Stellerbrook

Wapen/Flagg	Koort
Basisdaten
Bundsland: Neddersassen Landkreis: Oosterholt Gemeen: Swonewebel
Inwahners:
Postleettall:	28790
Vörwahl:	0421
Geograafsche Laag:	53° 15′ N, 8° 31′ O

Stellerbrook (hoochdüütsch Stellerbruch) is en lütten Oort in de Gemeen Swonewebel in’n Landkreis Oosterholt, Neddersassen. De Oort hett von öllers to Vörbrook mit tohöört.

Geografie

De Oort liggt in de Masch von de Werser, in’n Süden von wat de Oosterstoder Masch is. Dat Water ut dat Rebeed flütt över dat Möhlenfleet na de Werser af. De Loop von de Ole Werser is blots en poor hunnert Meter in’n Westen von Stellerbrook, de hüdige Hauptstroom aver meist twee Kilometer.

De Naveröörd sünd Rade in’n Noorden, Hinnebeck in’n Noordoosten, Gösp un Kroonsmoor in’n Süüdoosten, Vörbrook un Ne’enkarken in’n Süden un Fährplaat un Harriersand in’n Noordwesten.

Historie

Stellerbrook kummt 1089 toeerst in de Oorkunnen vör, as de Bremer Arzbischop Liemar de Herrn op dat Good Stell in Vörbrook dat Land in’n Brook schenkt hett. Nadem dat Good in dat 18. Johrhunnert ingahn is, is dor blots noch de Hoff von Stellerbrook von nableven. Na düsse Tied hett de Hoff denn mehrmaals den Besitter wesselt.

1897 is de Hoff afbrennt un 1898 is dat Gebüüd boot worrn, dat vondaag noch steiht.

Verwaltungsgeschicht

In de Franzosentied hett de Oort toeerst 1810 bet 1811 binnen dat Königriek Westfalen to de Mairie Ne’enkarken in’n Kanton Blomendal höört un denn von 1811 bet 1814 to dat Franzöösche Kaiserriek ünner Napoleon un dor ok wedder to de Mairie Blomendal in’n Kanton Vesack.

De Oort hett vör 1885 to de Amtsvaagdie Ne’enkarken in dat Amt Blomendal tohöört. Na 1885 weer dat in’n Kreis Blomendal, de 1932 Deel von’n Kreis Oosterholt worrn is.

De Oort hett von öllers bi de Gemeen Vörbrook höört, de 1928/1929 Deel von de Gemeen Swonewebel worrn is. Mit de Gemeenreform in Neddersassen an’n 1. März 1974 is de Gemeen noch wedder grötter worrn.

Inwahnertall

Johr	Inwahners
1791-00-001791	1 Füürsteed
1812-00-001812	30*
1824-00-001824	1 Füürsteed
1848-00-001848	10 Lüüd, 1 Huus
1885-12-011. Dezember 1885	8 Lüüd, 1 Huus
1905-12-011. Dezember 1905	5 Lüüd, 1 Huus

* tohoop mit Stell

Religion

Stellerbrook is evangeelsch-reformeert präägt un höört to dat Kaspel von de Michaelskark in Ne’enkarken.

För de Kathoolschen is de St.-Ansgar-Kark in Swonewebel tostännig.

Weertschop un Infrastruktur

För Stellerbrook is de freewillige Füürwehr Ne’enkarken mit tostännig.

Verkehr

An Stellerbrook langs löppt de Kreisstraat 2, de in’n Noorden na Rade un Aschwarden geiht un dor denn in’n Landkreis Cuxhoben to de K 49 warrt. In’n Süden föhrt de K 2 na Vörbrook un Ne’enkarken un denn an de Landsstraat 149. Över de L 149 kummt een na Reken, Blomendal un Swonewebel.

De nächste Autobahn is de Autobahn 27. De Opfohrt 14 Swonewebel liggt so twölv Kilometer in’n Oosten von Stellerbrook.

De nächste Bahnhoff is so bi söss Kilometer wied weg in’n Süden de Bahnhoff Farge an de Bahnlien Farge–Vesack. Dor föhrt de Lien RS 1 von de Regio-S-Bahn Bremen/Neddersassen, de von Farge bet na Veern geiht.

Von 1911 bet 1931 is de Nedderwerserbahn an’n Oort langsföhrt. De nächsten Bahnhööv weren aver en poor Kilometer wied weg in’n Noorden in Rade un in’n Süden in Ne’enkarken.