Slott Gothenborg

Vun Wikipedia
Wesseln na: Navigatschoon, Söök
Slott Gothenborg von vörn (2007)
von achtern keken
Schüün bi dat Slott

Dat Slott Gothenborg is en Slott ut de Tied von de Renaissance in Gothenborg (Landkreis Stood).

Nadem de Sweden an’t Enn von Dörtigjohrigen Krieg 1648 de Herrschop över Bremen-Veern övernahmen harrn, hett Königin Christina Hans Christoph von Königsmarck to’n Generalguvernör von Bremen-Veern maakt. Sien Seet as Guvernör weer Stood un in dat Naverdörp Lieth hett Königsmarck dicht bi de Kant von de Geest mit Utblick över de Masch von Oolland en Landslott boon laten. Dat Slott hett na Königsmarck sien Wief (Agathe von Leesten) den Naam Agathenburg kregen. Dor is plattdüütsch Gothenborg von worrn un disse Naam is denn ok op dat Dörp Lieth övergahn, dat denn blots noch Gothenborg nöömt worrn is.

Dat Slott is 1655 trech worrn, aver Königsmarck sülvs weer nich faken sülvs dor. He hett von 1656 bet 1660 in brannenbörgsch-prüüßsche Fungenschop seten un is 1663 doodbleven. Sien Wief hett aver bet 1671 op dat Slott wahnt. Dat Slott hett denn noch bet 1694 de Familie Königsmarck tohöört un Aurora von Königsmarck is dor opwussen. Dat Slott hett en Tied Otto Wilhelm von Königsmarck tohöört un sien Weetfroo Catharina Charlotta De la Gardie hett dor na sien Dood noch bet 1697 wahnt, ofschoonst dat Slott as Arv an Philipp Christoph von Königsmarck gahn is. Na Catharina Charlotta ehren Dood weer nich kloor, ’keen dat Slott arven schull.

1740 hett dat Kurförstendom Hannover dat Slott köfft un von 1753 af an weer dat Slott Seet von de Amtlüüd von dat Amt Stood-Gothenborg. 1866 is dat Königriek Hannover as Provinz Hannover an Prüßen kamen un dat Slott Gothenborg is tohoop mit all dat Land, dat dor bihöört hett, is veraukschoneert worrn. 1881 hett de Buur Hans Wilkens dat Slott köfft, nadem sien egen Hoffsteed för de nee boote Nedderelvbahn von Horborg över Stood na Cuxhoben wieken müss (de Bahnlien löppt 50 m weg in’n Noordoosten von dat Slott an de Geestkant langs). Dat Slott weer nu Deel von en Buurngood.

An’n 26. April 1921 is in dat Slott en Füür utbraken un blots de sworen Müürn sünd stahnbleven. Binnen is allens utbrennt. In de nakamen Johren is dat Slott denn wedder trechmaakt worrn. Toletzt hett dat Slott Sophie zum Felde tohöört, de dat denn mit ehren Dood 1983 an’n Heimat- un Geschichtsvereen von Stood verarvt hett. De Vereen hett dat denn 1985 an’n Landkreis Stood afgeven. In de Tied von 1990 bet 1993 is dat Slott denn mit Geld von de Stiftung Neddersassen restaureert worrn. Von 1991 bet 2004 harr de Landkreis de Hand över dat Slott. 2004 hett de Landkreis denn dat Leid an de Kulturstiftung afgeven, de al 1992 inricht worrn is un dat kulturelle Programm in dat Slott in’e Hand harr. De Stiftung kriggt Geld ut’n Huusholt von’n Landkreis, dat se denn egenstännig verplanen köönt. De Stiftung büddt in dat Slott en Kulturprogramm mit Utstellungen, Kunzerten un Lesungen an. Dat gifft en Café un en lütten Museumsladen un en Deel von de Rüüm in’t Slott un in’n olen Peerstall köönt för Veranstaltungen un Festen meedt warrn.

Dat Gebüüd[ännern | Bornkood ännern]

Dat Slott is ut Backsteen boot un hett dree Stockwarken. Dat Gebüüd is von de Grundform her en Rechteck mit en vörsett Treppentoorn op de Hoffsied. De Noordsied harr fröher ok noch en anboot Toorn, de as Partemang bruukt worrn is. Disse Toorn is aver na’n Brand 1921 afreten worrn. De Vördöör is en Poortal ut Sandsteen. De Inrichtung binnen is to’n Deel 1921 mit verbrennt. De Toorn vörn harr bet 1921 en Plattform op de Höögd von dat drüdde Stockwark. Dat hüdige spitze Dack is eerst na den Brand kamen.

Weblenken[ännern | Bornkood ännern]

Commons-logo.svg Slott Gothenborg. Mehr Biller, Videos oder Audiodateien to’t Thema gifft dat bi Wikimedia Commons.