Thabit

Vun Wikipedia
Zur Navigation springen Zur Suche springen
Thabit
Orion constellation map.png

υ Ori liggt ünner den Steern ι Ori
Positschoon un Beteken
Steernbild Orion;Ori
Rektaszension 5h 31m 55,9s
Deklinatschoon –07° 18′ 6″
Annere Naams
Bayer-Beteken υ
Flamsteed-Tall 36
Bright-Star-Kataloog HR 1855
Henry-Draper-Kataloog HD 36512
SAO-Kataloog SAO 132222
Physikaalsch Parameter
Afstand 2.900 Lj
schienbor Helligkeit +4,62
Spektralklass B0 V
Sünnerheiten ännerlich (vermoodt)

Thabit (vun’t araab. ṯābit: ﺛﺎﺑﺖ „De nich to’n Schuckeln to bringen is“) oder υ Ori is de Naam vun en Steern in dat Steernbild Orion. Dorbi hannelt sik dat um en blau-witten Hööftregen-Steern mit en schienbore Helligkeit vun 4,62m, de in en Afstand vun ruchweg 2.900 Lichtjohren steiht. Dat warrt vermoodt, dat he en ännerlichen Steern vun’n Tyyp Beta Cephei is.

Naam[ännern | Bornkood ännern]

Thabit liggt süüdlich vun den Steern ι Ori un is een vun twee Steerns (de annere is 29 Ori), de den böveren Rand vun Orion sien Stevel in Johann Bayer sien Uranometria (1603) billt. In John Flamsteed sien Katalog hett he de Tall 36, wiel sien Egennaam Thabit wohrschienlich vun’t Araabsche tabit afleidt is. In’n Orion gifft dat mit Tabit en tweeten Steern, de dissen Egennaam driggt. Se drööft nich mit’nanner verwesselt warrn.

Egenschoppen[ännern | Bornkood ännern]

Dat Spektrum vun υ Ori deent siet 1943 as en bestännig Ankerpunkt för de Klassifikatschoon vun annere Steerns[1]. In en Publikatschoon vun 1981 weer dorvun snackt, dat de Steern nich-radiale Pulasatschonen mit en Periood vun ruchweg 12 Stünnen hett. Thabit weer dorüm as langsom pulseren B Steern klassifizeert[2]. Wohrschienlich höört Thabit to de Beta-Cephei-Steerns. Bi disse Klasse hannelt sik dat üm blau-witte Hööftregensteerns mit ruchweg teihn bit twintig mol de Masse vun de Sünn, de mit Perioden twüschen 0,1 bit 0,3 Daag pulseert. De Helligkeitsünnerscheed is dorbi in’t Ultravigelette veel düütlicher as in’t sichtbore Spektrum[3].

Thabit höört to de Spektralklass B0 V. Sien Radius is ruchweg 7,2 mol so groot as de vun de Sünn. De Lüüchtkraft is op üm un bi dat 60.000-facke vun de Sünn bestimmt worrn mit en Böverflachen-Temperatur vun 34.347 K. De Masse schall ruchweg dat twintigfacke vun de Sünn wesen. Dormit is Thabit een vun de masserieksten Steerns vun de Orion OB1c Assoziatschoon (in’t Swert vun’n Orion).

Borns[ännern | Bornkood ännern]

  1. Garrison, R. F.: Anchor Points for the MK System of Spectral Classification, Bulletin of the American Astronomical Society 25: 1319, Dezember 1993
  2. Smith, Myron A.: Nonradial pulsations in the zero-age main-sequence star upsilon Orionis /09.5 V/. Astrophysical Journal 248 (1): 214–21, 1981. DOI:10.1086/159145.
  3. The Beta Cephei Stars and Their Relatives vun BSJ, 16. Juli 2010 op de Websteed vun de American Association of Variable Star Observers, afropen an’n 4. Februar 2014