Flamsteed-Beteken

Vun Wikipedia

De Flamsteed-Beteken warrt in de Astronomie blangen de Bayer-Beteken bruukt, üm de Steerns an’n Nachthimmel systemaatsch to beteken. Inföhrt weer se vun den britschen Astronom John Flamsteed.

De Flamsteed-Beteken is tohopenset ut de so nöömte Flamsteed-Tall, wo de Genitiv vun’n den Latienschen Naam vun’t Steernbild achtersteiht, in dat de Steern liggt, t. B. 13 Lyrae oder 23 Ursae Majoris. Begäng is dorbi aver ok de Verwennen vun de Afkörten vun de Steernbildnaams dör dree Bookstaven, also to’n Bispeel 13 Lyr oder 23 UMa. Flamsteed hett dorbi de Steerns, de he mit bloot Oog sehn künn, de Reeg na mit opstiegende Rekstaszension dörtellt. Vun wegen de Präzession is disse Reeg aver vundaag al an eenige Steden dörbroken.

Disse Oort vun de Beteken keem dat eerste mol in Flamsteeds Historia coelestis Britannica vör, de 1712 vun Edmond Halley un Isaac Newton publiek maakt worrn is, man ahn dat Flamsteed dat tosegt harr. Nadat Flamsteed dood bleven weer, hett Halley 1725 noch en Utgaav rutbrocht, wo noch ’n beten wat mehr binnen stünn. De Flamsteed-Tallen weern in’t 18. Johrhunnert jümmer lever nahmen un warrt ok vundaag noch bruukt, wenn’t för en Steern keen Bayer-Beteken gifft. Wieldat Flamsteed sien Beobachten blots vun Grootbritannien maakt hett, ümfaat sien Katalog ok blots de Steerns, de vun dor ut to sehn sünd, aver keen vun’n süüdlichen Steernhimmel.

Jüst as bi de Bayer-Beteken gifft dat vun wegen de offizielle Neeindelen vun de Steernbildgrenzen dör de IAU en Reeg vun Steerns, bi de de Flamsteed-Beteken en annert Steernbild utwiest, as dat vundaag na de Indelen wesen müss.