Species (Film)

Vun Wikipedia
Filmdaten
Plattdüütsch Titel:
Originaltitel: Species
Düütsch Titel: Species
Produkschoonsland: USA
Johr vun’t Rutkamen: 1995
Läng: 104 Minuten
Originalspraak: Engelsch
Öllersfreegaav in Düütschland: FSK 16
Filmkru
Speelbaas: Roger Donaldson
Dreihbook: Dennis Feldman
Produkschoon: Dennis Feldman
Musik: Christopher Young
Kamera: Andrzej Bartkowiak
Snitt: Conrad Buff IV
Szenenbild: John Muto
Kledaasch: Joe I. Tompkins
Dorstellers

Species (op platt so veel as „Geslechter“) is en US-amerikaanschen Science-Fiction-Horror-Film ut dat Johr 1995 mit Ben Kingsley, Michael Madsen un Natasha Henstridge in de Hööftrullen. Dat Dreihbook hett Dennis Feldman schreven, Speelbaas weer Roger Donaldson.

Inholt[ännern | Bornkood ännern]

SETI is en Programm för de Söök na intelligent Leven buten de Eer. En Afdeel vun SETI hett de so nöömte Arecibo-Naricht mit Informatschonen över de Minschheit in’t Weltall. En poor Johren later kummt Antwoort mit en geneetschen Kood, de mit de minschliche DNA kombineert warrn schall. De Forschers glöövt doran, dat de Naricht goot meent is, un fangt mit dat Experiment an. Ut en befruchte Eizell entwickelt sik in utermatig korte Tiet en Deern, de vun’t Labor de Beteken Sil kriggt un en unnatürlichen Geist un utermatige Knööv hett. Se mutt in en isoleerte Zell opwassen, bit de Laborleider Fitch beslutt, de Deern ut Grünnen vun de Sekerheit doodtomaken.

Aver Sil överleevt dat Giftgas un kann utbreken. Fitch hüert en Koppel vun Experten an, de Sil finnen un an de Siet maken schüllt, vördem wat passeert. De Grupp besteiht ut den Anthropologen Dr. Arden, de Molekularbiologi] Dr. Baker, den empathischen Spökenkieker Dan Smithson un den Koppgeldjager Preston Lennox. Intwüschen is Sil mit’n Tog bit na Los Angeles kamen. Op de Fohrt sett en Wannel in: Se verpoppt sik in en Kokon un slipt koort dorna as utwossen Fro. Man, vun’n Kopp her is se jümmer noch as en lütt Kind.

Aver, Sil lehrt gau un snappt allens op, wat se sehn un hören deit. Un in ehr warrt de Instiknt waak, en Kind kriegen to wullen. In en Nachtclub söcht se sik en Kerl, de in Fraag kummt. En möögliche Konkurrentsche maakt se op Klo an de Siet. Se föhrt mit en Mann weg. Man, kort vördem se sik mit em pooren will, markt se, dat he suckerkrank is un will nix mehr vun em weten. As de aver dorop besteiht mit ehr in’t Bett to gahn, maakt se ok em an de Siet.

Fitch un sien Mackers kamt ehr langsom op de Spoor, man Sil is to klook, üm sik eenfack so fangen to laten. En Dag later warrt se bi en Autounfall besehrt un kummt in’t Krankenhuus. En Ogentüüg, de bi den Unfall Eerste Hülp leist hett, fohrt mit un sorgt sik üm dem Tostand vun de bannig attraktive Sil. He nimmt ehr mit na Huus, as sik Sils Lief – as vun Wunnderhand – sülvst heelt hett. Jüst as se sik mit em pooren will, warrt se vun Fitch sien Lüüd stöört. Ok disse Mann warrt vun ehr doodmaakt.

Üm ehr Verfolgers aftoschüddeln, överleggt se sik en Plaan so to doon, as wenn se bi en Autounfall üm’t Leven kummt. An’n Oort vun den Unfall lett se en Finger vun sik torüch, de ehr aver glieks nawassen deit. För de Söökmannschop lett dat, as dat se doot is. Liekers hett Lennox Twievel doran. Sil ännert ehr Frisur un Hoorfarv un maakt sik den glieken Avend in’t Hotel an Arden ran. De kennt ehr nich un freit sik, dat he mit so en Fro in’t Bett kann. Sil markt glieks na den Akt, dat se en Kind kriggt un maakt Arden an de Siet.

De annern Liddmaten vun Fitch sien Grupp hebbt aver dör Dan al mitkregen, dat Sil noch leevt. Se jaagt ehr bit in de Kanalisatschoon vun Los Angeles, woneem se na na en gresig korte Swangerschop al ehrn Söhn op de Welt bringt. Se kann ok Fitch noch ümbringen, warrt an’t Enn denn aver – jüst as ehr Söhn – stellt un an de Siet maakt. In de letzten Szeen warrt en rott wiest, de en Liefdeel vun Sil opfreten deit un dorna anfangt to muteeren.

Kritik[ännern | Bornkood ännern]

James Berardinelli hett op ReelViews de Trickeffekten vun den Film loovt. He vergleek Species mit den Science-Fiction-Thriller Aliens, achter den de Film aver torüch bleev, un Judge Dredd, de slechter weer as Species. To de Figuren seggt he, dat se mit Afsicht klischeehaft weern.[1]

Utteken[ännern | Bornkood ännern]

De Film weer för acht bekannte Filmpriesen vörslahn un hett dorvun dree wunnen:

Anners wat[ännern | Bornkood ännern]

Species weer de Optakt to en Filmreeg, de 1998 mit Species II un 2004 mit Species II wietergüng. De opstunns letzte Film ut de Reeg is 2007 mit Species – The Awakening rutkamen. De Produkschoonskosten vun den eersten Deel warrt op ruchweg 35 Millionen US-Dollar schätzt.[2]

Dat Utsehn vun de butenirdische Levensform vun Sil as ok de Tog in den Droom sünd vun Hansruedi Giger utklamüstert worrn, de al för dat Design vun dat butenirdische Wesen in Alien ut dat Johr 1979 verantwoortlich weer.

Borns[ännern | Bornkood ännern]

  1. Filmkritik vun James Berardinelli
  2. http://www.imdb.de/title/tt0114508/business

Weblenken[ännern | Bornkood ännern]