Southern Highway

De Southern Highway is een von de veer groten Highways in dat Land Belize. De Highway is 156,2 Kilometer lang. Siet 2009 is de Straat dörgahns asphalteert.

Verloop

De Anfang is an’n Hummingbird Highway bi Dangriga. Von dor löppt de Highway na Süüdwesten över de Öörd Silk Grass, Maya Center, Mayan King, Santa Cruz, Santa Rosa, San Roman un San Juan. In’n Süüdoosten von San Juan geiht na Oosten de Independence Road na Independence. De Southern Highway löppt denn över Bella Vista, San Isidro, Bladen, Medina Bank, Tambran, Golden Stream, Indian Creek, Hicattee un Big Falls na Dump. In Dump geiht na Westen de San Antonio Road von’n Southern Highway af un föhrt över San Antonio na de Grenz to Guatemala bi Jalacte. In Dump knickt de Southern Highway af un föhrt na Süüdoosten över Yemeri Grove, Jacintoville un Eldridgeville na Cattle Landing an de Küst von de Karibische See. Dat letze Stück över Hopeville na Punta Gorda föhrt de Straat an de Küst langs. In Punta Gorda is de Highway toenn.

De Southern Highway föhrt in’n eersten Deel oosten de Maya-Bargen langs.

De Fohrtied von Dangriga na Punta Gorda bedriggt üm un bi veer Stünnen.

Historie

De Southern Highway is to Anfang de Johren 1960 trech worrn. Vörher hett dat keen Straat twüschen Stann Creek Town (Dangriga) un Punta Gorda geven. De eenzige Weg ut’n Noorden von Belize na’n Distrikt Toledo weer över dat Water.