Michael-Kark (Basbeek)

Vun Wikipedia
De Kark von Süüdwesten keken
De Kark von Noorden keken
De Ingang

De Michael-Kark Denkmaal mit de Nr. 35.202.200.013 in de Gemeen Hemmoor is de Kark von dat evangeelsch-luthersche Kaspel Basbeek (Karkenkreis Hadeln). Ehren Naam hett se von’n Arzengel Michael. To de Gemeen höört üm un bi 2200 Lüüd to.

De Kark liggt in Basbeek op de Hollenworth an’n Rand von de Geest na de Masch von de Oost hen.

Historie[ännern | Bornkood ännern]

In de öllste Tied hett Basbeek to dat Kaspel von de Bartelmees-Kark in Loomst tohöört. De eerste Kapell in Basbeek is 1570 von Hinnerk von Brobargen stift worrn, de op de Hollenworth en Goodshoff harr. Dat weer dree Johr nadem Loomst de Reformatschoon inföhrt harr. De Stiftoorkunn hett fastleggt, dat de Kapell to Ehren von de Hillige Dreefaltigkeit stift worrn is un dor ok na nöömt warrn schall. Liekers hett sik in dat 19. Johrhunnert dörsett, dat de Kark na’n Arzengel Michael nöömt warrt. Ünnerschreven hebbt de Stiftoorkunn Hinnerk von Brobargen, siene twee Söhns, de twee Pastoorn von Öberndörp, de Pastoor Behrends von Loomst un Johannes Homann, wat denn de eerste Pastoor in Basbeek worrn is.

An’n 3. April 1579 hett de Doompropst von Bremen, Hartog Friedrich von Sassen, de Kapell bestätigt. Dat Patronat hett bet to’n Konkurs von’n Goodshoff in Basbeek bi de Familie von Brobargen legen un denn bi de ne’en Besitters, de Familie von Bremer. Eerst 1934 is dat Patronat ophaven worrn.

De Kapell weer nich egenstännig man en Filiaalkark von de Bartelmees-Kark in Loomst. Eerst 1840 is Basbeek denn egenstännig worrn. 1842 hett de Pastoor en Parrhuus kregen.

1674 hett Arend Jürgen von Brobargen de ole Kapell afrieten laten un denn is de hüdige Fackwark-Kark boot worrn.

Metta Maria Marschalk Fro von Brobargen hett 1693 de Kanzel stift, de ok vondaag noch in de Kark vörhannen is.

1882 is de Süüdwand nee maakt worrn un de Kark hett ne’e Finstern kregen.

Nadem de ole Toorn ut Holt brockfällig worrn is, is 1902 an de Westsied de hüdige, 32,5 Meter hoge Toorn ut Backsteen boot worrn. In’n Toorn hängt twee Klocken. De lüttje is ut Bronz un von 1842. Stift hett ehr Bendix Carl Christian von Bremer un gaten worrn is se in Wasra ut de Bronz von en ole Klock, de sprungen weer. De gröttere Klock is von 1975.

1896 is de grote Klock sprungen. Dor is denn en ne’e Klock för kamen, de de Firma Otto ut Hemelingen gaten hett un de 978 kg swoor weer. Disse Klock is aver al 1917 in’n Eersten Weltkrieg insmulten worrn. 1927 hett de Kark denn en ne’e Klock kregen, de aver 1942 in’n Tweten Weltkrieg ok insmulten worrn is. 1951 hett de Kark wedder en ne’en Klock kregen. Disse Klock harr aver keen gode Qualität un is later wedder daalhaalt worrn. De Klock steiht nu bi’n Ingang von de Kark.

1954 is de Kark binnen kumplett renoveert worrn. Do hett de Kark ok en ne’en Dööpsteen kregen. 1986 sünd de Müürn saneert worrn. Dat Gemeenhuus is 1984/1985 boot worrn.

Örgel[ännern | Bornkood ännern]

De fröhere Örgel mit een Manual is 1870 von Johann Hinrich Röver boot worrn un hett 2400 Mark köst.

De hüdige Örgel is bi Kühnel in Stood boot un 1967 inwieht worrn. Se hett twee Manuals, een Pedal un 17 Registers.

Pastoorn[ännern | Bornkood ännern]

Von 1817, as Pastoor Brüning doodbleven is, bet 1841, as Pastoor Gustav Bredenkamp anfungen is, hett Basbeek gorkeen egen Pastoor hatt. Von 1980 bet 1991 weer Rainer Clasen Pastoor in Basbeek. De Pastoor von 1991 bet September 2014 weer Wilfried Behr. Ne’e Pastoorin is 2015 Susanne Link-Köhler worrn.

Kaspel[ännern | Bornkood ännern]

To dat Kaspel Basbeek höört alleen de Oort Basbeek sülvs.

De Naverkaspels sünd Oosten in’n Noorden, Host/Grootweurn in’n Oosten, Heckthusen in’n Süüdoosten, Loomst in’n Süüdwesten un Warstood in’n Noordwesten.

Weblenken[ännern | Bornkood ännern]

Michael-Kark. Mehr Biller, Videos oder Audiodateien to’t Thema gifft dat bi Wikimedia Commons.


Koordinaten:53° 41′ N, 9° 11′ O