Up’m Rüsch
Up’m Rüsch (hoochdüütsch Ruschbaden) weer en Eddelgood bi Bauen in de hüdige Gemeen Achem in’n Landkreis Veern, Neddersassen.
Geografie[ännern | Bornkood ännern]
Dat Good leeg op de Achem-Veerner Geest.
De Öörd ümto weren Giersbarg in’n Noordoosten, Hustäe in’n Oosten, Ädelsen in’n Süüdoosten, de Bauer Windmöhl in’n Süden, Bauen in’n Süüdwesten un Üserfinien un Bauerholt in’n Noordwesten. Mit de Hüüs von Hollbauen weer de Oort dicht verbunnen.
Historie[ännern | Bornkood ännern]
Dat Good is in dat 16. Johrhunnert von de Familie Clüver grünnt worrn, keem aver al fröh in de Hannen von de Familie von Mandelsloh. In dat 17. un 18. Johrhunnert hebbt de Familien von Bremer un von Düring to de Besitters tellt. An’t Enn von dat 18. Johrhunnert weer dat Good verfullen. 1778 hett Johann Wilhelm Friedrich von Düring dat Good an de Familie von Müller verköfft. Dat Good is denn aver in relativ korte Tied dör verscheden Hannen gahn: Besitters weren ok noch de Herrn Jansen un Elfers. Johann Heinrich Freese gen. von Quiter hett dat Good denn köfft un de Landdagsrechten op dat Good Ädelsen överdragen. In dat Johr 1800 hett he dat Good an’n Vörbesitter trügg verköfft. As de Vörbesitter Kunkurs gahn is, is dat Good üm 1838 över Herrn Cyriacks an Johann Caspar von der Wisch verköfft worrn. De hett dat Good toeerst an Joachim Christian von Heimbruch afgeven, de 1844 doodbleven is. Joachim Christian sien Söhn Gottlieb Ernst August von Heimbruch hett dat Good denn aver an Johann Caspar von der Wisch trügggeven.
Bi’n Bo von de Bahnlien Wunsdörp–Bremen is dat Goodshuus afreten worrn. Liekers sünd aver noch Hüüs stahn bleven, de to dat Good höört harrn.
Johann Caspar hett dat Land von dat Good up’m Rüsch 1858 denn mit de Göder Emßen, Ädelsen un Koppeln to en Fideikommiss tohoopföhrt.
Johann Caspar is 1865 ahn Kinner doodbleven un de Resten von dat Good güngen an sien Broder Hieronymus von der Wisch, de 1873 ok ahn Kinner doodbleven is. Dat Land is dorüm an de Bröder Carl Johann Christian († 1895) un Gottlieb Ernst August von Heimbruch († 1892) fullen. Ok düsse beiden Bröder harrn keen Kinner, so dat de Resten von dat Good an Christian zu Reventlow († 1922) ut de Familie Reventlow fullen sünd. Dat Land, dat to dat Good höört hett, is 1930/1934 von Christian sien Söhn Rudolph zu Reventlow in Parzellen opdeelt un an verschedene ne’e Besitters verköfft worrn.
Vondaag is de Oort Bauen so wied wussen, dat op dat Rebeed von dat Good Wahnrebeden staht.
Verwaltungsgeschicht[ännern | Bornkood ännern]
Dat Good hett vör 1852 to de Oostvaagdie von dat Gogericht Achem tohöört, dat 1852 denn to dat Amt Achem worrn is. Na 1885 weer dat in’n Kreis Achem. 1932 is de Kreis Achem mit’n Kreis Veern tohoopgahn un hett den ne’en un grötteren Kreis Veern billt.
Inwahnertall[ännern | Bornkood ännern]
| Johr | Inwahners |
|---|---|
| 1791[1] | 1 Füürsteed |
| 1824[2] | 1 Füürsteed |
| 1848[3] | 14 Lüüd, 2 Hüüs |
| 1. Dezember 1871[4] | 16 Lüüd, 2 Hüüs |
| 1. Dezember 1885[5] | 8 Lüüd, 2 Hüüs |
| 1. Dezember 1905[6] | 3 Lüüd, 1 Huus |
Religion[ännern | Bornkood ännern]
Dat Eddelgood weer evangeelsch-luthersch präägt un hett to dat Kaspel von de Laurentius-Kark in Achem höört.
Footnoten[ännern | Bornkood ännern]
- ↑ Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 197
- ↑ Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 522
- ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 142
- ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 164
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 176
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 2
Koordinaten:53° 0′ N, 9° 6′ O