Ray Gilbert Lightburn
Ray Gilbert Lightburn (* 8. September 1941; † 7. Oktober 2009 in Ladyville) weer en Politiker ut Belize (PUP).
Lightburn is 1941 as Söhn von Lucille Edna Eusey un William Lucius Lightburn boren.[1] He weer op dat St. John’s College in Belize-Stadt, hett dor aver keen Afsluss maakt.[2]
Lightburn weer von 1963 af an Präsident von de Christian Workers Union.[1]
He weer ok Manager un Redaktör von The Belize Times.[1] Later harr he mit de Tribune ok en egen Bladd rutgeven, dat aver blots korte Tied Bestand harr.[1] Tosätzlich hett he in Belize-Stadt en Rastaurant (Chef Ramon) bedreven.[1]
Bi de Wahl to’n Stadtraad von Belize-Stadt an’n 14. Dezember 1965 weer he Kannedaat för de NIP, kunn sik aver nich dörsetten.[3]
Lightburn weer Mitgrünner von dat Conscious Youth Development Program un Vörsitter von dat Lands Committee ünner Minister Florencio Marin Sr.[1] 1991 hett he ok Blackbird Caye (Deel von dat Turneffe-Atoll) köfft un dor tohoop mit’n Amerikaner Al Dugan en Öko-Resort entwickelt.
Bi de Parlamentswahl in Belize 1998 weer he Kannedaat för de PUP in’n Wahlkreis Mesopotamia, kunn sik mit 42,31 % von de Stimmen aver nich gegen Michael Finnegan von de UDP dörsetten.
He weer Vörsitter von de Water and Sewerage Authority (WASA).[1]
Nadem he den Posten as Vörsitter von de WASA verloren harr, is dat Leven von Lightburn de letzten fiev Johr bilütten ut de Spoor gahn. He harr en Problem mit Drogen. An’n 16. Juli 2009 hett he en lütt Book över sien Leven rutbröcht, dat Nothing to Lose heten hett.[1][4]
An’n 7. Oktober 2009 weer Lightburn nachts an’n Northern Highway in Los Lagos (Gemeen Ladyville) ünnerwegens, as he von en Auto överföhrt worrn is.[1] De Fohrer is 2011 freespraken worrn.[5] Lightburn sien Truurfier weer an’n 13. Oktober 2009 in de kathoolsche St. Martin de Porres Church in Belize-Stadt.[1]
Lightburn weer verheiraadt mit Margaret Jones-Lightburn.[1] De beiden harrn dree Kinner.[1]
Footnoten[ännern | Bornkood ännern]
- ↑ a b c d e f g h i j k l Ray Gilbert Lightburn, a PUP icon, dead at 68, Amandala an’n 9. Oktober 2009
- ↑ Ray Lightburn Killed on Northern Highway, 7 News Belize an’n 8. Oktober 2009
- ↑ Myrtle Palacio: Belize City Council Election Results 1962 to 2003
- ↑ Ray Lightburn writes a tale to independence, Channel 5 Belize an’n 16. Juli 2009
- ↑ Manslaughter case into death of Gilbert “Ray” Lightburn concludes, Channel 5 Belize an’n 3. Juni 2011