Petrus-Kark (Host)

Kark op de Host bi Burweg

Döör von de Kark

Graffsteen bi de Kark

De Petrus-Kark is de Kark von dat ole evangeelsch-luthersche Kaspel Host (Karkenkreis Stood). Ehren Naam hett se von’n Apostel Petrus. De Petrus-Kark is mit de Marienkark in Grootweurn in een Karkengemeen verbunnen.

Historie

De romaansche Kark ut Feldsteen is üm un bi 1200 op en lütten Sandbarg boot worrn, as de Masch hier langs de Oost koloniseert worrn is. De Toorn is na Westen hen anboot, is ut Holt un steiht op en Fundament ut Backsteen.

De ole Klock von de Kark is 1912 in dat Museum Lümborg kamen. De hüdige Klock is 1910 in Hilmssen gaten worrn. Den Klockenstohl hebbt se 1797 nee maakt.

1959 is de Kark restaureert worrn.

De Dööpsteen ut dat Middelöller leeg lange Tied in’n Goorn von dat Parrhuus un keem 1975 trügg in de Kark.

Örgel

De Örgel is 1892 von Heinrich Röver boot worrn. De Örgel hett twee Manuals, een Pedaal un negen Registers. De Örgel is 1986 von Martin Haspelmath restaureert worrn.

Pastoorn

De Pastoor weer von 1999 bet 2007 Eckhard Krol. Siet 2007 weer Pastoor Burkhard Ziemens von de Karkengemeen Olendörp för Host mit tostännig. Ziemens is 2017 in Rohstand gahn. Al siet 2016 hett sik Diaken Martin Michalek blangenbi to’n Pastoor wiederbillen laten un hett de Gemeen denn övernahmen.

Kaspel

To de Karkengemeen Host höört de Öörd Burweg, Blomendol, Bredenwisch, Host, Engelschopp, Neeland, Grootweurn, Seemoor, Borg un Waterkroog. Neeland un Grootweurn hebbt fröher en egen Kaspel billt.

De Naverkaspels sünd Basbeek in’n Noordwesten, Oosten in’n Noordwesten un Noorden, Drochters in’n Noordoosten, Himmelpoorten in’n Süüdoosten, Olendörp in’n Süüdwesten un Heckthusen in’n Westen.

Weblenken

Petrus-Kark (Host). Mehr Biller, Videos oder Audiodateien to’t Thema gifft dat bi Wikimedia Commons.