Otto Wilhelm von Königsmarck
Dit Woort hett noch annere Bedüden: kiek dorför ünner Otto Wilhelm von Königsmarck (Politiker).
Otto Wilhelm von Königsmarck (* 5. Januar 1639 in Minnen; † 15. September 1688 in Modon) weer en düütschen General un Staatsmann.
Von Königsmarck is 1639 as Söhn von Barbara Maria Agathe, borene von Leesten (9. April 1608–15. Dezember 1671), un Graaf Hans Christoph von Königsmarck (4. März 1600–8. März 1663) in Minnen boren. Von 1645 af an hett de Familie in Stood leevt. Königsmarck hett ünner annern Ünnerricht bi Johann Philipp Tonsor kregen. Persepter weer Esaias von Pufendorf. He hett denn dree Johr an de Universität Jena studeert. Na de Tied in Jena weer he ok noch för korte Tieden op de Universitäten Tübingen, Straßburg, Basel, Genf, Blois un Angers un hett siene Grand Tour maakt.
1654 hett em Hartog Willem von Sassen-Weimar in de Fruchtbringende Gesellschaft opnahmen. He hett den Sellschopsnaam der Hochgeneigte kregen un dat Motto zur Höflichkeit. As Emblem is em de weiße Mangold todacht worrn.
Königsmarck is as Offzeer in sweedsche Deensten gahn. He is 1661 Afsandten in England worrn un 1666 in Frankriek. 1664 is he Oberst von dat Lievregiment to Peerd worrn un hett de Belagerung von Bremen in’n Tweten Breemsch-Sweedschen Krieg mitmaakt.
För korte Tied güng he denn as Generalmajor in’n Deenst von Karl-Ludwig von Palz-Simmern un von 1668 bet 1672 in’n Deenst von Ludwig XIV. von Frankriek.
1672 is he denn aver wedder in sweedsche Deensten gahn. Na’n Dood von sien Broder Kurt Christoph is he 1673 Viezguvernör von de Hartogdömer Bremen un Veern worrn. Ok den Posten as Gogreev von dat Gogericht Achem hett he von 1672 bet 1686 övernahmen. Königsmarck güng as Afsandten na Frankriek un hett dor op franzöösche Sied an’n Hollandschen Krieg deelnahmen. Mit Turenne hett he Maastricht belagert. Ünner Condé hett he sik in de Slacht bi Seneffe 1674 so uttekent, dat de König em mit en kostbor Degen ehrt hett.
He is swoor verwunnt worrn un is denn trüggropen worrn, üm as Feldmarschall un Böverbefehlshebber von Pommern in’n Noordschen Krieg intogriepen. Dör en Angreep op de Mark Brannenborg schull he de brannenborg-prüüßsche Armee dwingen, von’n Rhien aftotehn un de verbünnten Franzosen to entlasten. De Sweden hebbt denn 1675 aver de Slacht bi Fehrbellin verloren. Nadem ok dat breemsche Heer verloren harr, müss Königsmarck Pommern rümen. 1678 hett he aver de Dänen ünner Detlef von Rumohr in de Slacht von Warksow op Rügen slagen. In’n September 1678 müss he na en ne’e Invasion op Rügen un den Verlust von de Feste Stralsund in’n Oktober 1678 Pommern opgeven un kunn blots Resten von dat Peervolk na Sweden trüggföhren (Jagd över dat Kuursche Haff). Na’n Freden von Saint-Germain, dör den Sweden sien Besitt in Noorddüütschland wedderkregen hett, is he Generalguvernör von Pommern, Rügen un Wismer worrn. Dat is he bet 1685 ween.
1677 hett he von König Karl XI. dat Amt Veern as Mannlehn kregen. Dormit harrn Königsmarcks dat ganze fröhere Hoogstift Veern ünner sik, denn dat Amt Rodenborg harrn se al vörher as Lehn kregen. Mit de sweedsche Redukschoon von 1680 müss Königsmrack meist all sien Besitt in Düütschland wedder afgeven.
As 1683 de Grote Törkenkrieg loosgüng, weer Königsmarck as Generalguvernör von Pommern bi’n Rieksfeldtog dorbi, üm den Kaiser in Ungarn gegen de Törken to ünnerstütten. As General weer he Böverbefehlshebber över de Landtruppen von de Republik Venedig.
In’n Juni un Juli 1686 hett he Navarino, Modon, Argos un Nauplia innahmen. De Signoria von Venedig hett em en gollene Schaal schenkt, de 6000 Dukaten weert weer. An’n 24. Juli 1687 hett he Patras innahmen. An’n 9. August stünn he vör Korinth. De Inwahners harrn de Stadt al verlaten un afbrennt. Königsmarck güng hier an’n 20. September an Boord von Francesco Morosini sien Flott un is an’n 21. September in’n Haven von Piräus lannt. He hett Athen besett un de Akropolis belagert. An’n 26. September hett en Bumm en törksch Pulverlager sprengt un de Tempel op de Akropolis hett swore Schadens nahmen. Königsmarck sien Truppen hebbt de Akropolis denn innahmen. In Athen weer aver de Pest utbraken un hett de Truppen swoor tosett. In’n April 1688 müssen se Athen priesgeven. Bi de Belagerung von Negroponte hett he sik mit de Pest ansteken un is in’n September 1688 doodbleven. Siene Liek is tohoop mit de von sien Brodersöhn Hans Karl von Königsmarck na Stood brocht worrn. Dor is he an’n 29. Januar 1691 begraven worrn.
In dat Arsenal in Venedig is en Büst von em opstellt worrn, de de Bildhauer Heinrich Meiring trechmaakt hett.
Königsmarck hett an’n 9. Februar 1682 Catharina Charlotta De la Gardie (18. März 1655–15. September 1697) freet.