kinos ruchweg 1,3 Millionen US-Dollar inspeelt.[2]

Inholt[ännern | Bornkood ännern]

De Hööftfigur, Edgar Anscombe, is en Fleger. De Geschicht fangt 1918 an: Edgar arbeit in Texas, woneem he junge Lüüd dat Flegen bibringen deit. Dor flüggt he mit en jungen Flaagschöler, de dat Lannen nich op de Reeg kriggt. As Edgar em noch mol een Versöök togesteiht, kriggt de Jung dat so bannig mit de Angst, dat he den Fleger to’n Afstörten bringt. Edgar kann sik jüst noch redden, man för de Schöler verbrennt in dat Wrack.

Teihn Johr later leevt Edgar in Elko, Nevada. De Unfall vun dormols hett em noch nich loslaten. Sien Geld verdeent he mit dat Flegen vun lütte Maschienen, de in de USA de Post uteneen bringen doot. Rose, de Süster vun sien Kolleeg Jimmy Stiller, is an em intresseert, man se kummt nich an em ran. As he een Morgen an de Arbeit geiht, warrt em en Flaaggast todeelt, de he in sien Fleger mitnehmen schall. Disse Gast is de junge Deern Tillie Hansen, de vun ehrn Vadder vun Tohuus wegschickt warrt, nadem rutkamen is, dat se wat mit en Jungen anfungen hett.

Vun de Idee, mit en Passageer flegen to möten, holt Edgar rein gor nix. Aver ok Tillie maakt de Reis nich freewillig un is muksch. Dorto kummt, dat Tillie veel vertellen deit un sik nich geern wat seggen lett, so dat Edgar sik de mehrste Tiet mit ehr strieden deit. Bi en Twüschenlannen in Boise schall de Fleger instand sett warrn, man de Mechaniker warrt dorbi aflenkt un vergitt, de Benzinleidung heeltomaken. As Edgar mit Tillie wieterflüggt nimmt he en Afkörten över de Bargen, un jüst dor ritt de Leidung af. De Fleger stört af, aver de beiden överleevt dat Unglück.

Edgar will eerst, as de Vörschrift dat vörsütt, bi’t Wrack blieven un töven, bit se funnen warrt. Em is kloor, dat se af vun sien egentliche Route kuum en Mööglichkeit hebbt, funnen to warrn un in de Küll to överleven. Tillie dorgegen kann nicht still sitten un will lever versöken, sik sülvst to redden. As de beiden op’n Barg vun uthungerte Wülv angrepen warrt, maakt se sik denn doch op'n Weg. Tillie gifft Edgar ne’en Andrief un Wüllen to’n Leven. As Tillie sik op de Flicht för de Wülv ok noch en Been breken deit, driggt Edgar ehr wieter un maakt ehr en Sleden to’n Tehn. Mit de Tiet lehrt sik de beiden beter kennen un kamt sik neger.

Op jemehrn Weg finnt se amenner doch noch Teken vun Inwahners. Edgar maakt sik op’n Weg un finnt den Posten vun en Mann, de bi de Iesenbahn anstellt is. Man, de Süper verseggt em sien Help un jaagt em wedder weg. Opvn Torüchweg warrt Edgar wedder vun en Wulf anfallen, den Tillie doodscheten deit. Se redd em dormit dat Leven. Kort dorna warrt se vun Stiller mit sien Fleger funnen un torüch na Elko bröcht. As Tillie noch mol alleen is mit Edgar gifft se em en bannigen Söten, un Edgar versprickt ehr, dat he ehr in’t Krankhuus besöken will. De Film geiht to Enn as Edgar na Rose geiht, de an’t Auto op em töövt.

Kritik[ännern | Bornkood ännern]

Derek Smith schreev in’n Apollo Movie Guide, dat de Tokieker sik fragen de, wat he den Film al mol sehn harr. De Formel lett bekannt un de Film leet licht vörruttoseggen. To de gröttsten Lasten höör, dat de Schriever sik nich eens weern, wat se nu en romantischen Film oder en Actionsfilm maken wulln. Dat Dreihbook wies Lücken, man dat Speel vun de Hööftdorstellers weer „unvermodens goot“.[3]

TV Spielfilm 8/2008 beteken den Film as „lahm“.[4]

Borns[ännern | Bornkood ännern]

  1. Dreihöörd för The Aviator, afropen an’n 10. April 2008
  2. Inspeelresultaten för The Aviator, afropen an’n 10. April 2008
  3. Filmkritik vun Derek Smith, afropen an’n 10. April 2008
  4. TV Spielfilm 8/2008, Siet 46

Weblenken[ännern | Bornkood ännern]